Lukas 6:1-49
-
Jesus, “Tuan man wari Sabat” (1-5)
-
Dilaki si sembelah tanna lumpuh ipepalem (6-11)
-
Si 12 rasul (12-16)
-
Jesus ngajar ras mpepalem (17-19)
-
Keriahen ukur ras cilaka (20-26)
-
Engkelengi musuh (27-36)
-
Ula nai ngakimi (37-42)
-
Itandai arah buahna (43-45)
-
Rumah si ibangun alu mehuli; rumah si la lit pondasina (46-49)
6 Sanga wari Sabat, erdalan Jesus ngelewati perjuman gandum, putikken murid-muridna gandum e,+ piuna alu tanna jenari panna.+
2 Emaka nina piga-piga kalak Parisi, “Engkai maka lakoken kena kai si ilarang bas wari Sabat?”+
3 Tapi nina Jesus, “Lenga kin pernah baca kena kerna kai si lakoken Daud sanga melihe ia ras anak buahna?+
4 Masuk ia ku rumah Dibata, alokenna roti persembahen jenari panna janah berekenna man anak buahna, si arusna ise pe la banci manca selain imam-imam.”+
5 Kenca si e nina Jesus, “Anak manusia kap Tuan man wari Sabat.”+
6 Bas wari Sabat si deban,+ masuk ia ku ingan pulung kalak Jahudi* janah mulai ia ngajar. I je lit sekalak dilaki si lumpuh tan kananna.+
7 Ahli-ahli Undang-Undang Musa ras kalak Parisi ndarami alasen guna nuduh Jesus, emaka perdiateken kalak e kel ia guna ngenen pepalemna nge kari kalak ntah lang bas wari Sabat.
8 Tapi perban teh Jesus perukuren kalak e,+ nina man kalak si tanna lumpuh ndai, “Tedisken, mari ku tengah.” Keke ia janah tedis ia i je.
9 Kenca si e, nina Jesus man kalak e, “Nungkun ateku, si apai kin si banci ilakoken bas wari Sabat: si mehuli ntah si jahat, nelamatken kegeluhen ntah engkernepkenca?”+
10 Kenca tatapna kerina kalak e, nina man dilaki e, “Pepinter tanndu.” Emaka pepinterna janah malem tanna e.
11 Tapi merawa kel kalak e janah mulai arih-arih kalak e kerna kai si banci lakokenna man Jesus.
12 Bas sada wari, lawes ia ertoto ku gunung.+ I je sada berngin ia ertoto man Dibata.+
13 Kenca terang wari, lebuhna murid-muridna janah pilihna 12 kalak arah kalak e nari, si gelarina ka rasul-rasul:+
14 Simon si gelarina ka Petrus, Andreas seninana, Jakup, Johanes, Pilipus,+ Bartolomeus,
15 Matius, Tomas,+ Jakup anak Alpeus, Simon si igelari “kalak si semangat,”
16 Judas anak Jakup, ras Judas Iskariot si jadi penghianat.
17 Jenari, nusur Jesus ras kalak e janah tedis bas ingan si rata. I je enterem kel murid-muridna, enterem ka kalak si reh arah belang-belang Judea ras Jerusalem bage pe arah daerah pantai Tirus ras Sidon nari. Kalak e reh guna megiken Jesus ras gelah ipepalem penakitna.
18 Kalak si iganggu malekat jahat pe ipepalem.
19 Usahaken kalak e kerina ndadap Jesus, perban lit kuasa si ndarat arah ia nari+ si erban kerina kalak e malem.
20 Tatapna murid-muridna janah nina,
“Ermeriah ukurlah kena si mesera,* sebap man kena pagi Kerajan Dibata.+
21 “Ermeriah ukurlah kena si melihe gundari, sebap ibesuri kena pagi.+
“Ermeriah ukurlah kena si ngandung gundari, sebap tawa kena pagi.+
22 “Ermeriah ukurlah kena adi segat ate kalak kena,+ tulakna kena,+ hinana kena, janah katakenna kena jahat perban Anak manusia.
23 Sebap bage ka nge nai si lakoken nini bulang kalak e man nabi-nabi. Ermeriah ukurlah bas wari e janah lompat-lompatlah ban riahna sebap upah kena mbelin i surga.+
24 “Tapi cilaka me kena si bayak,+ sebap enggo aloken kena kerina pengapul.+
25 “Cilaka me kena si besur gundari, sebap melihe kena pagi.
“Cilaka me kena si tawa gundari, sebap erceda ate ras tangis kena pagi.+
26 “Cilaka me kena adi kerina kalak ngataken si mehuli kerna kena,+ sebap bage ka nge nai si lakoken nini bulang kalak e man nabi-nabi palsu.
27 “Tapi kukataken man kena si megiken: Teruslah kelengi musuh-musuh kena, mehulilah kena man kalak si rate segat man kena,+
28 pasu-pasulah kalak si numpahi kena, totokenlah kalak si hinana kena.+
29 Adi parap kalak sembelah ayondu, bereken ka si sembelah nari. Adi buat kalak uisndu si arah darat, bereken ka uisndu si arah bas.+
30 Ise pe si mindo man bandu, berekenlah.+ Adi buat kalak barangndu, ula pindo ulihkenna.
31 “Selain si e, kai si ate kena lakoken kalak man kena, lakoken ka si bage man bana.+
32 “Adi kalak si engkelengi kena ngenca kelengi kena, kai kelebihen kena? Sebap kalak perdosa pe kelengina kalak si engkelengi ia.+
33 Adi man kalak si mehuli ngenca kena mehuli, kai kelebihen kena? Kalak perdosa pe bage ka nge.
34 Selain si e, adi bereken kena pinjamen* man kalak si akap kena banci nggalarisa, kai kelebihen kena?+ Kalak perdosa pe mereken pinjamen man kalak perdosa gelah alokenna ka mulihi asa si berekenna.
35 Tapi, teruslah kelengi musuh-musuh kena, lakokenlah si mehuli, berekenlah pinjamen alu la ngarapken mulihi.+ Emaka mbelin upah kena janah kena jadi anak-anak Dibata Si Meganjangna, sebap mehuli Ia man kalak si la meteh ngata bujur ras kalak jahat.+
36 Teruslah rate mekuah, bagi Bapak kena pe rate mekuah.+
37 “Selain si e, ula nai kena ngakimi gelah kena pe la ihakimi.+ Ula nai salahken kena kalak gelah kena pe la isalahken. Teruslah ngampuni gelah kena pe iampuni.+
38 Teruslah mere, maka kena pe ibere.+ Tungtungken kalak pagi ku kantong jubah kena alu sukaten si mehuli, si ipadatken, iugur-ugur seh mambur. Sebap uga perbahanen kena man kalak si deban, bage ka nge pagi perbahanenna man kena.”*
39 Kenca si e ceritakenna ka sada perumpaman:* “Me labo banci kalak pentang negu-negu kalak pentang? Me duana kari ia ndabuh ku lubang?+
40 Labo ganjangen sekalak murid asangken guruna, tapi kerina kalak si iajari alu sempurna banci bagi guruna.
41 Emaka, engkai maka idahndu rintep* bas mata seninandu tapi la idahndu balok bas matandu?+
42 Uga maka banci katakenndu man seninandu, ‘O Senina, pediat kupedarat rintep arah matandu,’ padahal balok bas matandu pe la idahndu? O kalak si munapik! Pedarat lebe balok arah matandu, kenca si e maka banci kam ngidah alu jelas guna mpedarat rintep arah mata seninandu.
43 “Sebap la lit batang kayu si mejile si ngasilken buah si macik, janah la lit batang kayu si macik si ngasilken buah si mejile.+
44 Sebap tiap batang kayu itandai arah buahna.+ Contohna, labo pepulung kalak buah ara arah sinuan-sinuan si erduri, bage ka pe labo putikken kalak buah anggur arah peren duri.
45 Kalak si mehuli mpedarat kai si mehuli si lit bas pusuhna, tapi kalak jahat mpedarat kai si jahat si lit bas pusuhna. Sebap kai si ndarat arah babah rehna arah pusuh nari.+
46 “Adi bage, engkai maka lebuh kena aku ‘Tuan! Tuan!’ tapi la lakoken kena si kukataken?+
47 Bagenda me kalak si reh man bangku janah megiken kata-kataku ras ndalankenca:+
48 Ia bagi kalak si mbangun rumah. Mbages kurakna taneh seh ngasa jumpa batu, i je banna pondasina. Emaka, sanga reh banjir janah entam lau si mbelin rumah e, rumah e la mugur-ugur sebap paguh ibangun.+
49 Sebalikna ise pe si megi tapi la ngelakoken kai pe,+ ia bagi kalak si mbangun rumah i datas taneh tapi la lit pondasina. Sanga entam lau si mbelin rumah e, mis sontar janah seh kel cedana.”
Cataten i teruh
^ Ntah “musil.”
^ Maksudna, pinjamen si la erbunga.
^ Ntah “uga sukaten si igunaken kena nukati, alu e ka nge kari isukatken man kena.”
^ Ntah “anding-andingen.”
^ Ntah “kai pe si kitik kel.”
