Lukas 4:1-44
4 Jenari, Jesus si dem alu kesah si badia, lawes arah Lau Jordan nari. Kenca si e babai kesah Dibata ia i taneh si mesawang*+
2 lit 40 wari dekahna. I je cubai Iblis ia.+ Kai pe la lit ipanna, kenca dung wari-wari e melihe ia.
3 Emaka nina Iblis man bana, “Adi anak Dibata kin kam, suruh dage batu enda jadi roti.”
4 Tapi ngaloi Jesus, “Lit tertulis, ‘Labo arah roti saja manusia nggeluh.’”+
5 Emaka baba Iblis ia ku ingan si meganjang. Alu sengkemirep mata cidahkenna man Jesus kerina kerajan doni.+
6 Jenari nina Iblis, “Kubereken kari kerina kuasa enda ras kerina kemulianna man bandu. Banci kubereken man ise pe ateku,+ perban enda kerina bas kuasaku.
7 Emaka, adi sembahndu aku sekali saja, kerina enda jadi jangndu.”
8 Ngaloi Jesus, “Lit tertulis, ‘Jahwe* Dibatandu si arus isembahndu, man baNa saja ngenca kam arus mereken pelayanen si badia.’”+
9 Kenca si e, babana Jesus ku Jerusalem ku ingan si meganjangna bas tembok rumah pertoton janah nina man bana, “Adi anak Dibata kin kam, dabuhken dage bandu jenda nari,+
10 sebap lit tertulis, ‘SuruhNa pagi malekat-malekatNa njagai kam,’
11 janah, ‘Tatangna pagi kam bas tanna, alu bage nahendu la banci terantuk ku batu.’”+
12 Nina Jesus man bana, “Lit tertulis, ‘Ula cubaindu Jahwe* Dibatandu.’”+
13 Emaka, kenca dung cubaina Jesus, lawes Iblis janah timaina lit kesempaten si cocok.+
14 Jesus si dem alu kesah si badia mulih ku Galilea.+ Terbegi berita si mehuli kerna ia ku kerina daerah e.
15 Mulai ka ia ngajar bas ingan-ingan pulung kalak Jahudi* si lit i je, janah kerina kalak mehamat man bana.
16 Jenari lawes ia ku Nasaret,+ ingan ia ipebelin, bagi kebiasanna bas wari Sabat, masuk ia ku ingan pulung kalak Jahudi.+ Sanga tedis ia guna mbaca,
17 ibereken man bana gulungen kitap Nabi Jesaya, jenari bukana gulungen e janah datna i je lit tertulis:
18 “Kesah Jahwe* lit bas aku, perban pilihNa aku guna mberitaken berita si meriah man kalak si mesera. SuruhNa aku mberitaken kebebasen man kalak si itaban, erban kalak pentang erpengidah, mbebasken kalak si itindas,+
19 ras mpebetehken kerna waktuna ipasu-pasu Jahwe* pagi kalak e mulihi.”+
20 Jenari gulungna gulungen e, ulihkenna man petugas, kenca si e kundul ia. Kerina kalak si lit bas ingan pulung kalak Jahudi e natap ia.
21 Jenari nina man kalak e, “Wari enda enggo terjadi ayat si begi kena ndai.”+
22 Kerina kalak e mulai muji-muji ia janah jengang kalak e megi kata-katana si mehuli, si ndarat arah babahna nari,+ janah nina kalak e, “La kin ia anak Jusup?”+
23 Ngaloi Jesus, “Pasti kataken kena man bangku, ‘O dokter, pepalemlah bandu. Lakoken ka i jenda, i kutandu, bagi si enggo begi kami kerna kai si lakokenndu i Kapernaum.’”+
24 Nina Jesus ka, “Situhuna kukataken man kena, la lit nabi si ialoken bas kutana.+
25 Contohna, sanga jaman Elia, la reh udan telu tahun enem bulan janah terjadi kelihen si mbelin bas kerina negri e.+ Amin pe enterem diberu si janda bas Israel,
26 Elia la isuruh ndahi ise pe bas kalak e nari, tapi isuruh ia ndahi sekalak diberu si janda si tading i Sarpat i taneh Sidon ngenca.+
27 Sanga jaman Nabi Elisa, lit ka enterem kalak si sakit kusta bas Israel. Tapi sada pe la pepalemna selain Naaman kalak Siria.”+
28 Megi si e, merawa kel kerina kalak si lit bas ingan pulung kalak Jahudi e,+
29 tedis kalak e jenari babana ia ku darat kota kalak e, si lit i datas gunung. Babana ia ku tepi embang gelah idabuhken ia je nari.
30 Tapi lawes ia i tengah-tengah kalak e nari janah teruskenna perdalanenna.+
31 Lawes ia ku Kapernaum, sada kota i Galilea. I je ajarina kalak bas wari Sabat,+
32 jengang kalak e man carana ngajar,+ perban ia ngerana selaku kalak si lit kuasana.
33 Bas ingan pulung kalak Jahudi lit sekalak dilaki si irasuki malekat jahat, serko ia alu sora si megang,+
34 “O Jesus kalak Nasaret, kai urusenndu ras kami?+ Kernepkenndu kin atendu kami? Kuteh nge ise kam situhuna, Si Badia bas Dibata nari.”+
35 Tapi sergang Jesus ia, “Sinikken! Ndaratlah arah ia nari.” Emaka kenca dampeskenna dilaki e ku tengah-tengah jelma si enterem, ndarat malekat jahat e arah ia nari janah la sakitina ia.
36 Emaka jengang kerina kalak e, janah nina man sada ras si debanna, “Kata-kata si uga kin enda? Alu wewenang ras kuasa perentahkenna malekat jahat e ndarat, janah ndarat malekat jahat e!”
37 Emaka berita kerna ia terus terbegi ku sekeliling kota e.
38 Kenca tadingkenna ingan pulung kalak Jahudi, lawes ia ku rumah Simon. Paksa si e mami Simon tinggi kel demamna, emaka pindo kalak e gelah sampati Jesus ia.+
39 Tedis Jesus i sampingna jenari pepalemna demamna e, emaka lanai ia demam. Mis tedis ia janah sikapkenna pangan man kalak e.
40 Sanga terbenam matawari, ibaba man Jesus kerina kalak si erbage-bage penakitna. Tamaken Jesus tanna ku datas kalak e sekalak-sekalak janah pepalemna kalak e.+
41 Malekat-malekat jahat pe ndarat arah enterem jelma, serko ia, “Kam kap Anak Dibata.”+ Tapi sergang Jesus ia janah larangna ngerana,+ sebap teh malekat-malekat jahat e ia Kristus.+
42 Sanga terbit matawari, berkat ia ku ingan si melungen.+ Tapi darami jelma si enterem ia. Kenca jumpa, usahaken kalak e gelah Jesus la lawes arah kalak e nari.
43 Tapi nina man kalak e, “Arus ka kuberitaken berita si meriah kerna Kerajan Dibata ku kota-kota si deban, sebap aku isuruh guna si e.”+
44 Emaka lawes ia erberita bas ingan-ingan pulung kalak Jahudi i Judea.
Cataten i teruh
^ Taneh si mbelang si jarang iingani.
