Markus 13:1-37
13 Sanga ia ndarat rumah pertoton nari, nina sekalak muridna man bana, “O Guru, nen min, luar biasa kel batu-batu ras bangunen enda!”+
2 Tapi nina Jesus, “Idah kena nge kerina bangunen si galang enda? Iruntuhken pagi kerina enda. Lanai pagi lit sada batu pe i datas batu si debanna.”+
3 Sanga ia kundul i Gunung Saitun, janah alakenna ku rumah pertoton, nungkun Petrus, Jakup, Johanes, ras Andreas man bana, sanga la lit kalak si deban,
4 “Kataken min man kami, ndigan kin e terjadi, kai nge pagi si jadi tanda sanga kerina enda nandangi seh ku kedungenna?”+
5 Emaka nina Jesus man kalak e, “Hati-hatilah, ula sempat lit si erban kena papak,+
6 perban enterem pagi si reh make gelarku, nina, ‘Aku kap ia,’ janah enterem ibanna jelma papak.
7 Selain si e, sanga begi kena sora perang ras berita-berita kerna perang, ula kena mbiar. Enda kerina arus terjadi, tapi kedungen e lenga seh.+
8 “Bangsa ngelawan bangsa pagi, kerajan ngelawan kerajan.+ I japa pe terjadi gempa ras kurang pangan.+ Enda kerina bena-bena kiniseran* denga nge.+
9 “Hati-hatilah kena. Baba kalak pagi kena ku pengadilen setempat,+ ipekpeki bas ingan-ingan pulung kalak Jahudi,*+ ibaba ku lebe-lebe gubernur-gubernur ras raja-raja perban aku, gelah ersaksi kena man kalak e.+
10 Berita si meriah arus iberitaken lebe man kerina bangsa.+
11 Sanga baba kalak pagi kena ku pengadilen, ula kena kuatir kerna kai si man katanken kena, tapi katakenlah kai pe si ibereken kesah si badia man kena sanga si e, sebap labo kena si ngerana tapi kesah si badia.+
12 Selain si e, kalak si ersenina nyerahken seninana pagi gelah ibunuh, bage pe bapak nandangi anakna. Anak pe ngelawan orang tuana pagi, janah serahkenna guna ibunuh.+
13 Kerina kalak rate segat pagi man kena perban gelarku.+ Tapi kalak si megenggeng seh ku kedungenna+ iselamatken pagi.+
14 “Tapi sanga idah kena pagi kai si erban ciga ate si erban hancur+ tedis bas ingan si arusna la i je (perlu ukuri si mbaca guna ngangkai enda), kalak si lit bas Judea arus kiam ku gunung-gunung.+
15 Kalak si lit bas atap rumah* ula ku teruh ntah pe ku bas guna muat kai pe si lit bas rumahna,
16 janah kalak si sangana bas juma ula mulihken guna ngelegi uisna.
17 Cilaka kel diberu si sangana hamil ras si sangana pepinemken* anakna paksa si e!+
18 Teruslah ertoto gelah si e ula terjadi bas musim mbergeh.
19 Sebap, bas wari-wari e pagi terjadi kiniseran.+ Kiniseran si bage lenga pernah terjadi mulai kin doni iciptaken Dibata seh ngasa gundari, janah ndigan pe lanai terjadi.+
20 Situhuna, adi la pegendek Jahwe* wari-wari e, ise pe la banci iselamatken. Tapi guna kalak si enggo ipilihNa, pegendekNa me wari-wari e.+
21 “Bage ka pe, adi lit si ngataken, ‘I jenda kap Kristus!’ ntah, ‘I jah kap ia!’ ula kena tek.+
22 Sebap reh pagi Kristus-Kristus palsu ras nabi-nabi palsu,+ janah banna pagi melala tanda ras mukjizat guna erban kalak papak, termasuk kalak si ipilih e.
23 Emaka, hati-hatilah kena.+ Kerina enda enggo kukataken man kena ope lenga terjadi.
24 “Tapi bas wari e, kenca kiniseran ndai, mis gelap matawari, bulan lanai ersinar,+
25 bintang-bintang ndabuhen langit nari, janah kuasa-kuasa i langit pe mugur-ugur pagi.
26 Kenca si e, idah kalak e pagi Anak manusia+ reh i datas embun alu kuasa si mbelin ras kemulian.+
27 Kenca bage, suruhna pagi malekat-malekatna janah pepulungna kalak si enggo ipilih arah empat mata angin nari, arah ujung doni seh ku ujung langit.+
28 “Gundari erlajarlah arah perumpaman* kerna batang ara: Kenca dahanna si nguda ndarat janah erbulung, mis teh kena maka musim perlego enggo ndeher.+
29 Bage ka pe, sanga idah kena kerina enda terjadi, arus teh kena maka Anak manusia enggo nandangi seh.*+
30 Situhuna kukataken man kena, lit sada kelompok kalak* si la pagi mate seh ngasa kerina enda terjadi.+
31 Langit ras doni masap pagi,+ tapi kata-kataku tetap lit rasa lalap.+
32 “Kerna wari ntah pe jamna, ise pe la metehsa, malekat-malekat i surga pe lang, Anak pe lang, Bapak ngenca.+
33 Tetaplah hati-hati, teruslah sadar,+ sebap la teh kena ndigan waktu si itentuken e.+
34 Enda bagi sekalak dilaki si lawes ku luar negri nadingken rumahna. Berena kuasa man budak-budakna, bage pe dahin man tiap budakna,+ janah suruhna penjaga pintu gelah tetap erjaga-jaga.+
35 Emaka, tetaplah erjaga-jaga, sebap la teh kena ndigan tuan rumah e reh,+ ntah bas berngi, ntah tengah berngi, ntah nandangi erpagi-pagi,* ntah pe sanga erpagi-pagi.+
36 Gelah sanga rempet ia reh, la dapetina kena sangana medem.+
37 Tapi kai si kukataken man kena, kukataken ka man kerina: Tetaplah erjaga-jaga.”+
Cataten i teruh
^ Maksudna, kiniseran bagi si nanami sekalak diberu si sangana melahirken.
^ Buen rumah si i je rata atapna janah melala si banci ilakoken i je.
^ Ntah “mere ASI man.”
^ Ntah “anding-andingen.”
^ Ntah “enggo i lebe-lebe pintu.”
^ Bas bahasa Junani, enda maksudna sada kelompok kalak si nggeluh bas jaman si seri.
^ As. “ntah sanga tekuak manuk.”
