Lukas 18:1-43
18 Kenca si e, ceritaken Jesus sada perumpaman* kerna pentingna rusur ertoto janah la nyerah,+
2 nina, “Bas sada kota, lit sekalak hakim si la mbiar man Dibata janah la diatena kalak.
3 Bas kota e lit ka sekalak janda si lalap ndahi ia janah nina, ‘Banlah keputusen si adil antara aku ras lawanku i pengadilen.’
4 Bas piga-piga waktu, la nggit hakim e, tapi dungna nina bas ukurna, ‘Amin pe aku la mbiar man Dibata janah la diateku kalak,
5 tapi perban lalap ganggu janda e aku, kusampatilah ia gelah datna keadilen, alu bage lanai lalap dahina aku janah lanai latihina aku alu pemindonna.’”+
6 Jenari nina Tuan, “Begikenlah kai nina hakim e, amin pe ia labo kalak benar!
7 Emaka, pasti bereken Dibata keadilen man kalak si pilihNa, si erlebuh man baNa suari ras berngi.+ Ia pe sabar man kalak e.+
8 Kukataken man kena, pasti mis bereken Dibata keadilen man kalak e. Tapi sanga Anak manusia reh, lit nge dapetina kiniteken si bagenda bas doni?”
9 Ceritakenna ka perumpaman enda man piga-piga kalak si tek maka dirina benar ras si erpengakap maka kalak si deban la lit ergana, nina,
10 “Dua kalak dilaki lawes ku rumah pertoton guna ertoto, sada kalak Parisi ras sada nari pemungut pajak.
11 Tedis kalak Parisi e janah mulai ertoto bas pusuhna, ‘O Dibata, bujur ningku perban aku la bagi kalak si deban, la bagi tukang kompas, kalak si la benar, perlua-lua, ntah pe bagi pemungut pajak enda.
12 Dua kali seminggu puasa aku. Kubereken sepersepuluh arah kerina penghasilenku.’+
13 Tapi pemungut pajak e tedis arah ndauh, natap ku langit pe la ia pang. Temtemina dadana, nina, ‘O Dibata, mekuah min ateNdu aku, kalak perdosa enda.’+
14 Kukataken man kena, sanga dilaki enda mulih ku rumahna, ia terbukti lebih benar asangken kalak Parisi e.+ Sebap ise pe si peganjangna bana ipermelaken me, tapi ise pe si peterukna bana ipeganjang pagi.”+
15 Baba kalak ka anak-anakna si kitik denga ku Jesus gelah tamana tanna ku kalak e, tapi ngidah si enda, rawai murid-muridna kalak e.+
16 Tapi lebuh Jesus anak-anak e janah nina, “Pediatlah anak-anak e reh man bangku. Ula larang ia, sebap man kalak si bagenda me Kerajan Dibata.+
17 Situhuna kukataken man kena, ise pe si la ngaloken Kerajan Dibata bagi sekalak anak-anak, ia la banci masuk ku bas.”+
18 Sekalak peminpin kalak Jahudi nungkun man Jesus, “O Guru Si Mehuli, kai nge si arus kulakoken guna ndatken kegeluhen si rasa lalap?”+
19 Jawap Jesus, “Engkai maka katakenndu aku mehuli? La lit si mehuli selain Dibata.+
20 Tehndu perentah enda, ‘Ula erlua-lua,+ ula munuh,+ ula nangko,+ ula mereken kesaksin palsu,+ janah hamatilah bapakndu ras mamakndu.’”+
21 Nina peminpin e, “Kerina si e enggo kudalanken kitik-kitikku nari.”
22 Megi si e, nina Jesus man bana, “Lit denga sada si kurang bas kam: Dayaken kerina ertandu janah bagiken senna man kalak mesera, alu bage lit pagi ertandu i surga. Kenca si e, mari jadilah pengikutku.”+
23 Sedih kel ia megi si e, sebap bayak kel ia.+
24 Tatap Jesus ia janah nina, “Seh kel serana kalak si melala senna masuk ku Kerajan Dibata!+
25 Situhuna, nukahen unta masuk ku lubang jarum jait asangken kalak bayak masuk ku Kerajan Dibata.”+
26 Nina kalak si megisa, “Adi bage, ise si banci selamat?”+
27 Nina Jesus, “Si la mungkin bas manusia, bas Dibata banci terjadi.”+
28 Tapi nina Petrus, “Enggo tadingken kami kerina si lit bas kami janah ikutken kami kam.”+
29 Nina Jesus man kalak e, “Situhuna kukataken man kena, ise pe si enggo nadingken rumahna ntah diberuna ntah seninana ntah orang tuana ntah anakna perban Kerajan Dibata,+
30 alokenna pagi erlipat-lipat terbuen bas jaman si gundari, ras bas jaman* si nandangi reh, kegeluhen si rasa lalap.”+
31 Jenari babana 12 rasulna ku duru janah nina man kalak e, “Kita bas perdalanen ku Jerusalem, janah kerina si itulisken arah nabi-nabi kerna Anak manusia nandangi terjadi.+
32 Contohna, iserahken pagi ia man kalak arah bangsa+ si deban janah itokohi,+ ihina, ras iciduri.+
33 Kenca icambuk, ibunuh kalak e ia,+ tapi bas wari si peteluken keke pagi ia.”+
34 Amin pe bage, la angkai kalak e kerina e, sebap erti kata-kata e ibuniken arah kalak e nari.
35 Sanga Jesus nandangi seh i Jeriho, lit sekalak dilaki si pentang kundul janah mindo-mindo i tepi dalan.+
36 Perban begina jelma si enterem lewat, sungkunna kai si terjadi.
37 Nina kalak e man bana, “Jesus kalak Nasaret sangana lewat!”
38 Emaka nina alu sora megang, “O Jesus, Anak Daud, mekuah min atendu aku!”
39 Kalak si erdalan arah lebe ngerawai ia, suruhna ia sinik, tapi lalap reh gangna ia ngerana, “O Anak Daud, mekuah min atendu aku!”
40 Emaka ngadi Jesus janah suruhna gelah dilaki e ibaba man bana. Kenca ia ndeher, nungkun Jesus,
41 “Kai kin atendu si kulakoken man bandu?” Ngaloi ia, “O Tuan, ban min aku erpengidah mulihi.”
42 Emaka nina Jesus man bana, “Erpengidahlah kam, kinitekenndu enggo erban kam malem.”+
43 Mis ia banci erpengidah jenari mulai ikutkenna Jesus+ janah muliakenna Dibata. Kerina kalak si ngidah pe muji Dibata.+
