Masmur 109:1-31
Man peminpin musik. Lagu si iban Daud. Sada lagu.
109 O Dibata si kupuji,+ ula Kam sinik saja.
2 Kalak jahat ras perbual nyerang aku alu rananna.
Cakapkenna si la tuhu kerna aku.+
3 Kelilingi kalak e aku alu ranan si jahat,Janah serang kalak e aku amin pe la lit sebapna.+
4 Kekelengenku balas kalak e alu tuduhen,+Tapi terus aku ertoto.
5 Kiniulinku balas kalak e alu kejahaten,+Janah kekelengenku balasna alu segat ate.+
6 Mbera-mbera kalak jahat si ngadili ia,Mbera-mbera lit si nuduh* ia i sebelah kananna.
7 Mbera-mbera ikataken ia ersalah* sanga iadili,Mbera-mbera totona ianggap jadi dosa.+
8 Mbera-mbera ipegendek umurna,+Mbera-mbera buat kalak si deban jabatenna selaku pengawas.+
9 Pediatlah anak-anakna lanai erbapa,Janah diberuna jadi janda.
10 Mbera-mbera anak-anakna jadi pemindo-mindo,Ndarami pangan i rumahna si enggo runtuh.
11 Mbera-mbera kalak si nagih utangna ngerampas* kerina si lit bas ia,Janah kalak si la itandai ngerampas ertana.
12 Mbera-mbera la lit kalak si rate mekuah man bana,*Janah la lit kalak si rate mekuah man anak-anakna si enggo lanai erbapa.
13 Pediatlah keturunen kalak e ikernepken,+Mbera-mbera gelar kalak e ilupaken seh ku keturunenna.
14 Mbera-mbera inget Jahwe kesalahen nini bulangna,+Janah dosa mamakna la ihapus.
15 Mbera-mbera lalap inget Jahwe perbahanen kalak e,Mbera-mbera imasapken gelar kalak e arah doni nari.+
16 Sebap kalak si bage la ingetna erban si mehuli,*+Tapi terus ayakina kalak si tertindas,+ si mesera,Bage pe si getem pusuhna guna munuhsa.+
17 Meriah akapna numpahi kalak, emaka ia si kena sumpah,La ia nggit masu-masu, emaka la datna pasu-pasu.
18 Banna sumpah jadi bajuna.
Sumpah e meresap ku dagingna bagi lau,Janah ku tulan-tulanna bagi minak.
19 Mbera-mbera sumpahna e bagi baju si ipakena,+Bagi ikat pinggang si lalap ipakena.
20 Enda ndai me balasen arah Jahwe nari man kalak si ngelawan aku,+Ras si ngataken kai si jahat kerna aku.
21 O Jahwe Tuhan Si Meganjangna,Sampati min aku guna gelarNdu.+
Selamatken min aku, perban mehuli kap kekelengenNdu si setia e.+
22 Sebap aku kalak mesera janah la ergegeh,+Janah luka pusuhku.+
23 Menam-menam aku mate bali bagi bayangen si bene,Ikisamken aku bagi labang.
24 Tiwenku lemas perban puasa,Dagingku kertang tading tulan.
25 Ise pe si ngidah aku, tawa ia.+
Geleng-geleng kepala kalak e sanga idahna aku.+
26 O Jahwe Dibataku, sampati min aku,Selamatken min aku perban kekelengenNdu si setia.
27 Mbera-mbera teh kalak e maka tanNdu kap si nelamatken aku,O Jahwe, kam kap si ngelakokenca.
28 Mbera-mbera pasu-pasuNdu aku adi sumpahi kalak e aku.
Mbera-mbera kalak e ipermelaken adi serang kalak e aku,Janah mbera-mbera ermeriah ukur pelayanNdu.
29 Mbera-mbera kalak si ngelawan aku erbajuken perasan hina,Mbera-mbera ia erjubahken perasan mela.+
30 Semangat pagi aku muji Jahwe,Kupuji pagi Ia i lebe-lebe jelma si enterem.+
31 Sebap tedis Ia i sebelah kanan kalak meseraGuna nelamatken ia arah kalak si ngakimi ia.
Cataten i teruh
^ Ntah “ngelawan.”
^ Ntah “jahat.”
^ Ntah “Mbera-mbera ipasang rentenir jebaken man.”
^ Ntah “si engkelengi ia alu setia.”
^ Ntah “la ingetna ncidahken kekelengen si setia.”