Masmur 147:1-20
147 Pujilah Jahwe!*
Mehuli kap rende* muji Dibatata,Patut kel Ia ipuji janah seh kel senangna muji Ia.+
2 Bangun Jahwe Jerusalem.+
BabaNa mulih kalak Israel si itaban.+
3 PepalemNa kalak si getem pusuhNa,BalutiNa luka kalak e.
4 KiraNa jumlah bintang-bintang,LebuhNa kerina bintang e alu gelarna.+
5 Mulia janah mbelin kap kuasa Tuhanta,+PengertinNa la lit batasna.+
6 Sampati Jahwe kalak si meteruk ukur,+Tapi kalak si jahat sampetkenNa ku taneh.
7 Endekenlah lagu pengatan bujur man Jahwe,Endekenlah lagu pujin janah mainkenlah harpa* man Dibatata,
8 Si nutupi langit alu embun,Si mereken udan man doni,+Si erban turah dukut+ i gunung-gunung.
9 Si mereken pangan man binatang,+Si mereken pangan man anak burung gagak si ciap-ciap.+
10 La ateNa ngena nandangi gegeh kuda,+La Ia takjup man gegeh nahe dilaki.+
11 Ngena ate Jahwe kalak si mbiar man baNa,+Ngena ateNa kalak si nimai kekelengenNa si setia.+
12 Muliakenlah Jahwe, o Jerusalem,Pujilah Dibatandu, o Sion.
13 Paguh banNa pintu-pintu gerbangndu,Pasu-pasuNa anak-anakndu si dilaki.
14 Dame banNa daerahndu,+Puas banNa kam alu gandum si mejilena.+
15 KirimNa perentahNa ku doni,Janah meter kel kata-kataNa terjadi.
16 BanNa nusur salju bagi wol si mbentar,+MerapkenNa embun si beku bagi abu.+
17 PenusurNa udan es bagi pecahen roti.+
Ise si ngasup nahanken bergehna?+
18 Sanga bereNa perentah, es pe cair.
BanNa rembus anginNa+ janah lau pe maler.
19 PesehNa kataNa man Jakup,PeraturenNa ras undang-undangNa man Israel.+
20 La banNa bage man bangsa-bangsa si deban,+La teh kalak e kai pe kerna undang-undangNa.
Pujilah Jahwe!*+
Cataten i teruh
^ Ntah “Haleluya.” As. “Jah.” Jah eme singkaten gelar Jahwe.
^ Ntah “mainken musik.”
^ Harpa eme alat musik si ersenar bagi gitar, tapi bentukna beda.
^ Ntah “Haleluya.” As. “Jah.” Jah eme singkaten gelar Jahwe.