Markus 2:1-28
2 Tapi kenca piga-piga wari, mulih ka ia ku Kapernaum, janah terberita maka ia enggo i rumah.+
2 Emaka enterem kalak si pulung i rumah e, dungna lanai siat, bas deher pintu pe lanai siat. Jenari mulai ia ngerana kerna kata Dibata man kalak e.+
3 Kenca si e lit empat kalak si maba sekalak dilaki si lumpuh.+
4 Tapi la banci baba kalak e ia pas ku lebe-lebe Jesus perban enterem kel jelma. Emaka aguina atap si lit i datas Jesus, kenca si e ibanna lubang i je, jenari penusurna kalak lumpuh e alu ingan medemna.
5 Ngidah kiniteken kalak e,+ kataken Jesus man si lumpuh e, “Nakku, dosandu enggo iampuni.”+
6 Lit piga-piga ahli Undang-Undang Musa sangana kundul i je, ngeranai bas pusuhna,+
7 ‘Engkai maka bage nina ngerana? Hinana kap Dibata. Ise kin si banci ngampuni dosa selain Dibata?’+
8 Tapi mis teh Jesus kai si lit bas ukur kalak e, emaka nina, “Engkai maka bage perukuren kena?+
9 Apai kin nukahen ngatakenca man si lumpuh e, ‘Dosandu enggo iampuni,’ asangken, ‘Tedisken, angkat ingan medemndu jenari erdalanlah’?
10 Tapi, gelah teh kena maka Anak manusia+ erkuasa i doni guna ngampuni dosa . . .”+ Jenari nina man kalak si lumpuh e,
11 “Kukataken man bandu, tedisken, angkat ingan medemndu, mulihlah ku rumahndu.”
12 Emaka tedis ia janah mis angkatna ingan medemna, kenca si e erdalan ia ku darat i lebe-lebe jelma si enterem e. Emaka jengang kalak e kerina janah muliaken kalak e Dibata, nina, “Lenga pernah siidah si bagenda.”+
13 Lawes ka Jesus ku tepi laut, rehen kalak si enterem ndahi ia, emaka ajarina kalak e.
14 Sanga ia erdalan, idahna Lewi anak Alpeus kundul bas kantor pajak. Nina Jesus man bana, “Mari, jadilah pengikutku.” Tedis ia, ikutkenna Jesus.+
15 Bas pudi wari, sanga Jesus man i rumah Lewi, enterem pemungut pajak ras kalak perdosa man ras Jesus bage pe ras murid-muridna, sebap enterem arah kalak e enggo jadi pengikutna.+
16 Tapi sanga ahli-ahli Undang-Undang Musa arah kalak Parisi nari ngidah Jesus man ras kalak perdosa bage pe ras pemungut pajak, nina man murid-murid Jesus, “Engkai maka ia man ras pemungut pajak bage pe ras kalak perdosa?”
17 Megi si e nina Jesus, “Kalak si sehat labo perlu dokter, kalak si sakit nge perlu. Aku reh labo ndilo kalak si benar, tapi ndilo kalak perdosa.”+
18 Paksa si e murid-murid Johanes ras kalak Parisi puasa. Emaka reh kalak e janah nina man Jesus, “Engkai maka murid-murid Johanes ras murid-murid kalak Parisi puasa, tapi murid-muridndu lang?”+
19 Ngaloi Jesus, “Me labo lit alasen teman-teman penganten si dilaki+ erpuasa adi kalak e sangana ras penganten e? Sanga kalak e ras penganten si dilaki, kalak e la banci puasa.
20 Tapi reh pagi waktuna penganten e ibuat arah kalak e nari+ janah i je pagi kalak e puasa.
21 Labo ise pe nambal uis si enggo male alu uis si mbaru. Sebap adi bage, reh belangna rigatna iban penambalna e.+
22 Bage ka pe labo tamaken kalak lau anggur si mbaru ku bas kantong kulit si male. Sebap adi bage, pecah kantong e, anggur e pe mambur ras kantong e pe ceda. Tapi lau anggur si mbaru itamaken ku bas kantong kulit si mbaru.”
23 Sanga erdalan Jesus ngelewati perjuman gandum bas wari Sabat, putikken murid-muridna gandum e janahna erdalan.+
24 Emaka nina kalak Parisi man bana, “Engkai maka lakoken kalak e kai si ilarang bas wari Sabat?”
25 Nina Jesus ngaloi, “Lenga kin pernah baca kena kerna kai si lakoken Daud sanga la lit panganna janah melihe ia ras anak buahna?+
26 Bas cerita kerna Imam Kepala Abiatar,+ masuk Daud ku rumah Dibata, panna roti persembahen si arusna la banci ise pe manca selain imam-imam,+ berekenna ka man teman-temanna.”
27 Kenca si e nina Jesus, “Wari Sabat iban guna manusia,+ tapi manusia labo iban guna wari Sabat.
28 Anak manusia eme Tuan termasuk man wari Sabat.”+
