Markus 12:1-44
12 Kenca si e mulai ngerana Jesus man kalak e alu perumpaman,* “Sekalak dilaki erban kebun anggur,+ pagarina i sekelilingna, kurakna ingan meras anggur i je, janah pajekkenna sada menara.+ Kenca si e, sewakenna man perjuma si deban janah lawes ia ku luar negri.+
2 Kenca seh waktuna rani, suruhna sekalak budakna ndahi perjuma e guna muat baginna bas kebun anggur e nari.
3 Tapi tangkap kalak e ia, pekpekina, suruhna ia lawes janah la maba kai pe.
4 Suruhna ka mulihi budak si deban, tapi pekpeki kalak e takalna janah hina kalak e ia.+
5 Suruhna ka si deban, tapi bunuh kalak e ia. Suruhna ka enterem budak si debanna, tapi piga-piga pekpekina janah deba bunuhna.
6 Sekalak nari ngenca si lit bas ia eme anak si kelengina.+ Dungna suruhna ia ndahi kalak e, sebap nina bas ukurna, ‘Ergai kalak e nge kari anakku e.’
7 Tapi arih-arih perjuma e, ‘Enda kap ahli warisna.+ Eta sibunuh ia, gelah man banta warisenna.’
8 Emaka tangkap kalak e ia, bunuhna, jenari benterkenna ku darat kebun anggur e.+
9 Kai nge pagi si lakoken si mpuna kebun anggur e? Reh pagi ia janah bunuhna kerina perjuma e, kenca si e berekenna kebun anggur e man kalak si deban.+
10 La kin pernah baca kena ayat enda, ‘Batu si tulak tukang bangunen, enggo jadi batu si utama.+
11 Batu e rehna arah Jahwe* nari, janah luar biasa kel e man banta.’”+
12 Perban si e, tangkap peminpin-peminpin agama atena Jesus, sebap teh kalak e maka kalak e nge si sangana cakapken Jesus bas perumpaman e. Tapi mbiar kalak e man jelma si enterem, emaka lawes kalak e nadingken ia.+
13 Kenca si e, suruh kalak e piga-piga kalak Parisi ras pengikut partai Herodes ndahi Jesus guna njebak ia alu rananna.+
14 Kenca seh, nina kalak e, “O Guru, teh kami maka kam ngataken kai si benar janah la daramindu ngena ate manusia, perban la inenndu penampilen kalak arah kai si teridah, tapi ajarkenndu dalan Dibata menurut kebenaren. Adi bage banci ntah lang nggalar pajak kepala man Kaisar?
15 Arus nge sigalari ntah lang?” Perban tehna maka kalak e munapik, nina man kalak e, “Engkai maka cubai kena aku? Bereken dage man bangku sada dinar* gelah kunen.”
16 Bereken kalak e sada man bana, jenari nina Jesus, “Gambar ras gelar ise enda?” Nina kalak e, “Kaisar.”
17 Kenca si e nina Jesus, “Adi bage, bereken man Kaisar kai si jadi bagin Kaisar,+ tapi man Dibata kai si jadi bagin Dibata.”+ Emaka jengang kalak e megi rananna.
18 Kalak Saduki si la tek maka lit kekeken+ reh ndahi Jesus janah nungkun,+
19 “O Guru, tulisken Musa man kami adi lit sekalak dilaki mate ras tadingkenna diberuna janah la lit anak kalak e, senina si mate e arus ngempoi diberuna e guna mereken keturunen man seninana ndai.+
20 Lit pitu kalak si ersenina. Sintua erjabu, paksa ia mate la lit keturunenna.
21 Si peduaken ngempoi diberu e tapi mate ia janah la lit keturunenna, si peteluken pe bage ka,
22 seh ngayak si pepituken. Dungna diberu e pe mate.
23 Bas kekeken, diberu ise nge ia pagi? Sebap pituna enggo pernah ngempoi ia.”
24 Nina Jesus, “La angkai kena Kitap si Badia bage pe kuasa Dibata, e me sebapna maka kena enggo salah.+
25 Sebap sanga kalak e keke bas si mate nari, dilaki ntah pe diberu la erjabu janah la ipejabu, tapi kalak e bagi malekat i surga.+
26 Tapi kerna kalak mate si ipekeke, lenga kin pernah baca kena bas buku Musa, kerna kejadin rambah duri? Paksa si e nina Dibata man Musa, ‘Aku kap Dibata Abraham, Dibata Isak, ras Dibata Jakup.’+
27 Ia labo Dibata kalak mate tapi Dibata kalak si nggeluh. Tuhu-tuhu kel kena enggo salah.”+
28 Sekalak arah ahli Undang-Undang Musa nari reh janah begina kalak e sijawapen. Sanga tehna maka enggo bereken Jesus jawapen si mehuli, nungkun ia, “Perentah si apai nge si pentingna arah kerinana?”+
29 Ngaloi Jesus, “Enda me si pentingna, ‘Begikenlah, o Israel, Jahwe* kap Dibatata, Jahwe* e sada ngenca,
30 janah arus kelengindu Jahwe* Dibatandu alu kerina pusuhndu, kegeluhenndu,* perukurenndu, ras gegehndu.’+
31 Si peduaken, ‘Arus kelengindu kalak si deban bagi kam engkelengi dirindu.’+ La lit perentah si deban si belinen asangken perentah e duana.”
32 Nina ahli Undang-Undang e, “O Guru, payo si katakenndu, cocok ras kebenaren, ‘Dibata e sada, janah la lit Dibata si deban selain Ia.’+
33 Ndauh pentingen engkelengi Ia alu kerina pusuh, perukuren, ras gegeh, bage pe engkelengi kalak si deban bagi diri sendiri asangken kerina persembahen tutungen ras korban.”+
34 Perban pentar akap Jesus jawapenna, nina man bana, “Kam la ndauh arah Kerajan Dibata nari.” Kenca si e, ise pe lanai pang nungkun man bana.+
35 Tapi, sanga terusken Jesus ngajar i rumah pertoton, nungkun ia, “Engkai maka kataken ahli-ahli Undang-Undang Musa maka Kristus e anak Daud?+
36 Alu kesah si badia,+ nina Daud, ‘Nina Jahwe* man Tuanku, “Kundullah i sebelah kananKu seh ngasa Kutamaken musuh-musuhndu i teruh nahendu.”’+
37 Lebuh Daud ia Tuan, uga maka banci ia anakna?”+
Meriah ukur jelma si enterem megiken ia.
38 Sanga ia ngajar nina, “Hati-hatilah man ahli-ahli Undang-Undang Musa si meriah akapna erdalan ku jah ku je make jubah janah iperkuanken atena alu mehamat bas ingan si enterem jelma.*+
39 Merhat ia kundul arah lebe* bas ingan pulung kalak Jahudi* bage pe ingan si mehamat i pesta-pesta.+
40 Rampokna rumah* janda-janda, janah gedang banna totona gelah idah kalak.* Dat kalak e pagi hukumen si terkeleken.”*
41 Kenca si e, kundul Jesus janah alakenna ku kotak-kotak* persembahen.+ Perdiatekenna jelma si enterem namaken senna ku bas kotak e. Enterem kalak bayak namaken melala sen logam.+
42 Reh sekalak diberu mbalu si mesera janah tamakenna dua sen logam* si kitik kel ergana.+
43 Emaka lebuhna murid-muridna janah nina, “Situhuna kukataken man kena, buen nge si tamaken diberu mbalu si mesera enda asangken sen si tamaken kerina kalak ku bas kotak-kotak persembahen.+
44 Sebap kerina kalak e mere arah kelebihen ertana, tapi diberu e amin gia mesera, tamana kerina si lit bas ia, kerina si lit bas geluhna.”+
Cataten i teruh
^ Ntah “anding-andingen.”
^ Ntah “bas pajak.”
^ Ntah “kundul bas ingan si mehulina.”
^ Ntah “erta.”
^ Ntah “gelah nutupi kejahatenna.”
^ Ntah “terberaten.”
^ Ntah “ingan-ingan.”
