Markus 15:1-47
15 Sanga erpagi-pagi si lampas, arih-arih kerina anggota Pengadilen Agama Jahudi,* eme imam-imam kepala, peminpin-peminpin, ras ahli Undang-Undang Musa. Iket kalak e Jesus, babana ras serahkenna man Pilatus.+
2 Sungkun Pilatus ia, “Kam kin Raja Kalak Jahudi?”+ Nina ngaloi, “Payo bagi si katakenndu ena.”+
3 Tapi peseh imam-imam kepala melala tuduhen kerna ia.
4 Jenari sungkun Pilatus ka ia, nina, “La nge atendu ijawapndu?+ Nenlah, seh kel buena tuduhen kalak e man bandu.”+
5 Tapi lanai ijawap Jesus, emaka mamang ate Pilatus.+
6 Tiap Perayan Paskah, biasana bebasken Pilatus sekalak tahanen si pindo jelma si enterem.+
7 Paksa si e, sekalak dilaki si igelari Barabas sangana ipenjaraken ras pemberontak si debanna si ngelakoken pembunuhen sanga ngelawan pemerentah.
8 Emaka deheri jelma si enterem ia janah mulai pindo kalak e bagi si biasa lakoken Pilatus man kalak e.
9 Nina Pilatus, “Nggit nge kena adi kubebasken Raja Kalak Jahudi enda?”+
10 Sebap teh Pilatus perban cian nge ate imam-imam kepala maka serahkenna ia.+
11 Tapi ajuk-ajuk imam-imam kepala jelma si enterem e gelah pindona Barabas saja si ibebasken.+
12 Nina Pilatus ka man kalak e, “Adi bage, kai si arus kulakoken man kalak si igelari kena Raja Kalak Jahudi e?”+
13 Serko ka kalak e, “Bunuh ia bas tiang!”*+
14 Tapi nungkun Pilatus, “Engkai? Kejahaten kai kin si lakokenna?” Tapi lalap reh gangna sora kalak e serko, “Bunuh ia bas tiang!”*+
15 Perban buat Pilatus atena ukur jelma si enterem e, bebaskenna Barabas man kalak e. Kenca suruhna Jesus icambuk,+ serahkenna ia gelah ihukum mate i tiang.*+
16 Baba prajurit-prajurit e Jesus ku halamen ingan tading gubernur, janah lebuh kalak e kerina pasuken gelah pulung.+
17 Pakeken kalak e man Jesus jubah si warna ungu, ban kalak e mahkota arah peren duri janah tama kalak e ku takal Jesus.
18 Jenari nina, “Mejuah-juah, o Raja Kalak Jahudi!”+
19 Pekpeki kalak e ka takal Jesus alu buluh janah cidurina, jenari sujud kalak e man bana.
20 Dungna, kenca hina kalak e ia, tangtangi kalak e jubah si warna ungu e, jenari pakeken kalak e uis Jesus si arah darat man bana. Kenca si e baba kalak e Jesus gelah ipakuken bas tiang.*+
21 Ipaksa kalak e kalak si lewat maba tiang siksan* Jesus. Ia eme Simon kalak Kireni si rehna arah kuta nari, bapak Aleksander ras Rupus.+
22 Emaka baba kalak e ia ku ingan si igelari Golgota, si adi iterjemahken ertina “Ingan Tengkorak.”+
23 I je, cubaken kalak e mere anggur si icampur ras mur+ man Jesus, tapi la ia nggit nginemsa.
24 Pakuken kalak e ia bas tiang* janah bagi-bagiken kalak e uisna si arah darat alu undi guna nentuken baginna sekalak-sekalak.+
25 Paksa si e jam siwah erpagi-pagi,* pakuken kalak e ia bas tiang.*
26 Lit ka tulisen si nuduh ia, si isina: “Raja Kalak Jahudi.”+
27 Selain si e, pakuken kalak e dua perampok bas tiang i sampingna, sada arah kananna, sada nari arah kirina.+
28 * ——
29 Geleng-geleng kepala kalak si lewat janah hina kalak e ia,+ nina, “O kam si atendu ngeruntuhken rumah pertoton janah bangunndu bas telu wari,+
30 selamatkenlah bandu, nusurlah arah tiang siksan* e nari.”
31 Imam-imam kepala ras ahli Undang-Undang Musa pe hinana ia, nina, “Kalak selamatkenna, tapi la terselamatkenna bana!+
32 Pediatlah Kristus, Raja Israel e nusur gundari arah tiang siksan* nari, gelah banci siidah janah tek kita.”+ Kalak si ipakuken i sampingna pe hinana ka ia.+
33 Sanga jam 12 ciger,* kerina daerah e jadi gelap seh ngasa jam 3 karaben.*+
34 Sanga jam telu karaben, erlebuh Jesus alu sora si megang, nina, “Eli, Eli, lama sabakhtani?” adi iterjemahken ertina, “O Dibataku, o Dibataku, engkai maka tadingkenNdu aku?”+
35 Megi si e, piga-piga kalak si tedis i je ngataken, “Lebuh-lebuhna Elia.”
36 Kenca si e, lit sekalak si kiam, rendamna sada bunga karang bas anggur si macem, tamana e ku bas buluh, kenca si e berekenna man Jesus gelah inemna.+ Jenari nina, “Pediat saja ia! Sinen ntah reh kin Elia mpenusursa.”
37 Tapi nderkuh Jesus alu megang, jenari mate ia.+
38 Tirai bas ingan si badia+ merigat jadi dua, datas nari seh ku teruh.+
39 Sanga perwira si tedis njagai ia ngidah kerina kejadin sanga Jesus mate, nina, “Pasti ia Anak Dibata.”+
40 I je enterem diberu si ngenenca dauh-dauh nari, piga-piga eme Maria Magdalena, Maria mamak Jakup si Kitik ras Joses, bage pe Salome,+
41 si biasa nemani Jesus guna nampati ia+ sanga ia bas Galilea, janah enterem diberu si deban si reh ras ia ku Jerusalem.
42 Kenca enggo ben wari, perban e wari Persikapen, eme wari ope lenga Sabat,
43 reh Jusup arah Arimatea nari, ia sekalak anggota si ihamati bas Pengadilen Agama Jahudi.* Ia pe sangana nimai Kerajan Dibata. Pang ia ngadap Pilatus janah pindona mayat Jesus.+
44 Tapi ragu denga Pilatus maka Jesus enggo mate, emaka dilona perwira e janah sungkunna enggo nge mate Jesus ntah lenga.
45 Kenca pastikenna arah perwira ndai, berekenna mayat e man Jusup.
46 Kenca tukurna uis linen si halus, penusurna mayat Jesus, balutina ia alu uis linen halus e jenari amparkenna bas kuburen+ si enggo ikurak i uruk batu. Kenca si e, gulingkenna sada batu guna nutupi kuburen e.+
47 Tapi Maria Magdalena ras Maria mamak Joses terus ngenen ingan Jesus iamparken.+
Cataten i teruh
^ As. “anggota Sanhedrin.”
^ Ntah “kayu.”
^ Ntah “kayu.”
^ Ntah “kayu.”
^ Ntah “kayu.”
^ Ntah “kayu.”
^ Bas jaman Jesus, enda jam si peteluken. Perhitungen waktu e imulai sanga terbit matawari.
^ Ntah “kayu.”
^ Bas jaman Jesus, enda jam si peenemken. Perhitungen waktu e imulai sanga terbit matawari.
^ Bas jaman Jesus, enda jam si pesiwahken. Perhitungen waktu e imulai sanga terbit matawari.
^ Ntah “bas Sanhedrin.”
