Maleaki 1:1-14
1 Enda berita arah Dibata nari,
Kata-kata Jahwe kerna Israel arah Maleaki,*
2 “Enggo Kukelengi kena,”+ nina Jahwe.
Tapi ning kena, “Uga caraNdu engkelengi kami?”
Nina Jahwe, “La kin Esau senina Jakup?+ Keleng ateKu Jakup,
3 tapi segat ateKu Esau,+ Kuban gunung-gunungna jadi ingan si la iingani,+ janah biang kerangen si ngiani taneh warisenna.”+
4 “Nina Edom,* ‘Amin pe kami enggo hancur, mulih pagi kami, bangun kami mulihi si hancur e.’ Tapi nina Jahwe penguasa malekat, ‘Amin pe bangun kalak e pagi mulihi si hancur e, Kuruntuhken nge pagi. Daerah kalak e igelari pagi “daerah kejahaten” janah bangsa kalak e jadi “bangsa si isumpahi Jahwe seh rasa lalap.”+
5 Idah kena pagi si e alu mata kena, ning kena, “Mbera-mbera Jahwe imuliaken i belang-belang daerah Israel.”’”
6 “‘Anak-anak hamatina bapakna,+ pelayan hamatina tuanna. Emaka adi bapak kin Aku,+ engkai maka la lit si mehamat man bangKu?+ Adi tuan kin Aku, engkai maka la lit si mehamat man bangKu?’ nina Jahwe penguasa malekat man kena imam-imam si la mehamat man gelarKu.+
“‘Tapi ning kena, “Bas kai kin gelarNdu ihina kami?”’
7 “‘Bereken kena persembahen pangan si najis bas ingan nutung* persembahenKu.’
“‘Jenari nungkun kena, “Bas kai kin gelarNdu ihina kami?”’
“‘Alu ngataken, “Hina kap meja Jahwe e.”+
8 Sanga persembahken kena korban binatang si pentang, ning kena, “Mejile kap enda.” Sanga persembahken kena binatang si pincang ntah sakit, ning kena, “Mejile kap enda.”’”+
“Cubaken dage baba e ku gubernur, meriah kin ukurna? Jadi nge atena man kena?” nina Jahwe penguasa malekat.
9 “Gundari pindolah man Dibata gelah mekuah ateNa kita. Adi bage persembahen si baba kena, me la mungkin jadi ateNa kena?” nina Jahwe penguasa malekat.
10 “Selain si e, lit kin kena si nggit nutup pintu-pintu rumah pertoton?+ Mpegara api bas ingan nutung persembahenKu saja pe la kena nggit adi la igalari.+ La meriah ukurKu ngidah kena, la Aku senang ngaloken persembahen kena,”+ nina Jahwe penguasa malekat.
11 “Sebap timur nari seh ku barat,* ihamati kerina bangsa pagi gelarKu.+ I japa pe tutung kalak pagi korban gelah ku das asapna janah berekenna persembahen si mehuli guna gelarKu, perban ihamati kerina bangsa pagi gelarKu,”+ nina Jahwe penguasa malekat.
12 “Tapi ban kena e* najis,+ ning kena, ‘Meja Jahwe e najis, persembahen si lit i datasna pangan si erban ciga ate.’+
13 Ning kena, ‘Latih naring pe!’ Remeh akap kena kerna si e,” nina Jahwe penguasa malekat. “Baba kena binatang tangkon, binatang si pincang ras si sakit. Baba kena e jadi persembahen man bangKu! Akap kena kin nggit Aku ngalokenca?”+ nina Jahwe.
14 “Kena sumpahlah kalak si licik si mereken korban si cacat man Jahwe sanga ia erjanji, padahal lit nge bas asuh-asuhenna binatang jantan si sehat. Aku kap Raja si mulia,+ gelarKu ihamati pagi i tengah-tengah kerina bangsa,”+ nina Jahwe penguasa malekat.
Cataten i teruh
^ Ertina “UtusenKu.”
^ Gelar si deban man Esau.
^ Ntah “arah matawari terbit seh ku matawari terbenam.”
^ Ntah banci saja “ban kena Aku.”
