Maleaki 3:1-18
3 “Kusuruh pagi utusenKu, sikapkenna pagi dalan man bangKu.+ Kenca si e, Tuan si benar si darami kena rempet pagi reh ku rumah pertotonNa.+ Utusen perjanjin si timai kena e pasti pagi reh. Pasti pagi ia reh,” nina Jahwe penguasa malekat.
2 “Tapi ise pagi si tahan bas wari kerehenna? Ise pagi si ngasup tetap tedis sanga ia reh? Sebap bali pagi ia bagi api si erban logam jadi murni janah bagi sabun+ si mbersihken paken.
3 Kundul pagi ia bagi kalak si mbersihken ras erban pirak+ jadi murni. Bersihkenna pagi keturunen Lewi, murnikenna kalak e bagi emas ras pirak. Alu bage kalak e pasti pagi jadi kalak benar si mereken persembahen man Jahwe.
4 Persembahen si bereken Juda ras Jerusalem tuhu-tuhu erban Jahwe senang, bagi jaman si mbarenda.+
5 “Reh pagi Aku ngakimi kena. Mis pagi Kuhakimi kalak si make ilmu sihir,+ perlua-lua, si ersumpah palsu,+ si nipu kalak upahen,+ si nipu janda ras anak si la erbapa,*+ bage pe si la nggit nampati* kalak asing.+ Kalak si bage labo kap mbiar man bangKu,” nina Jahwe penguasa malekat.
6 “Sebap Aku kap Jahwe. Aku la pernah berubah.*+ Kena kap keturunen Jakup, e me sebapna maka kena lit denga.
7 Mulai kin jaman nini bulang kena, enggo nilah kena arah peraturenKu janah la dalanken kena.+ Mulihlah man bangKu, Aku pe mulih pagi man kena,”+ nina Jahwe penguasa malekat.
Tapi ning kena, “Uga carana kami mulih?”
8 “Lit kin manusia si ngerampok Dibata? Tapi enggo rampok kena Aku.”
Kenca si e ning kena, “Alu cara kai kami ngerampok Kam?”
“Alu la mereken perpuluhen* ras sumbangen.
9 Kena tuhu-tuhu kena sumpah,* sebap rampok kena Aku. Kerina bangsa kena ikut ngelakokenca.
10 Babalah kerina perpuluhen ku rumah pertoton,+ gelah lit pangan i rumahKu.+ Ujilah Aku, nenlah pasti Kubuka pintu-pintu lau i langit man kena,+ Kucurcurken pagi pasu-pasu man kena seh ngasa lanai lit si kurang,”+ nina Jahwe penguasa malekat.
11 “Kupelawes pagi kerina hama. Lanai pagi cedaina hasil juma kena, pasti pagi erbuah kebun anggur kena,”+ nina Jahwe penguasa malekat.
12 “Kerina bangsa pagi ngataken maka kena ermeriah ukur,+ sebap negri kena jadi ingan ermeriah ukur pagi,” nina Jahwe penguasa malekat.
13 “Jahat kel ranan kena man bangKu,” nina Jahwe.
Kenca si e ning kena, “Kai kin si kataken kami kerna Kam?”+
14 “Ning kena, ‘Labo lit gunana silayani Dibata.+ Kai kin gunana silakoken kewajipenta man baNa, ras sicidahken maka kita erceda ate perban dosa-dosata man Jahwe penguasa malekat?
15 Menurut kami, kalak si ermeriah ukur e kalak si melebesa, kalak si berhasil eme kalak si jahat.+ Pang kalak e nguji Dibata janah la ia kaden pe.’”
16 Paksa si e, kalak si mbiar man Jahwe ngerana sapih-sapih ia, masing-masing ras temanna, janah lalap perdiateken Jahwe ras begikenNa. Kenca si e, sada buku peringet-ingeten itulis i lebe-lebeNa,+ eme buku kerna kalak si mbiar man Jahwe ras si ngukuri* gelarNa.+
17 Bagenda nina Jahwe penguasa malekat, “Jadi umatKu pagi kalak e.+ Bas wari e, Kuban kalak e jadi jangKu si istimewa.+ Mekuah pagi ateKu man kalak e bagi sekalak bapak si rate mekuah man anakna si patuh man bana.+
18 Idah kena pagi mulihi bedana kalak si benar ras si jahat,+ bage pe bedana kalak si ngelayani Dibata ras si lang.”
Cataten i teruh
^ Ntah “anak melumang.”
^ Ntah “la mperdiateken hak.”
^ Ntah “Aku lenga berubah.”
^ Ntah “sepersepuluhen.”
^ Ntah banci saja “Alu sumpah, sumpahi kena Aku.”
^ Ntah banci saja “ngergai.”
