Lukas 23:1-56
23 Emaka lawes kalak e kerina maba Jesus ku Pilatus.+
2 Kenca si e tuduh kalak e ia,+ nina, “Dilaki enda enggo terdat nipu bangsa kami, larangna kami nggalar pajak man Kaisar,+ katakenna ka ia Kristus, sekalak raja.”+
3 Emaka sungkun Pilatus ia, “Kam kin Raja Kalak Jahudi?” Nina ngaloi, “Payo bagi si katakenndu ena.”+
4 Jenari nina Pilatus man imam-imam kepala ras jelma si enterem e, “La lit kudat kesalahen kai pe bas dilaki enda.”+
5 Tapi terus empetken kalak e, nina, “Ajuk-ajukna kalak si lit i belang-belang Judea alu pengajarenna. Tangtangna i Galilea, gundari enggo seh jenda.”
6 Megi si e nungkun Pilatus, “Kalak Galilea kin ia?”
7 Kenca tehna maka asalna bas daerah kekuasan Herodes nari,+ kirim Pilatus ia man Herodes, si sangana ka i Jerusalem.
8 Meriah kel ukur Herodes sanga idahna Jesus, sebap enggo ndekah kel ia merhat jumpa ras Jesus. Enggo melala si begina kerna ia+ janah arapkenna ngidah mukjizat si ibanna.
9 Emaka melala penungkunenna man Jesus, tapi la jawapna.+
10 Imam-imam kepala ras ahli-ahli Undang-Undang Musa mulih-ulih tedis janah merawa-rawa nuduh Jesus.
11 Kenca si e, hina Herodes ras prajurit-prajuritna Jesus.+ Nokoh Herodes man bana+ alu makeken baju si mehaga man bana, jenari kirimna ia mulihken ku Pilatus.
12 Mulai bas wari e, erteman Herodes ras Pilatus. Sebap ope si e kalak e ermusuhen.
13 Kenca si e pepulung Pilatus imam-imam kepala, penguasa-penguasa, ras jelma si enterem,
14 jenari nina, “Baba kena dilaki enda man bangku janah tuduh kena ia ngajuk-ngajuk kalak gelah mberontak. Enggo kupereksa ia i lebe-lebe kena, tapi la lit kudat salahna bagi si kataken kena.+
15 Herodes pe la datna salahna, emaka kirimna ia mulihken man kami. La lit kai pe si erban ia patut ihukum mate.
16 Emaka, kucambuk kari ia+ jenari kubebasken.”
17 * ——
18 Tapi serko jelma si enterem e, “Bunuh saja ia! Bebasken Barabas man kami!”+
19 (Barabas ipenjaraken perban munuh janah ikut bas pemberontaken i kota.)
20 Mulihi ngerana Pilatus man kalak e, sebap bebaskenna atena Jesus.+
21 Tapi, sekali nari serko kalak e, “Bunuh ia bas tiang!* Bunuh ia bas tiang!”*+
22 Ngerana Pilatus petelu kaliken, nina, “Engkai? Kejahaten kai kin si lakokenna? Kai pe la lit kudat si erban ia patut ihukum mate. Emaka, kucambuk kari ia jenari kubebasken.”
23 Tapi reh gangna iban kalak e sorana,+ ipaksa kalak e gelah ia ihukum mate.* Dungna menang kalak e.
24 Emaka iban Pilatus keputusen bagi si pindoken kalak e.
25 Bebaskenna dilaki si pindo kalak e, si ipenjaraken perban mberontak ras munuh. Tapi serahkenna Jesus guna ihukum mate, bagi si pindoken kalak e.
26 Baba kalak e Jesus lawes. Bas tengah dalan, tangkap kalak e Simon kalak Kireni si rehna arah kuta nari. Tama kalak e tiang siksan* Jesus i barana janah suruhna erdalan arah pudi Jesus.+
27 Enterem kel jelma ngikutken ia, termasuk piga-piga diberu si tangis, si mekpeki bana perban cedana atena.
28 Tulihken Jesus ku diberu-diberu e janah nina, “O diberu-diberu Jerusalem, ula nai tangisi kena aku. Tangisilah diri kena ras anak-anak kena.+
29 Reh pagi warina sanga kataken kalak, ‘Ermeriah ukur me diberu si mandul, si la pernah melahirken, ras si la pernah pepinemken!’*+
30 Kataken kalak e pagi man gunung-gunung, ‘Dabuhi min kami!’ ras man uruk-uruk, ‘Tamburi min kami!’+
31 Adi sanga meratah denga pe batang kayu e bage perbahanen kalak e, uga ka adi enggo kerah?”
32 Lit ka dua penjahat si ibaba ras ia guna ihukum mate.+
33 Seh kenca kalak e bas ingan si igelari Tengkorak,+ pakuken kalak e ia bas tiang* ras dua penjahat ndai, sada arah kananna, sada nari arah kirina.+
34 Tapi nina Jesus, “O Bapak, ampunilah kalak e, sebap la angkana kai si lakokenna.” Bagi-bagiken kalak e ka uisna alu undi.+
35 Tedis jelma si enterem ngenen-ngenenca. Tapi hina peminpin-peminpin ia, nina, “Kalak selamatkenna, adi Kristus kin ia, Kalak si Ipilih Dibata, pediatlah selamatkenna bana.”+
36 Gombangi prajurit-prajurit e ia. Deherina ia janah berekenna anggur si macem+
37 janah nina, “Adi Raja Kalak Jahudi kin kam, selamatken dage bandu.”
38 Lit ka tulisen i datasna, “Enda me Raja Kalak Jahudi.”+
39 Sekalak penjahat si ipakuken e mulai hinana Jesus,+ nina, “Kam me Kristus! Selamatken dage bandu ras kami!”
40 Tapi rawai penjahat si sada nari ia, nina, “La kin kam mbiar man Dibata? Seri kap hukumenndu ras ia.
41 Kita enggo patut ihukum. Hukumenta sebanding ras perbahanenta. Tapi dilaki enda la lit salahna.”
42 Kenca si e nina, “O Jesus, inget min aku sanga kam masuk ku Kerajanndu.”+
43 Ngaloi Jesus, “Situhuna kukataken man bandu wari enda: Kam ras aku i Pardis pagi.”+
44 Sanga si e, kira-kira jam 12 ciger,* tapi kerina daerah e jadi gelap seh ngasa jam 3 karaben,*+
45 perban matawari la ersinar. Tirai bas ingan si badia pe+ merigat jadi dua.+
46 Emaka erlebuh Jesus alu sora si megang nina, “O Bapak, kubereken geluhku ku tanNdu.”+ Kenca bage nina, mate ia.+
47 Sanga idah sekalak perwira kai si terjadi, muliakenna Dibata janah nina, “Dilaki enda tuhu-tuhu la ersalah.”+
48 Kenca idah kalak si pulung e kai si terjadi, mulih kalak e ku rumah janah pekpekina bana.
49 Kerina kalak si nandai ia tedis dauh-dauh nari. Diberu-diberu si ikut ras ia arah Galilea nari pe ngidah kerina si terjadi.+
50 I je lit sekalak anggota Pengadilen Agama Jahudi,* gelarna Jusup. Ia kalak si bujur ras benar.+
51 (Dilaki enda la setuju man rencana ras perbahanen Pengadilen Agama e.) Asalna i kota Arimatea, i Judea nari. Ia sangana nimai Kerajan Dibata.
52 Lawes ia ngadap man Pilatus janah pindona mayat Jesus.
53 Kenca penusurna mayat Jesus,+ balutina alu uis linen halus jenari amparkenna bas kuburen si enggo ikurak i uruk batu,+ si lenga pernah ipake.
54 Wari e eme wari Persikapen+ janah Sabat+ nandangi imulai.
55 Diberu-diberu si reh ras Jesus i Galilea nari pe ngikutken Jusup guna ngenen kuburen e ras uga mayat Jesus iamparken.+
56 Kenca si e, mulih kalak e nikapken rempah-rempah ras minak wangi. Tapi bas wari Sabat kalak e la erdahin+ bagi si perentahken Undang-Undang Musa.
Cataten i teruh
^ Ntah “kayu.”
^ Ntah “Pakuken ia i tiang! Pakuken ia i tiang!”
^ Ntah “gelah ipakuken i tiang.”
^ Ntah “mere ASI!”
^ Ntah “kayu.”
^ Bas jaman Jesus, enda jam si peenemken. Perhitungen waktu e imulai sanga terbit matawari.
^ Bas jaman Jesus, enda jam si pesiwahken. Perhitungen waktu e imulai sanga terbit matawari.
^ As. “anggota Sanhedrin.”
