Masmur 33:1-22
33 O kalak si benar, ersuraklah perban Jahwe.+
Kalak si benar patut muji Ia.
2 Katakenlah bujur man Jahwe alu harpa,*Rendelah muji Ia alu alat musik si sepuluh senarna.
3 Endekenlah man baNa lagu si mbaru,+Mainkenlah harpa alu mehuli janah ersuraklah alu meriah ukur.
4 Sebap kai si kataken Jahwe benar,+Kerina si lakokenNa banci terteki.
5 Keleng ateNa kai si benar ras si adil.+
Dem pagi doni alu kekelengen Jahwe si setia.+
6 Alu kata-kata Jahwe, langit iciptaken,+Alu kesah arah babahNa iciptaken kerina* si lit bas langit.
7 PepulungNa lau laut bagi bendungen,+TamaNa lau si ergelombang i gudang-gudang.
8 O belang-belang doni, mbiarlah man Jahwe.+
O kerina penduduk doni, mehamatlah man baNa.
9 Kai pe si katakenNa, kerina terjadi,+Adi bereNa perentah, kerina jadi lit.+
10 Gagalken Jahwe rencana bangsa-bangsa,+GagalkenNa rencana suku-suku bangsa.+
11 Ketetapen Jahwe tahan rasa lalap,+Sura-suraNa lit arah jaman ku jaman.
12 Ermeriah ukurlah bangsa si Jahwe Dibatana,+Ermeriah ukurlah umat si pilihNa jadi jangNa.+
13 Tatap Jahwe arah surga nari,IdahNa kerina manusia.+
14 Arah inganNa nari,PerdiatekenNa penduduk doni.
15 Ia kap si erban pusuh kalak e kerina,PereksaNa kerina pendahin kalak e.+
16 Raja selamat, labo perban buena pasukenna,+Kalak si megegeh selamat, labo perban gegehna.+
17 Kuda labo banci iandalken guna ndatken kemenangen,+Gegehna si mbelin labo banci njamin keselamaten.
18 Tapi mata Jahwe terus mperdiateken kalak si mbiar man baNa,+Si ngarapken kekelengenNa si setia.
19 Guna nelamatken kalak e arah kematenRas njagai kalak e tetap nggeluh sanga terjadi kelihen.+
20 Kita erpengarapen man Jahwe,Ia kap si nampati kita ras si jadi perisaita.*+
21 Meriah ukurta perban Ia,Perban tek kita man gelarNa si badia.+
22 O Jahwe, mbera-mbera kekelengenNdu si setia terus lit ras kami.+
Perban lalap kami ngarap man baNdu.+
Cataten i teruh
^ Harpa eme alat musik si ersenar bagi gitar, tapi bentukna beda.
^ As. “kerina pasukenNa.”
^ Ntah “ampang-ampangta.”
