Markus 4:1-41
4 Ngajar ka Jesus mulihi i tepi laut, enterem kel kalak pulung i deherna. Emaka nangkihina sada perahu janah kundul ia i je, miser ia sitik terdauhen i pantai nari, tapi kalak si enterem e tetap i pantai.+
2 Mulai ia ngajar, melala si ajarkenna alu perumpaman*+ man kalak e, nina,+
3 “Begiken. Lit sekalak perjuma lawes guna ngambur benih.+
4 Sanga amburkenna benih e, lit si ndabuh i tepi dalan, jenari reh perik-perik manganisa ngasa keri.
5 Lit ka si ndabuh ku taneh si erbatu-batu, si la mbue tanehna, mis turah benih e perban la mbages tanehna.+
6 Tapi kenca kena las matawari, mis melus janah kerah sinuan-sinuan e sebap la mbages uratna.
7 Lit ka benih si ndabuh ku peren duri, sanga reh galangna peren e, talu banna sinuan-sinuan e, emaka la banci ia erbuah.+
8 Tapi lit ka benih si ndabuh ku taneh si subur, turah ia janah reh galangna, mulai ia erbuah, hasilna lit si 30, 60, ras 100 kali lipat.”+
9 Nina ka, “Ise pe si ercuping, begikenlah.”+
10 Sanga sisada Jesus, nungkun piga-piga murid ras 12 rasulna kerna perumpaman ndai.+
11 Ngaloi Jesus, “Man kena enggo ibereken rahasia si badia+ kerna Kerajan Dibata, tapi man kalak si deban terjeng perumpaman saja ngenca si begina,+
12 emaka amin pe nenna, tetap la idahna, amin pe begina, tetap la angkana. Kalak e pe la pernah mulihken ku Dibata, alu bage la iampuni.”+
13 Kenca si e nina, “Adi perumpaman enda pe la angka kena, uga banci angka kena kerina perumpaman si deban?
14 “Si amburken perjuma e eme kata Dibata.+
15 Piga-piga kalak bagi benih si ndabuh i tepi dalan, mis kenca begina kata Dibata e, reh Setan+ buatna kata Dibata si enggo iamburken man kalak e.+
16 Si debanna, bagi benih si ndabuh ku taneh si erbatu-batu, mis kenca begina kata Dibata e, alokenna alu ermeriah ukur.+
17 Tapi benih e la rurat bas dirina, janah la tahan ndekah. Reh kenca kiniseran ntah pe penindasen perban kata Dibata e, mis bene kinitekenna.
18 Lit ka benih si deban si ndabuh ku tengah-tengah peren duri. Enda me kalak si enggo megi kata Dibata,+
19 tapi perban kuatir+ ia kerna kegeluhen i doni* enda, janah perban itipu kebayaken,+ bage pe perban kerina sura-sura+ si deban masuk ku bas pusuhna, dungna kicat kata Dibata e janah lanai erbuah.
20 Si pendungi, benih si ndabuh ku taneh si subur eme kalak si megiken kata Dibata e, alokenna alu mehuli, janah erbuah 30, 60, ras 100 kali lipat.”+
21 Nina ka, “Me labo tama kalak lampu i teruh keranjang* ntah pe i teruh ingan medem? La kin arusna itama bas ingan lampu?+
22 Sebap kerina si terbuni teridah nge pagi, janah kerina si tertutup alu rapat terbuka nge pagi.+
23 Ise pe si ercuping, begikenlah.”+
24 Kenca si e nina man kalak e, “Perdiatekenlah kai si begi kena.+ Asa kai buena si bereken kena, bage ka me si aloken kena, janah terbuen ka pe.
25 Sebap ise pe si lit bas ia ibereken pagi terbuen,+ tapi ise pe si la lit bas ia, si lit bas ia e pe ibuat ka arah ia nari.”+
26 Terusken Jesus ngerana nina, “Kerajan Dibata e bagi kalak si ngambur benih ku taneh.
27 Tiap berngi medem ia, janah erpagi-pagi medak ia, turah me benih e janah reh ganjangna. La tehna uga e terjadi.
28 Alu manjar-anjar taneh e ngasilken buah, tangtangna ertangke, kenca si e reh ruhina,* dungna erbuah.
29 Tapi kenca metua buahna, mis isabina, perban enggo seh waktuna rani.”
30 Katakenna ka, “Alu kai kin Kerajan Dibata e banci sipeseri, ntah alu perumpaman kai banci sijelasken?
31 Enda bagi sada benih sawi, si sanga iamburken ku taneh, ia me benih si kitikna bas kerina benih i doni.+
32 Tapi kenca enggo iamburken, turah ia, galangen asangken kerina gulen-gulen si debanna janah ngasilken dahan-dahan si galang, emaka perik-perik i langit banci rasar ras cilinggem i je.”
33 Alu melala perumpaman+ si bage me pebetehkenna kata Dibata man kalak e, sesuai ras kengasupen kalak e ngangkaisa.
34 Adi la arah perumpaman labo kai pe katakenna man kalak e, tapi man murid-muridna katakenna kerina alu jelas.+
35 Bas wari e, paksa berngi, nina Jesus man murid-muridna, “Ota kita nyebrang ku pantai si deban.”+
36 Emaka kenca suruhna jelma si enterem e mulih, baba murid-murid me Jesus alu perahu, janah lit ka perahu-perahu si deban si ikut ras ia.+
37 Kenca si e reh angin badai, terus entam gelombang-gelombang perahu e, dungna menam gedap.+
38 Tapi Jesus sangana medem arah pudi bas perahu e, amparkenna takalna i datas bantal. Emaka medaki kalak e ia janah nina, “O Guru, la kin idahndu enggo mate atena kita e?”
39 Medak ia janah sergangna angin e, nina man laut, “Sinikken! Tenanglah!”+ Emaka ngadi angin e, janah kerinana enggo seh kel tenangna.
40 Nina, “Engkai maka mbiar kel kena? Lenga kin lit kiniteken kena?”
41 Tapi reh biarna kel kalak e, janah nina man sada ras si debanna, “Ise kin situhuna ia? Angin ras laut pe patuh man bana.”+
