Lukas 20:1-47
20 Bas sada wari, sanga ngajar Jesus bas rumah pertoton ras beritakenna berita si meriah, reh imam-imam kepala, ahli-ahli Undang-Undang Musa, bage pe peminpin-peminpin
2 janah nina kalak e, “Kataken man kami, ja nari datndu kuasa ngelakoken kerina enda? Ise si mereken kuasa e man bandu?”+
3 Ngaloi Jesus, “Aku pe lit sada penungkunenku man kena. Kataken man bangku,
4 peridin Johanes e, surga nari ntah manusia nari?”
5 Kalak e pe mulai ngerana sada ras si debanna, nina, “Adi sikataken, ‘Surga nari,’ nina ka kari, ‘Engkai maka la kena tek man bana?’
6 Tapi adi sikataken, ‘Arah manusia nari,’ benteri kalak kari kita alu batu, sebap kalak e tek maka Johanes e sekalak nabi.”+
7 Emaka jawap kalak e maka la tehna ja nari rehna.
8 Nina Jesus ka, “Aku pe la kukataken man kena ja nari kudat kuasa ngelakoken enda kerina.”
9 Kenca si e ceritakenna perumpaman* enda man kalak e, “Sekalak dilaki erban kebun anggur,+ sewakenna man perjuma si deban. Lawes ia ku luar negri janah ndekah ia i je.+
10 Kenca seh waktuna rani, suruhna sekalak budakna ndahi perjuma e gelah bereken perjuma e deba buah kebun anggur e. Tapi pekpeki perjuma e ia jenari pelawesna, la bere kalak e babana kai pe.+
11 Suruhna ka budak si deban. Tapi pekpeki perjuma e ka ia janah banna ia mela,* jenari pelawesna, la bere kalak e babana kai pe.
12 Suruhna ka budak si peteluken. Enda pe lukai kalak e janah benterkenna ku darat.
13 Emaka nina si mpuna kebun e, ‘Kai si arus kulakoken? Kusuruhlah anakku si kukelengi.+ Tentu ergai kalak e pagi ia.’
14 Sanga idah perjuma e anak si mpuna kebun, arih-arih perjuma e, ‘Enda kap ahli warisna. Eta sibunuh ia, gelah man banta warisenna.’
15 Emaka benterken kalak e ia ku darat kebun anggur e janah bunuhna ia.+ Kai nge pagi si lakoken si mpuna kebun anggur man perjuma e?
16 Reh pagi ia janah bunuhna kerina perjuma e. Kenca si e berekenna kebun anggur e man si deban.”
Megi si e, nina kalak e, “Mbera ula terjadi bage!”
17 Tapi tatap Jesus kalak e janah nina, “Adi bage, kai ertina ayat enda, ‘Batu si tulak tukang bangunen, enggo jadi batu si utama’?+
18 Ise pe si ndabuh ku batu e pasti getem,+ janah ise pe si dabuhi batu e, hancur pagi.”
19 Sanga si e pe, usahaken ahli-ahli Undang-Undang Musa ras imam-imam kepala nangkap Jesus, sebap teh kalak e maka kalak e si cakapken Jesus bas perumpamanna.+ Tapi mbiar kalak e man jelma si enterem.
20 Emaka perdiateken kalak e Jesus alu megermet. Jenari suruhna piga-piga kalak si enggo galarina alu erbuni-buni gelah ban-banna jadi kalak si benar guna njebak Jesus alu rananna.+ Gelah banci serahkenna ia man pemerentah ras gubernur.
21 Nungkun kalak e man Jesus, nina, “O Guru, teh kami maka kai si katakenndu ras si ajarkenndu e benar, la kam erpilihen, janah ajarkenndu dalan Dibata menurut kebenaren.
22 Banci ntah lang sigalari pajak man Kaisar?”
23 Tapi teh Jesus taktik kalak e, emaka nina,
24 “Cidahken dage bangku sada dinar.* Gambar ras gelar ise enda?” Ijawap kalak e, “Kaisar.”
25 Nina man kalak e, “Adi bage, bereken man Kaisar kai si jadi bagin Kaisar,+ tapi man Dibata kai si jadi bagin Dibata.”+
26 La banci jebak kalak e Jesus alu rananna i lebe-lebe jelma si enterem. Emaka sinik kalak e perban takjup megi jawapenna.
27 Tapi piga-piga kalak Saduki si la tek maka lit kekeken,+ reh ndahi Jesus janah nungkun,+
28 “O Guru, tulisken Musa man kami, ‘Adi lit sekalak dilaki si mate janah tadingkenna diberuna tapi la lit anakna, senina si mate e arus ngempoi diberuna e guna mereken keturunen man seninana ndai.’+
29 Lit pitu kalak si ersenina. Sintua erjabu, dungna mate tapi la lit anakna.
30 Emaka si peduaken
31 ras si peteluken ngempoi diberu e. Bage me ngayak si pepituken. Kerina mate tapi la lit anakna.
32 Dungna diberu e pe mate.
33 Emaka, bas kekeken, diberu ise nge ia pagi? Sebap pituna enggo pernah ngempoi ia.”
34 Ngaloi Jesus, “Kalak bas jaman* enda erjabu ras ipejabu,
35 tapi kalak si iakap cocok guna ipekeke arah si mate nari janah ndatken kegeluhen bas jaman si nandangi reh, kalak e la erjabu ntah pe ipejabu.+
36 Situhuna, kalak e pe lanai banci mate, sebap kalak e bagi malekat-malekat, janah alu ipekeke, kalak e jadi anak-anak Dibata.
37 Tapi, kerna kekeken kalak mate, Musa sendiri si ngataken kerna si e bas kejadin i rambah duri, sanga lebuhna Jahwe* ‘Dibata Abraham, Dibata Isak, ras Dibata Jakup.’+
38 Ia labo Dibata kalak mate, tapi Dibata kalak si nggeluh. Sebap menurut Dibata, kerina kalak e nggeluh.”+
39 Nina piga-piga ahli Undang-Undang Musa, “Payo kel si katakenndu e, Guru.”
40 Sebap lanai kalak e pang nungkun kai pe man bana.
41 Kenca si e, nungkun Jesus man kalak e, “Engkai maka kataken kalak Kristus e anak Daud?+
42 Daud sendiri pe ngataken bas buku Masmur, ‘Nina Jahwe* man Tuanku, “Kundullah i sebelah kananKu
43 seh ngasa Kutamaken musuh-musuhndu i teruh nahendu.”’+
44 Adi igelari Daud ia Tuan, uga maka ia anakna?”
45 Jenari, sanga kerina kalak megiken Jesus, nina Jesus man murid-muridna,
46 “Hati-hatilah man ahli-ahli Undang-Undang Musa si meriah akapna erdalan ku jah ku je make jubah ras iperkuanken alu mehamat bas ingan si enterem jelma,* merhat ia kundul arah lebe* bas ingan-ingan pulung kalak Jahudi* bage pe bas ingan si mehamat i pesta-pesta.+
47 Rampokna rumah* janda-janda, janah gedang banna totona gelah idah kalak.* Dat kalak e pagi hukumen si terberaten.”*
Cataten i teruh
^ Ntah “anding-andingen.”
^ Ntah “janah hinana.”
^ Ntah “bas pajak.”
^ Ntah “kundul bas ingan si mehulina.”
^ Ntah “erta.”
^ Ntah “gelah nutupi kejahatenna.”
^ Ntah “terkeleken.”
