Markus 6:1-56
6 Lawes Jesus arah ingan e nari, seh ia i kutana,+ murid-muridna pe ikut ras ia.
2 Sanga wari Sabat, mulai ia ngajar bas ingan pulung kalak Jahudi,* takjup jelma si enterem megiken ia, nina, “Ja nari nge datna kerina e?+ Engkai maka melala kel si tehna? Ise si mereken kuasa man bana maka banci banna perbahanen si dem kuasa si bage?+
3 La kin ia tukang kayu,+ anak Maria?+ La kin seninana nge Jakup,+ Jusup,* Judas, ras Simon?+ La kin turangna pe ras kita nge?” Emaka la aloken kalak e Jesus.*
4 Tapi nina Jesus, “I japa pe nabi ihamati tapi bas kutana, kade-kadena, ras bas keluargana lang.”+
5 Emaka la ia banci ngelakoken perbahanen si dem kuasa i je, selain namaken tanna ku datas piga-piga kalak si sakit janah mpepalem kalak e.
6 Mamang kel ate Jesus sanga idahna kalak e la erkiniteken. Jenari keliling ia i kuta-kuta guna ngajar.+
7 Lebuhna 12 rasulna, suruhna lawes dua-dua kalak,+ berena man kalak e kuasa mpelawes malekat-malekat jahat.+
8 Perentahkenna gelah kai pe ula baba kalak e bas perdalanen selain tongkat. Ula baba kalak e roti, ingan pangan, bage pe sen.*+
9 Tapi make selop janah ula baba dua baju.*
10 Nina ka, “Ku rumah ise pe kena masuk, tadinglah i je ngasa kena lawes arah ingan e nari.+
11 Adi bas sada ingan la lit si ngalo-ngalo kena ntah pe megiken kena, sanga lawes kena je nari, agui abu bas nahe kena gelah jadi kesaksin man kalak e.”+
12 Kenca si e, lawes rasul-rasul e, beritaken kalak e gelah kalak ertobat,+
13 pelawesna ka melala malekat jahat,+ sapukenna minak man enterem kalak sakit, ras pepalemna kalak e.
14 Begi Raja Herodes kerna si e, sebap gelar Jesus enggo terberita, janah lit si ngataken, “Johanes Peridiken enggo ipekeke arah si mate nari, e me sebapna perbahanen-perbahanen si dem kuasa e banci lakokenna.”+
15 Tapi si deban ngataken, “Ia Elia.” Si debanna ka ngataken, “Ia nabi bagi nabi si mbarenda.”+
16 Tapi sanga begi Herodes kerna si e, nina, “Johanes si kupotong kerahungna mbarenda enggo ipegeluh mulihi.”
17 Herodes enggo ngempoi Herodias eme diberu Pilipus, seninana. Perban Herodias, suruh Herodes kalak nangkap Johanes ras garina bas penjara.+
18 Perban enggo rusur kataken Johanes man Herodes, “La banci empoindu diberu seninandu.”+
19 Emaka dendam kel Herodias man Johanes, bunuhna tena ia, tapi la banci.
20 Tapi Herodes mbiar man Johanes. Tehna ia kalak si benar ras badia,+ emaka lindungina ia. Tiap begikenna Johanes, lanai tehna kai si arus lakokenna, tapi lalap meriah kapna megikensa.
21 Bas sada wari lit kesempaten Herodias, eme sanga ban Herodes pesta bas wari ulang tahunna+ guna pejabat tinggi ras komandan-komandan militerna bage pe kalak si pentingna i Galilea.+
22 Reh anak Herodias si diberu, landek ia, meriah kel ukur Herodes bage pe kalak si man ras ia. Nina raja man anak e, “Kai pe pindondu, pasti kubereken.”
23 Ersumpah ka ia, “Kai pe pindondu, pasti kubereken, seh ngasa setengah kerajanku enda pe kubere.”
24 Dahina mamakna, nina, “Kai kupindo, Mak?” Nina mamakna, “Takal Johanes Peridiken.”
25 Mis dahi anakna e raja janah mindo ia, nina, “Bereken min bangku gundari takal Johanes Peridiken bas talam.”+
26 Amin pe sedih kel akap raja, la tena nulak pemindonna e, perban sumpahna ras perban tamu-tamuna.
27 Mis suruh raja sekalak pengawal, perentahkenna gelah ibaba takal Johanes. Lawes pengawal e, potongna kerahung Johanes bas penjara,
28 babana takalna e bas talam. Berekenna man singuda-nguda ndai, jenari bereken singuda-nguda e man mamakna.
29 Sanga begi murid-murid Johanes kerna si e, reh kalak e muat mayatna jenari kuburkenna.
30 Pulung rasul-rasul i sekeliling Jesus, ceritaken kalak e man bana kerina si enggo lakoken kalak e ras si ajarkenna.+
31 Nina Jesus man kalak e, “Ota kita ku ingan si melungen, ngadi kita ntisik.”+ Perban enterem kalak si reh ras lawes, la lit waktu kalak e ngadi-ngadi, man pe kalak e la sempat.
32 Jenari naik perahu kalak e guna lawes ku ingan si melungen.+
33 Tapi lit si ngidah kalak e lawes janah enterem ka si metehsa. Emaka kiam jelma si enterem e bas kerina kota nari janah leben kalak e seh i je.
34 Kenca nusur perahu nari, idah Jesus enterem kel jelma, mekuah atena man kalak e,+ perban kalak e bagi biri-biri si la lit permakanna.+ Mulai ajarina kalak e janah melala si ajarkenna.+
35 Sanga si e enggo ben, dahi murid-muridna ia, ning kalak e, “Ingan enda melungen, wari pe enggo ben.+
36 Suruhlah kalak e lawes gelah tukurna panganna i kuta-kuta si ndeher jenda nari.”+
37 Nina Jesus, “Kena saja si mere kalak e man.” Ngaloi murid-muridna, “Arus kin kami lawes nukur roti si ergana 200 dinar* janah bereken kami kalak e man?”+
38 Nina Jesus, “Nen kena cuba! Piga roti si lit bas kena?” Kenca nen kalak e, nina, “Lima, lit ka dua ikan.”+
39 Suruh Jesus kerina kalak e kundul erkelompok-kelompok datas dukut.+
40 Kundul kalak e erkelompok-kelompok, lit si 100, lit ka si 50.
41 Buat Jesus lima roti ras dua ikan e, tatapna ku langit, ertoto ia.+ Kenca si e, cepik-cepikkenna roti e, berekenna man murid-murid gelah ibagiken man kalak si i je. Bagi-bagina ka dua ikan e man kerinana.
42 Emaka kerina kalak e man ngasa besur.
43 Pepulung kalak e sisana, dem 12 keranjang, lenga termasuk ikan.+
44 Si man roti e lit 5.000 dilaki teremna.
45 Kenca si e, mis suruh Jesus murid-muridna nangkih ku perahu gelah leben kalak e nyebrang ku Betsaida. Jelma si enterem e suruhna mulih.+
46 Kenca lawes kalak e, naik ia ku gunung guna ertoto.+
47 Wari enggo gelap, sisada Jesus i je, tapi perahu murid-muridna enggo seh i tengah laut.+
48 Sanga idah Jesus mesera akap murid-muridna ndayung perahu perban kalak e ngelawan angin, dahina kalak e sanga nandangi erpagi-pagi,* erdalan ia i datas laut. Tapi tempa-tempa lewatina atena kalak e.
49 Sanga idah kalak e erdalan ia datas laut, serko kalak e, “Kai ah!”
50 Kerina kalak e mbiar ngidah ia. Tapi mis nina man kalak e, “Tenang kena! Aku nge enda, ula kena mbiar.”+
51 Nangkih ia ku perahu, dungna ngadi angin e. Ngidah si e jengang kel kalak e,
52 sebap erti mukjizat roti ndai pe lenga angkana. Pusuh kalak e terus la erpengangka.
53 Kenca kalak e nyebrang, seh kalak e i Genesaret, iketken kalak e perahuna i je.+
54 Tapi nusur kenca kalak e perahu nari, mis tandai jelma si enterem e Jesus.
55 Kiam kalak e ngatakenca man kalak si lit bas kerina daerah e. Baba kalak e kalak si sakit alu ingan medemna ku Jesus.
56 Ku kuta ntah ku kota si apai pe ia masuk, taruhken kalak e kalak si sakit ku pajak-pajak. Mindo kalak e man Jesus gelah banci dadap kalak e ujung uisna si arah darat sajalah gia.+ Kerina si ndadapsa malem.
Cataten i teruh
^ Ntah “Joses.”
^ As. “Emaka mulai kalak e tertuktuk perban ia.”
^ As. “tembaga.”
^ Ntah “baba baju ganti.”
^ As. “sanga giliren jaga si peempatken.” Enda kira-kira jam 3-6 erpagi-pagi.
