Markus 10:1-52
10 Kenca bage, lawes ia janah seh i perbatasen Judea i sebrang Lau Jordan, janah reh ka jelma si enterem ndahi ia. Bagi biasana, ajarina kalak e.+
2 Reh kalak Parisi guna nguji Jesus, sungkun kalak e banci ntah lang sekalak dilaki nceraiken diberuna.+
3 Nina Jesus, “Kai kin perentah Musa man kena?”
4 Ngaloi kalak e, “Pediat Musa sekalak dilaki erban surat cerai guna nceraiken diberuna.”+
5 Nina Jesus, “Tulisna perentah e man kena+ perban kena keras kepala.+
6 Tapi tangtangna nari, ‘Ciptaken Dibata manusia selaku dilaki ras diberu.+
7 E me sebapna sekalak dilaki nadingken bapakna ras mamakna,+
8 janah duana jadi sada,’+ emaka kalak e lanai dua, tapi sada.*
9 Perban si e, kai si enggo persada Dibata, la banci sirangken manusia.”+
10 Kenca kalak e mulih ku rumah, sungkun murid-murid ia kerna si e.
11 Nina Jesus man kalak e, “Ise pe si nceraiken diberuna, janah erjabu ia ras kalak si deban, ia enggo erlua-lua+ nandangi diberuna,
12 janah adi lit sekalak diberu si nceraiken dilakina, kenca si e erjabu ia ras kalak si deban, diberu e enggo erlua-lua.”+
13 Jenari baba kalak man Jesus anak-anak gelah tama Jesus tanna ku kalak e,* tapi merawa murid-muridna man kalak e.+
14 Ngidah si e merawa Jesus janah nina, “Pediatlah anak-anak e reh man bangku. Ula larang ia, sebap man kalak si bagenda me Kerajan Dibata.+
15 Situhuna kukataken man kena, ise pe si la ngaloken Kerajan Dibata bagi sekalak anak-anak, ia la banci masuk ku bas.”+
16 Jenari dakepna anak-anak e, pasu-pasuna anak-anak e alu namaken tanna ku datas kalak e.+
17 Sanga terusken Jesus perdalanenna, sekalak dilaki ngayaki ia janah sujud i lebe-lebena, nungkun ia, “O Guru Si Mehuli, kai nge si arus kulakoken gelah kudat kegeluhen si rasa lalap?”+
18 Nina Jesus, “Engkai maka katakenndu aku mehuli? La lit si mehuli selain Dibata.+
19 Tehndu perentah enda: ‘Ula munuh,+ ula erlua-lua,+ ula nangko,+ ula mereken kesaksin palsu,+ ula nipu,+ hamatilah bapakndu ras mamakndu.’”+
20 Nina dilaki e, “O Guru, kerina si enda enggo kudalanken kitik-kitikku nari.”
21 Tatap Jesus ia janah perban keleng atena ia, nina, “Sada si lenga lakokenndu: Laweslah, dayaken ertandu janah bereken senna man kalak mesera, alu bage lit pagi ertandu i surga. Kenca si e, mari jadilah pengikutku.”+
22 Sedih kel akapna megi jawapen e jenari lawes ia alu gulut ukur, sebap melala ertana.+
23 Kenca tatap Jesus ku sekelilingna, nina man murid-muridna, “Kalak si melala senna seh kel serana masuk ku bas Kerajan Dibata!”+
24 Tapi sengget murid-murid megi kata-katana e. Emaka nina Jesus, “O anak-anak, seh kel serana masuk ku bas Kerajan Dibata.
25 Nukahen unta masuk ku lubang jarum asangken kalak bayak masuk ku Kerajan Dibata.”+
26 Reh mamangna ate kalak e, janah nina man bana,* “Adi bage, ise si banci selamat?”+
27 Tatap Jesus kalak e janah nina, “Bas manusia, enda la mungkin terjadi, tapi bas Dibata kai pe banci terjadi.”+
28 Nina Petrus man bana, “Enggo tadingken kami kerinana janah ikutken kami kam.”+
29 Ngaloi Jesus, “Situhuna kukataken man kena, ise pe si enggo nadingken rumahna ntah seninana ntah turangna ntah mamakna ntah bapakna ntah anakna ntah jumana perban aku ras perban berita si meriah,+
30 alokenna pagi 100 kali terbuen bas jaman si gundari, eme rumah, senina, turang, mamak, anak, ras juma, tapi rikutken penindasen.+ Bas jaman* si nandangi reh, kegeluhen si rasa lalap.
31 Tapi enterem pagi kalak si pertama jadi si terakhir, janah si terakhir jadi si pertama.”+
32 Sanga Jesus ras murid-muridna bas perdalanen ku Jerusalem, Jesus erdalan arah lebe. Mamang ate murid-murid e, tapi kalak si ikut mulai mbiar. Sekali nari babana 12 rasulna ku duru janah katakenna kai pagi si terjadi man bana:+
33 “Begiken! Kita bas perdalanen ku Jerusalem, iserahken pagi Anak manusia man imam-imam kepala ras ahli Undang-Undang Musa guna ihukum mate. Iserahken pagi ia man kalak arah bangsa si deban nari,
34 hina kalak e pagi ia, cidurina, cambukna, janah bunuhna, tapi kenca telu wari keke pagi ia.”+
35 Jakup ras Johanes, anak-anak Sebedeus,+ ndeheri Jesus janah nina, “O Guru, ate kami lakokenndu min kai pe si pindo kami man bandu.”+
36 Nina Jesus, “Kai kin ate kena si kulakoken man kena?”
37 Ngaloi kalak e, “Bere min kami kundul i deherndu bas kemulianndu, sada arah kananndu, sada nari arah kirindu.”+
38 Tapi nina Jesus, “La kap angka kena kai si pindo kena e. Ngasup kin kena minem alu calung* si kuinem ntah pe iperidiken alu peridin si kualoken?”+
39 Nina kalak e, “Ngasup.” Emaka nina Jesus, “Alu calung* si kuinem pagi kena minem, janah alu peridin si kualoken pagi kena iperidiken.+
40 Tapi, kerna ise si kundul arah kanan ras arah kiriku, labo aku si nentukenca, si e enggo isikapken man kalak si enggo itentuken.”
41 Sanga begi murid-murid si sepuluh kalak nari kerna si e, merawa ia man Jakup ras Johanes.+
42 Tapi dilo Jesus kalak e, nina, “Teh kena maka kalak si ianggap* selaku penguasa bangsa-bangsa nguasai rakyatna janah pejabat pe erkuasa nandangi kalak e.+
43 Tapi, kena la banci bage. Ise pe si atena jadi si mbelin arah kena arus jadi pelayan kena,+
44 janah ise pe si atena jadi si perlebe arah kena arus jadi budak man kerina.
45 Sebap Anak manusia pe reh labo guna ilayani, tapi guna ngelayani,+ ras mereken kegeluhenna jadi tebusen ras penukar man enterem jelma.”+
46 Seh kalak e i Jeriho. Sanga Jesus ras murid-muridna bage pe jelma si enterem ndarat arah Jeriho, lit sekalak pemindo-mindo si pentang si kundul i tepi dalan+ eme Bartimeus (anak Timeus).
47 Sanga begina maka Jesus kalak Nasaret sangana lewat, ngerana ia alu sora megang, “O Jesus, Anak Daud,+ mekuah min atendu aku!”+
48 Emaka rawai jelma si enterem e ia janah suruh kalak e ia sinik, tapi reh gangna ia ngerana, “O Anak Daud, mekuah min atendu aku!”
49 Emaka ngadi Jesus, nina, “Dilo ia ku jenda.” Emaka dilo kalak e kalak si pentang ndai, nina, “Petetaplah ukurndu! Tedisken, dilona kam.”
50 Lompat ia janahna ngambekken uisna si arah darat, jenari dahina Jesus.
51 Sungkun Jesus ia, “Kai kin atendu si kulakoken man bandu?” Ngaloi dilaki si pentang e, “O Guru,* ban min aku erpengidah mulihi.”
52 Nina Jesus man bana, “To laweslah. Kinitekenndu enggo erban kam malem.”+ Mis ia erpengidah+ janah mulai ikutkenna Jesus radu ras jelma si enterem e.
Cataten i teruh
^ As. “sada daging.”
^ Ntah “gelah pasu-pasuna.”
^ Ntah banci saja “nina antara ia.”
^ Ntah “cangkir.” Enda ngertiken peraten Dibata guna mpediat Jesus mate alu tuduhen hinana Dibata.
^ Ntah “cangkir.”
^ Ntah “iakui.”
^ As. “Rabuni.”
