Lukas 24:1-53
24 Pagi-pagi si lampas bas wari pertama minggu e, lawes kalak e ku kuburen maba rempah-rempah si enggo sikapkenna.+
2 Tapi dapeti kalak e batu si nutupi kuburen e enggo igulingken.+
3 Sanga masuk kalak e, lanai lit mayat Tuan Jesus i je.+
4 Sanga mamang denga ate kalak e, rempet lit dua dilaki si ersinar uisna tedis i deher kalak e.
5 Mbiar kel diberu-diberu e janah terus kalak e nungkuk, emaka ngerana dua dilaki ndai nina, “Engkai maka darami kena kalak si nggeluh i tengah-tengah kalak mate?+
6 La ia i jenda, tapi enggo ipekeke. Ingetlah kai si katakenna man kena sanga ia i Galilea denga,
7 maka Anak manusia arus iserahken ku tan kalak perdosa janah ibunuh bas tiang* jenari keke bas wari si peteluken.”+
8 Inget kalak e me kata-katana e.+
9 Emaka mulih kalak e arah kuburen nari janah ceritakenna kerina si terjadi man 11 rasul bage pe man kerina murid.+
10 Si ngatakenca man rasul-rasul e eme Maria Magdalena, Johana, Maria mamak Jakup, ras diberu-diberu si deban si ikut ras kalak e.
11 Tapi rasul-rasul ras murid-murid si deban la tek man kai si kataken diberu-diberu e perban la akapna masuk akal.
12 Tapi mis kiam Petrus ku kuburen, janah sanga nenna ku bas janahna nungkuk, uis linen ngenca idahna i je. Emaka lawes ia janah tersungkun-sungkun ia kai si enggo terjadi.
13 Bas wari e, lit dua kalak murid si sangana lawes ku kuta Emaus, dauhna kira-kira 11 kilometer* Jerusalem nari.
14 Kalak e sangana ercakap-cakap kerna kerina si enggo terjadi.
15 Sanga cakapken kalak e kerna si e, reh Jesus ndeheri kalak e janah erdalan ia ras.
16 Idah kalak e nge Jesus, tapi la tandaina.+
17 Nina Jesus man kalak e, “Kai si sangana cakapken kena e?” Ngadi kalak e janah teridah kalak e sangana sedih.
18 Sekalak arah kalak e gelarna Keleopas, nina man Jesus, “Kalak pertandang nge kam i Jerusalem enda maka la tehndu kai si terjadi piga-piga wari enda?”
19 Nungkun Jesus, “Kai kin?” Ngaloi kalak e, “Kerna Jesus kalak Nasaret.+ Ia sekalak nabi, kata-katana ras perbahanenna dem kuasa i lebe-lebe Dibata bage pe i lebe-lebe kerina kalak.+
20 Imam-imam kepala ras penguasa-penguasa kami nyerahken ia guna ihukum mate,+ janah pakuken kalak e ia bas tiang.*
21 Padahal arapken kami ia si mbebasken Israel.+ Selain si e, gundari me wari si peteluken kenca kerina e terjadi.
22 Lit ka piga-piga teman kami si diberu si erban kami sengget. Ndai pagi-pagi si lampas, lawes kalak e ku kuburen,+
23 tapi la dapetina mayat Jesus. Ceritakenna ka maka idahna malekat-malekat si ngataken Jesus enggo nggeluh.
24 Emaka, piga-piga arah kami lawes ku kuburen+ janah dapeti kalak e tuhu bagi si kataken diberu-diberu ndai, tapi kalak e la jumpa ras Jesus.”
25 Jenari nina Jesus man si dua kalak e, “O kalak si la nggit rukur, mesera kel kena tek man kai si kataken nabi-nabi!
26 La kin arus nanami Kristus kiniseran+ gelah ia imuliaken?”+
27 Jenari mulai ceritakenna kerina kerna dirina si itulis bas Kitap si Badia, mulai tulisen Musa ras kerina Ajaren Nabi-Nabi.+
28 Kenca seh kalak e i kuta si man dahin kalak e, tempa-tempa terusken Jesus atena perdalanenna.
29 Tapi mindo kel kalak e man bana, nina, “I jendalah kita, sebap wari enggo ben ras nandangi gelap.” Emaka masuk ia ku rumah e janah tading ia ras kalak e.
30 Sanga ia man ras kalak e, buatna roti, totokenna, cepik-cepikkenna, ras bagikenna man kalak e.+
31 Sanga si e, teh kalak e janah itandaina Jesus. Tapi rempet lanai idah kalak e ia.+
32 Nina si dua kalak e sada ras si debanna, “Balosam malem kel ateta ngerana ras ia bas dalan ndai sanga jelaskenna Kitap si Badia man banta!”
33 Emaka mis kalak e mulih ku Jerusalem, dapetina 11 rasul ras murid-murid si deban pulung i je,
34 si ngataken, “Tuhu-tuhu Tuan enggo ipekeke janah cidahkenna bana man Simon!”+
35 Jenari ceritaken si dua kalak ndai kerna kai si terjadi bas dalan janah uga kalak e nandai Jesus sanga cepik-cepikkenna roti.+
36 Sanga cakapken kalak e kerna si e, rempet lit Jesus tedis i tengah-tengah kalak e janah nina, “Mbera-mbera lit kedamen bas kena.”+
37 Tapi perban sengget janah mbiar kalak e, akap kalak e si idahna e mahluk roh.
38 Emaka nina man kalak e, “Engkai maka kena mbiar? Engkai maka kena ragu?
39 Enda aku, nenlah tan ras naheku. Dadap aku janah nen, mahluk roh la lit daging ras tulanna, tapi aku lit daging ras tulanku bagi si idah kena.”
40 Sanga ia ngerana, cidahkenna tanna ras nahena man kalak e.
41 Tapi lenga kalak e tek perban riahna akapna janah mamang denga atena. Emaka sungkun Jesus kalak e, “Lit pangan kena?”
42 Bereken kalak e sada potong ikan si enggo ipanggang.
43 Buat Jesus janah panna i lebe-lebe kalak e.
44 Jenari nina Jesus man kalak e, “Sanga aku ras kena denga pernah kukataken+ maka kerina si tertulis bas Undang-Undang Musa, Ajaren Nabi-Nabi, ras Masmur arus terjadi.”+
45 Emaka bukana perukuren kalak e gelah tuhu-tuhu angka kalak e erti Kitap si Badia.+
46 Nina ka, “Lit tertulis maka nanami Kristus pagi kiniseran janah ipekeke arah si mate nari bas wari si peteluken,+
47 janah bas gelarna berita kerna pertobaten guna pengampunen dosa,+ iberitaken pagi man kerina bangsa+ mulai Jerusalem nari.+
48 Kena me si jadi saksi kerina enda.+
49 Kubereken pagi man kena kai si enggo janjiken Bapakku. Tapi arus timai kena bas kota enda seh ngasa aloken kena kuasa arah surga nari.”+
50 Jenari babai Jesus kalak e ku Betani. I je angkatna tanna janah pasu-pasuna kalak e.
51 Sanga pasu-pasuna kalak e, terangkat ia ku surga janah tadingkenna kalak e.+
52 Sujud kalak e man bana janah mulih kalak e ku Jerusalem alu dem keriahen ukur.+
53 Tiap wari, puji kalak e Dibata bas rumah pertoton.+
