Markus 3:1-35
3 Sekali nari masuk Jesus ku ingan pulung kalak Jahudi,* i je lit sekalak dilaki si sembelah tanna lumpuh.+
2 Perdiateken kalak Parisi kel ia guna ngenen pepalemna nge kari dilaki e ntah lang bas wari Sabat, gelah banci tuduh kalak e ia.
3 Nina man kalak si lumpuh tanna e, “Tedisken, mari ku tengah.”
4 Kenca si e, nungkun ia man kalak e, “Si apai kin si banci ilakoken bas wari Sabat: si mehuli ntah si jahat, nelamatken kegeluhen ntah munuh?”+ Sinik saja kalak e.
5 Alu perasan merawa, tatap Jesus kalak e janah ceda kel atena perban sitik pe la erpenggejapen pusuh kalak e.+ Jenari nina man dilaki e, “Pepinter tanndu.” Emaka pepinterna tanna janah mis ia malem.
6 Kenca si e, ndarat kalak Parisi janah mis ia arih-arih ras pengikut partai Herodes+ guna munuh Jesus.
7 Jenari, lawes Jesus ku tepi laut ras murid-muridna. Seh kel teremna kalak i Galilea ras Judea nari ngikutken ia.+
8 Enterem kalak arah Jerusalem, Idumea, sebrang Lau Jordan, sekitar Tirus ras Sidon nari pe reh ndahi Jesus sanga begi kalak e kerna melala kel si enggo lakokenna.
9 Suruhna murid-muridna nikapken sada perahu si kitik man bana gelah ula ia kicat iban jelma si enterem e.
10 Perban enggo enterem kalak si pepalemna, kerina kalak si mekelek penakitna siasak-asaken guna ngkuit ia.+
11 Malekat-malekat jahat pe+ sujud tiap jumpa ras Jesus janah nina alu sora megang, “Kam kap Anak Dibata.”+
12 Tapi piga-piga kali alu tegas persingetina malekat jahat e gelah ula ceritakenna kerna ia.+
13 Nangkih Jesus ku sada gunung, lebuhna kalak si pilihna,+ ikutken kalak e ia.+
14 Jenari banna* sada kelompok si buena 12 kalak, si igelarina ka rasul-rasul. Kalak enda me si nemani ia janah si suruhna pagi erberita,
15 ras berekenna kuasa guna mpelawes malekat-malekat jahat.+
16 Si 12 kalak bas kelompok+ si banna e, eme Simon, si igelarina ka Petrus,+
17 Jakup anak Sebedeus ras Johanes senina Jakup (gelarina ka kalak e Boanergis, si ertina “Anak-Anak Lenggur”),+
18 Andreas, Pilipus, Bartolomeus, Matius, Tomas, Jakup anak Alpeus, Tadius, Simon kalak Kanani,*
19 ras Judas Iskariot, si bas pudi wari erhianat man Jesus.
Kenca bage masuk ia ku sada rumah,
20 rehen ka enterem jelma ku je, dungna man pe kalak e lanai sempat.
21 Sanga begi keluargana kerna si e, reh kalak e guna maba Jesus. Sebap nina kalak e, “Enggo adon ia.”+
22 Selain si e, ahli-ahli Undang-Undang Musa si reh arah Jerusalem nari ngataken, “Lit bas ia Balsebul,* pelawesna malekat-malekat jahat alu penampat penguasa malekat jahat e.”+
23 Emaka kenca lebuhna kalak e, ngerana ia alu perumpaman,* “Uga Setan banci mpelawes Setan?
24 Adi terjadi perpecahen bas sada kerajan, kerajan e la banci ertahan;+
25 janah adi terjadi perpecahen bas sada rumah tangga, rumah tangga e labo banci ertahan.
26 Selain si e, adi Setan ngelawan dirina sendiri janah terjadi perpecahen bas kerajanna, la banci ia ertahan tapi dung pagi ia.
27 Ise pe si masuk ku rumah kalak si megegeh la banci nangko erta-ertana adi la kin iketna lebe kalak si megegeh e. Alu bage maka banci rampokna isi rumahna e.
28 Situhuna kukataken man kena, kerina perbahanen manusia iampuni nge pagi, la soal dosa kai si lakokenna ras penghinan kai si belaskenna.
29 Tapi ise pe si hinana kesah si badia, asa ndigan pe la banci iampuni+ perban dosa e dosa si rasa lalap.”+
30 Kataken Jesus bage perban nina kalak e, “Lit bas ia malekat jahat.”+
31 Kenca si e, reh mamak Jesus ras senina-senina,+ tedis kalak e i darat janah suruhna kalak ngelebuh ia.+
32 Kalak si enterem si kundul i sekeliling Jesus ngataken, “Mamakndu ras senina-seninandu sangana i darat ndarami kam.”+
33 Tapi ngaloi ia, “Ise kin mamakku ras senina-seninaku?”
34 Kenca si e nenna kerina kalak si kundul i sekelilingna janah nina, “Enda kap mamakku ras senina-seninaku!+
35 Ise pe si ndalanken peraten Dibata, ia kap seninaku, turangku, ras mamakku.”+
Cataten i teruh
^ Ntah “tetapkenna.”
^ Ntah “kalak si semangat.”
^ Penggelaren man Setan.
^ Ntah “anding-andingen.”
