Markus 1:1-45
-
Johanes Peridiken erberita (1-8)
-
Jesus iperidiken (9-11)
-
Jesus icubai Setan (12, 13)
-
Jesus mulai erberita i Galilea (14, 15)
-
Lebuh Jesus murid-murid si pertama (16-20)
-
Malekat jahat ipelawes (21-28)
-
Pepalem Jesus enterem kalak i Kapernaum (29-34)
-
Ertoto bas ingan si melungen (35-39)
-
Sada kalak si sakit kusta ipepalem (40-45)
1 Enda me tangtangna berita si meriah kerna Jesus Kristus, Anak Dibata:
2 Bagi si tulisken Nabi Jesaya, “(Kusuruh utusenKu leben asangken kam, ia pagi si nikapken dalan man bandu.)+
3 Lit si erlebuh i taneh mesawang,* ‘Sikapkenlah dalan man Jahwe!* Pepinterlah dalan-dalanNa.’”+
4 Johanes Peridiken lit bas taneh mesawang,* beritakenna maka peridin kap tanda pertobaten gelah dosa-dosa iampuni.+
5 Emaka kerina penduduk Jerusalem ras kerina daerah Judea reh ndahi ia, peridikenna* kalak e i Lau Jordan, janah akui kalak e dosa-dosana alu terus terang.+
6 Paken Johanes iban arah mbulu unta nari janah ikat pinggangna arah kulit nari.+ Panganna eme labang ras madu kerangen.+
7 Beritakenna, “Kenca aku, reh pagi sekalak si belinen kuasana asangken aku, mungkuk guna mbuka nali selopna pe la aku cocok.*+
8 Kuperidiken kena alu lau, tapi peridikenna pagi kena alu kesah si badia.”+
9 Sanga si e, Jesus reh arah Nasaret i Galilea nari janah peridiken Johanes ia bas Lau Jordan.+
10 Ndarat kenca bas lau nari, mis idah Jesus terbuka langit, janah nusur kesah si badia ku datasna bagi merpati.+
11 Terbegi sora i langit nari, “Kam me AnakKu si Kukelengi. Kam me si ngena ateKu.”+
12 Mis babai Dibata ia alu kesah si badia ku taneh mesawang.*
13 Terus ia i taneh mesawang* 40 wari dekahna, i je icubai Setan ia.+ Tading ia ras binatang buas, tapi malekat-malekat ngelayani ia.+
14 Kenca Johanes itangkap, lawes Jesus ku Galilea,+ beritakenna berita si meriah arah Dibata nari,+
15 janah nina, “Enggo seh waktu si itetapken, janah Kerajan Dibata enggo ndeher. Ertobatlah,+ erkinitekenlah man berita si meriah.”
16 Sanga erdalan ia i tepi Laut Galilea, idahna Simon ras seninana Andreas+ sangana ngamburken jalana ku laut,+ perban kalak e nelayan.+
17 Emaka nina Jesus man kalak e, “Mari ikutken aku, kuban pagi kena jadi si njala manusia.”+
18 Mis tadingken kalak e jalana janah ikutkenna ia.+
19 Kenca erdalan sitik terdauhen, idahna Jakup anak Sebedeus ras seninana Johanes, kalak e sangana mpesikap jalana bas perahu.+
20 Mis lebuhna kalak e. Emaka tadingken kalak e bapakna Sebedeus si lit bas perahu ras sierdahinna. Kenca si e ikutken kalak e Jesus.
21 Jenari lawes kalak e ku Kapernaum.
Sanga wari Sabat, lawes Jesus ku ingan pulung kalak Jahudi* janah mulai ia ngajar.+
22 Jengang kalak e perban carana ngajar, sebap ia ngajar selaku kalak si lit kuasana, labo bagi ahli Undang-Undang Musa.+
23 Bas ingan pulung kalak Jahudi e lit sada kalak si irasuki malekat jahat, janah serko ia,
24 “O Jesus kalak Nasaret, kai urusenndu ras kami?+ Kernepkenndu kin atendu kami? Kuteh nge ise kam situhuna, Si Badia bas Dibata nari!”+
25 Tapi sergang Jesus ia, “Sinikken, ndaratlah arah ia nari!”
26 Kenca ban malekat jahat e daging kalak ndai kejang-kejang janah banna ka ia serko, ndarat ia arah kalak ndai.
27 Mamang kel ate jelma si enterem e janah mulai cakapkenna, nina, “Kai kin enda? Pengajaren si mbaru! Lit kuasana mpelawes malekat-malekat jahat, patuh ka malekat jahat e man bana.”
28 Emaka berita kerna ia mis terberita ku japa pe bas kerina daerah Galilea.
29 Ndarat kalak e bas ingan pulung kalak Jahudi e nari ras Jakup bage pe Johanes. Jenari lawes kalak e ku rumah Simon ras Andreas.+
30 Mami Simon+ sangana ampar perban demam, mis kataken kalak e man Jesus kerna ia.
31 Emaka jumpai Jesus ia, jemakna tanna guna nampati ia tedis. Lanai ia demam, jenari sikapkenna pangan man kalak e.
32 Sanga berngi, kenca terbenam matawari, mulai baba kalak man Jesus kerina si sakit ras si irasuki malekat jahat.+
33 Kerina penduduk kota pulung pas i lebe-lebe pintu.
34 Emaka pepalemna enterem kalak si erbage-bage penakitna,+ janah pelawesna melala malekat jahat, tapi la pediatna malekat-malekat jahat e ngerana, sebap teh malekat-malekat jahat e ia Kristus.*
35 Pagi-pagi si lampas sanga gelap denga, medak ia janah lawes ku darat ku ingan si melungen, mulai ia ertoto i je.+
36 Tapi Simon ras murid-murid si deban ndarami ia,
37 kenca jumpa, nina, “Kerina kalak ndarami kam.”
38 Tapi ngaloi ia, “Eta kita lawes ku ingan si deban, ku kota-kota si ndeher jenda nari, gelah banci ka aku erberita i je, sebap perban si e me aku reh.”+
39 Emaka lawes ia erberita bas ingan-ingan pulung kalak Jahudi i kerina daerah Galilea janah pelawesna malekat-malekat jahat.+
40 I je reh ka sekalak si sakit kusta ndahi Jesus, sujud ia janah mindo kel man bana, “Adi nggit kam, banci pepalemndu aku.”+
41 Perban mekuah atena, dudurkenna tanna janah jemakna ia, nina, “Nggit aku! Malemlah kam.”+
42 Mis bene kustana e janah malem ia.
43 Kenca si e, suruh Jesus ia lawes, alu tegas perentahkenna ia,
44 nina, “Ula kataken man ise pe, laweslah, cidahken bandu man imam. Berelah persembahenndu bagi si suruh Musa,+ guna mbuktiken maka kam enggo malem.”+
45 Tapi kenca lawes, mulai ceritaken dilaki e kerna si e, ceritakenna ku japa pe. Emaka lanai banci Jesus terang-terangen masuk ku sada kota, tading ia i darat kota bas ingan si melungen. Tapi i ja nari pe tetap kalak rehen ndahi ia.+
Cataten i teruh
^ Taneh si mbelang si jarang iingani.
^ Taneh si mbelang si jarang iingani.
^ Ntah “metunggung.”
^ Taneh si mbelang si jarang iingani.
^ Taneh si mbelang si jarang iingani.
^ Ntah banci saja “tehna ise ia.”
