Markus 5:1-43
5 Kenca si e seh kalak e i sebrang laut i daerah kalak Gerasa.+
2 Ndarat kenca Jesus bas perahu nari, reh sekalak dilaki si irasuki malekat jahat arah kuburen nari ndahi ia.
3 Tading ia bas kuburen-kuburen janah seh ngasa paksa si e, ise pe la ngasup ngiket ia, pake rante pe la banci.
4 Nahe ras tanna enggo rusur iiket alu rante, tapi retapkenna ras cedakenna rante e. Ise pe la ngasup naluken ia.
5 La erngadi-ngadi, suari ras berngi, serko ia bas kuburen-kuburen bage pe bas gunung-gunung janah lukaina bana alu batu.
6 Tapi sanga idahna Jesus dauh-dauh nari, kiam ia janah sujud man bana.+
7 Kenca si e serko ia alu sora si megang, “O Jesus, Anak Dibata Si Meganjangna, kai kin atendu? Ersumpahlah bas gelar Dibata maka labo siksandu aku.”+
8 Sebap enggo kataken Jesus man bana, “O malekat jahat, ndaratlah arah dilaki e nari.”+
9 Tapi sungkun Jesus ia, “Ise gelarndu?” Nina ngaloi, “Gelarku Legiun,* sebap enterem kami.”
10 Pindo malekat-malekat jahat e kel man Jesus gelah ula ia ipelawes bas daerah e nari.+
11 Paksa si e lit sada rarasen babi+ sangana man i gunung.+
12 Emaka mindo kel malekat-malekat jahat e man bana, nina, “Suruhlah kami masuk ku babi-babi ah.”
13 Emaka pediatna. Jenari ndarat malekat-malekat jahat e janah masuk ku babi-babi si buena lit kira-kira 2.000. Kiamen kerina babi e ku tebing jenari ndabuhen ku laut, dungna mate gedap kerina.
14 Tapi permakan-permakan babi e kiam janah ceritakenna kerna si e i kota ras daerah i sekelilingna, emaka rehen kalak ngenen kai si enggo terjadi.+
15 Dahi kalak e Jesus janah idahna dilaki si irasuki legiun ndai, sangana kundul janah enggo ruis ras enggo jore ukurna, emaka mbiar kel kalak e.
16 Ceritaken kalak si ngidah kejadin e man kalak si reh kerna kai si terjadi man kalak si kerasuken ndai ras babi-babi e.
17 Emaka mindo kel kalak e man Jesus gelah lawes ia arah daerah kalak e nari.+
18 Sanga Jesus nangkih ku perahu, mindo kel dilaki si irasuki ndai gelah ikut ras ia.+
19 Tapi la pediatna janah nina, “Mulihlah ku keluargandu, janah ceritaken man kalak e kerina si enggo lakoken Jahwe* man bandu ras perkuah ate si enggo cidahkenNa man bandu.”
20 Lawes dilaki e, beritakenna i Dekapolis* kerina si enggo lakoken Jesus man bana, janah jengang kerina kalak e.
21 Jesus nyebrang mulihi alu perahu ku pantai si deban. Sanga ia i pantai denga, enterem kalak reh ndahi ia.+
22 Salah sada kepala ingan pulung kalak Jahudi* si gelarna Jairus reh ku je. Sanga idahna Jesus, sujud ia,+
23 mindo kel ia, nina, “Anakku si diberu si kitik denga mekelek kel penakitna.* Reh min kam janah tamaken tanndu ku datasna+ gelah banci ia malem ras tetap nggeluh.”
24 Emaka lawes Jesus ras ia, enterem jelma siasak-asaken ngikutkenca.
25 I je, lit sekalak diberu si enggo 12 tahun+ pendarahen.+
26 Enggo ertambar ia ku melala dokter, mesui kel akapna iban kalak e. Enggo melala keri senna, amin bage la ia malem-malem tapi reh kelekna.
27 Sanga begina berita kerna Jesus, reh ia ku tengah-tengah jelma si enterem e, deherina Jesus pudi nari, kenca si e dadapna uis Jesus si arah darat,+
28 sebap terus katakenna, “Kudadap saja pe uisna si arah darat e, tentu malem nge aku.”+
29 Mis ngadi pendarahenna e. Gejapkenna dagingna enggo malem bas penakitna si mekelek e nari.
30 Mis teh Jesus lit kuasa+ ndarat arah ia nari, emaka tulihkenna ku jelma si enterem e janah nina, “Ise si ndadap uisku?”+
31 Tapi nina murid-muridna, “Idahndu enterem kalak siasak-asaken ndeheri kam, engkai maka sungkunndu ka, ‘Ise si ndadap aku?’”
32 Tapi inenna ku sekelilingna guna meteh ise si ndadapsa.
33 Mbiar janah nggirgir diberu e, perban tehna kai si enggo terjadi man bana. Emaka reh ia janah sujud i lebe-lebe Jesus jenari ceritakenna uga situhuna.
34 Nina man diberu e, “O Nakku, kinitekenndu enggo erban kam malem. Laweslah alu dame,+ malemlah kam arah penakitndu si mekelek e.”+
35 Sanga Jesus ngerana denga, reh piga-piga kalak arah rumah Jairus nari janah nina, “Anakndu enggo mate! Man kai nari ngelatihi Guru ena?”+
36 Tapi kenca begi Jesus ranan kalak e, nina man Jairus, “Ula mbiar, erkiniteken sajalah.”+
37 Ise pe la pediatna ikut selain Petrus, Jakup, ras Johanes senina Jakup.+
38 Emaka sanga seh kalak e bas rumah Jairus, idahna enterem jelma gejek janah ngandung ras nderkuh.+
39 Kenca masuk, nina man kalak e, “Engkai maka kena ngandung ras gejek? Anak enda labo mate, medem nge ia.”+
40 Emaka tawai kalak e Jesus. Tapi kenca suruhna kalak e kerina ndarat, babana bapak ras mamak anak e bage pe murid-murid si ikut ras ia masuk ku bas ingan anak e.
41 Sanga jemakna tan anak e nina, “Talita kumi,” adi iterjemahken, ertina: “O anak diberu, kukataken man bandu, kekeken!”+
42 Mis keke anak e janah erdalan. (Umurna 12 tahun.) Lanai tanggung riahna ukur kalak si lit i je.
43 Tapi perentahken Jesus alu tegas* gelah ula ceritaken kalak e man ise pe kerna si e,+ janah suruhna gelah anak e ibere man.
Cataten i teruh
^ Ntah “Wilayah Sepuluh Kota.”
^ Ntah “denga menam mate.”
^ Ntah “Tapi mulih-ulih perentahkenna.”
