Lukas 8:1-56
-
Diberu-diberu si nemani Jesus (1-3)
-
Perumpaman kerna kalak si ngambur benih (4-8)
-
Engkai maka pake Jesus perumpaman (9, 10)
-
Penjelasen kerna perumpaman kalak si ngambur benih (11-15)
-
Lampu labo guna itutupi (16-18)
-
Mamak Jesus ras senina-senina Jesus (19-21)
-
Ban Jesus badai jadi tenang (22-25)
-
Suruh Jesus malekat jahat masuk ku babi-babi (26-39)
-
Anak Jairus; sekalak diberu si ndadap ujung uis Jesus si arah darat (40-56)
8 La ndekah kenca si e, lawes Jesus arah kota ku kota bage pe arah kuta ku kuta, beritakenna berita si meriah kerna Kerajan Dibata.+ Janah 12 rasul ras ia,
2 bage ka pe piga-piga diberu si enggo ibebasken arah malekat-malekat jahat nari ras si ipepalem arah penakit, eme Maria si igelari Magdalena, si enggo ibebasken arah pitu malekat jahat,
3 Johana+ diberu pengawas istana Herodes si gelarna Kusa, bage pe Susanna ras enterem diberu si debanna. Kerina diberu e ngelayani Jesus ras rasul-rasulna alu erta-ertana.+
4 Sanga enggo pulung kalak si seh kel teremna ras kalak si reh ndahi Jesus arah erbage kota, ngerana Jesus alu nggunaken perumpaman* enda:+
5 “Lit sekalak perjuma lawes guna ngambur benih. Sanga amburkenna benih e, lit si ndabuh i tepi dalan emaka perjaki kalak, jenari reh perik-perik manganisa ngasa keri.+
6 Deba ndabuh i datas batu, kenca turah, kerah ia perban la datna lau.+
7 Lit ka benih si ndabuh ku tengah peren duri, sanga reh galangna peren duri e talu banna sinuan-sinuan e.+
8 Tapi lit ka benih si ndabuh ku taneh si subur, kenca turah, hasilkenna buah 100 kali lipat.”+ Sanga katakenna kerna si e, nina ka, “Ise pe si ercuping, begikenlah.”+
9 Tapi nungkun murid-muridna kerna erti perumpaman e.+
10 Ngaloi ia, “Man kena enggo ibereken kengasupen guna ngangkai rahasia si badia kerna Kerajan Dibata, tapi kalak si deban megiken perumpaman e ngenca,+ alu bage amin pe nenna tapi tetap la idahna, amin pe begina tapi la angkana.+
11 Enda me erti perumpaman ndai: Benih e eme kata Dibata.+
12 Si ndabuh i tepi dalan eme kalak si megi kata e. Kenca si e reh Iblis, buatna kata Dibata e bas pusuh kalak e nari gelah lanai ia tek janah la iselamatken.+
13 Si ndabuh i datas batu eme kalak si megi kata e, alokenna alu meriah ukur, tapi la rurat. Ntisik ngenca ia tek, tapi sanga lit percuban, ndabuh ia.+
14 Si ndabuh i tengah-tengah peren duri eme kalak si enggo megi kata e, tapi ia ipengaruhi kekuatiren, kebayaken,+ ras kesenangen nggeluh.+ Kerina si e nindihi kata e, dungna la mejile buahna.+
15 Si ndabuh bas taneh si subur eme kalak si kenca begina kata e alu pusuh si bujur ras mehuli,+ simpanna bas pusuhna ras megenggeng ia janahna erbuah.+
16 “Labo ise pe si mpegara lampu, dung e tutupina alu kudin ntah pe tamana i teruh ingan medem, tapi tamana bas ingan lampu gelah ise pe si reh ku je banci ngidah terang e.+
17 Sebap kerina si terbuni teridah nge pagi, ras kerina si tertutup alu rapat terbuka nge pagi janah tereteh.+
18 Emaka perdiatekenlah cara kena megiken, sebap ise pe si lit bas ia ibereken pagi terbuen,+ tapi ise pe si la lit bas ia, si akapna lit bas ia e pe ibuat ka arah ia nari.”+
19 Mamak Jesus ras senina-senina Jesus+ reh ndahi ia, tapi la banci deheri kalak e ia perban enterem kel jelma.+
20 Emaka lit si ngataken man bana, “Mamakndu ras senina-seninandu sangana tedis i darat, jumpa atena ras kam.”
21 Nina Jesus ngaloi, “Mamakku ras senina-seninaku eme kalak enda, si megiken kata Dibata ras si ngelakokenca.”+
22 Bas sada wari, nangkihi Jesus ras murid-muridna sada perahu, janah nina man kalak e, “Ota kita lawes ku sebrang.” Emaka lawes kalak e.+
23 Tapi sanga erlayar denga kalak e, terpedem Jesus. Kenca si e reh badai bas danau e, emaka mulai masuk lau ku perahu e janah nandangi gedap kalak e.+
24 Emaka medaki kalak e ia, nina, “Guru, Guru, enggo mate atena kita!” Medak ia janah sergangna angin ras lau si ergelombang e. Ngadi me angin e, dungna tenang.+
25 Jenari nina man kalak e, “I ja kiniteken kena?” Tapi mbiar kel kalak e janah mamang kel atena, nina sada ras si debanna, “Ise kin situhuna ia? Angin ras lau pe patuh man bana.”+
26 Jenari seh kalak e bas pantai i daerah kalak Gerasa,+ i sebrang Galilea.
27 Seh kenca Jesus i daraten, reh sekalak dilaki si rasuki malekat jahat arah kota e ndahi ia. Enggo ndekah ia la erbaju, janah la ia tading i rumah tapi i kuburen-kuburen.+
28 Sanga idahna Jesus, serko ia janah sujud i lebe-lebena, jenari alu sora si megang, nina, “O Jesus, Anak Dibata Si Meganjangna, kai kin atendu? Mindo kel aku, ula siksandu aku.”+
29 (Sebap enggo suruh Jesus malekat jahat e ndarat arah dilaki e nari. Enggo rusur* rasukina ia+ janah enggo rusur tan ras nahena iiket alu rante ras ijagai, tapi retapkenna e janah babai malekat jahat e ia ku ingan-ingan si melungen.)
30 Nungkun Jesus man bana, “Ise gelarndu?” Nina, “Legiun,”* sebap dilaki e enggo rasuki enterem malekat jahat.
31 Lalap pindo malekat-malekat jahat e man Jesus gelah ula ia isuruh masuk ku lubang si seh kel bagesna.*+
32 Paksa si e, lit sada rarasen babi+ si sangana man i gunung. Emaka pindo kalak e kel man bana gelah ipediat ia masuk ku babi-babi e, janah pediat Jesus.+
33 Emaka ndarat malekat-malekat jahat e arah dilaki e nari, janah masuk ia ku babi-babi e. Kiamen kerina babi e ku tebing janah ndabuhen ku danau, dungna gedap kerinana.
34 Tapi sanga permakan-permakan babi e ngidah kai si terjadi, kiam kalak e janah ceritakenna kerna si e i kota ras daerah i sekelilingna.
35 Emaka lawes kalak ngenen kai si terjadi. Dahi kalak e Jesus janah dapetina dilaki si kerasuken ndai enggo ruis ras enggo jore ukurna, kundul i deher nahe Jesus, emaka mbiar kel kalak e.
36 Ceritaken kalak si ngidah kejadin e man kalak si reh kerna uga kalak si kerasuken ndai ipepalem.
37 Jenari enterem jelma bas daerah kalak Gerasa mindo man Jesus gelah lawes ia arah kalak e nari, sebap seh kel biarna kalak e. Emaka lawes ia nangkih perahu.
38 Mindo kel dilaki si kerasuken ndai gelah banci ia lalap ras Jesus, tapi suruhna dilaki e lawes, nina,+
39 “Mulihlah, teruslah turiken kai si enggo lakoken Dibata man bandu.” Emaka lawes ia, ceritakenna ku belang-belang kota e kai si enggo lakoken Jesus man bana.
40 Sanga mulih Jesus ku Galilea, alo-alo jelma si enterem ia alu mehuli, sebap tertima-tima kerina kalak e.+
41 Reh me sekalak dilaki si gelarna Jairus. Ia kepala ingan pulung kalak Jahudi.* Sujud ia bas nahe Jesus janah mindo kel ia gelah reh Jesus ku rumahna,+
42 sebap anakna si diberu si umurna kira-kira 12 tahun menam mate. E ngenca anakna.
Sanga Jesus erdalan, siasak-asaken jelma si enterem e ku ia.
43 I je lit sekalak diberu si enggo 12 tahun pendarahen,+ janah lenga lit si ngasup mpepalem ia.+
44 Deherina Jesus pudi nari janah dadapna ujung uisna si arah darat,+ jenari rempet ngadi pendarahenna ndai.
45 Emaka nungkun Jesus, “Ise si ndadap aku?” Sanga la lit si ngaku, ngerana Petrus, “O Guru, enterem kel jelma i sekelilingndu janah siasak-asaken ku kam.”+
46 Tapi nina Jesus, “Lit si ndadap aku, sebap kugejapken ndarat kuasa+ arah aku nari.”
47 Perban tereteh, nggirgir diberu e janah sujud ia ku lebe-lebe Jesus. Katakenna i lebe-lebe kerina kalak engkai maka dadapna Jesus janah uga ia mis malem.
48 Tapi nina Jesus man diberu e, “O Nakku, kinitekenndu enggo erban kam malem. Laweslah alu dame.”+
49 Sanga Jesus ngerana denga, reh sekalak utusen arah rumah Jairus nari, nina, “Anakndu enggo mate. Ula padah latih banndu Guru ena.”+
50 Megi si e, nina Jesus man Jairus, “Ula mbiar, erkiniteken sajalah, nggeluh* nge kari anakndu e.”+
51 Sanga seh ia i rumah e, la pediatna ise pe masuk ras ia selain Petrus, Johanes, Jakup, bage pe bapak ras mamak anak e.
52 Tapi kerina kalak ngandung ras mekpeki bana perban erceda ate. Emaka nina, “Ula nai kena ngandung,+ sebap ia labo mate tapi medem saja nge ia.”+
53 Perban si e, tawai kalak e Jesus sebap iteh kalak e maka anak e enggo mate.
54 Tapi jemakna tan anak e janah lebuhna ia, “O Nakku, medakken!”+
55 Emaka mulihken kesahna,+ janah mis ia keke.+ Perentahken Jesus gelah ia ibere man.
56 Meriah kel ukur orang tuana, tapi perentahken Jesus gelah ula katakenna man ise pe kerna kai si enggo terjadi.+
