Masmur 71:1-24
71 O Jahwe, erlindung aku man baNdu.
Mbera-mbera la pernah aku ipermelaken.+
2 Selamatken min aku, bebasken min aku sebap benar kap Kam.
Mungkuk min Kam, begiken min aku janah selamatken aku.+
3 Kam min jadi benteng batu man bangku,Gelah katawari pe banci aku masuk ku bas.
Bereken min perentah guna nelamatken aku,Perban Kam kap tebing batuku ras bentengku.+
4 O Dibataku, selamatken min aku arah tan kalak jahat,+Arah tan kalak si nindas aku, si mekeskes nagangi aku.
5 O Jahwe Tuhan Si Meganjangna, Kam kap arapenku,Tek aku man baNdu mulai kin kitik-kitikku nari.+
6 Kuandalken Kam mulai kin aku lahir,Kam kap si erban aku lahir arah rahim mamakku.+
Lalap Kam kupuji.
7 Enterem kalak si jengang ngidah aku,Tapi aku, Kam kap inganku erlindung.
8 Lalap pagi Kam kupuji,+Gedang-gedang wari kuceritaken kerna kemulianNdu.
9 Ula buangkenNdu aku sanga aku enggo metua,+Ula tadingken aku sanga enggo keri gegehku.+
10 Cakapken musuh-musuhku kai si la mehuli kerna aku,Kalak si atena munuh aku ersekongkol ngelawan aku.+
11 Nina kalak e, “Enggo tadingken Dibata ia.
Ayaki ia janah tangkap ia, sebap labo lit si nampatisa.”+
12 O Dibata, ula Kam ndauh arah aku nari.
O Dibataku, meter min sampatiNdu aku.+
13 Mbera-mbera kalak si ngelawan aku,Ipermelaken ras ikernepken.+
Mbera-mbera kalak si atena ncilakai aku,Ipermelaken ras ihina.+
14 Tapi aku, lalap pagi Kam kutimai,Lalap pagi Kam kupuji.
15 Gedang-gedang wari, kuceritaken pagi perbahanenNdu si benar,+Bage pe keselamaten si berekenNdu,Amin pe seh kel buena janah la terkira aku.+
16 O Jahwe Tuhan Si Meganjangna,Reh pagi aku guna nceritaken perbahanenNdu si luar biasa,KeadilenNdu saja ngenca pagi si kuceritaken.
17 O Dibata, kitik-kitikku nari enggo ajariNdu aku,+Seh ngasa gundari terus kuberitaken perbahanenNdu si luar biasa.+
18 O Dibata, ula tadingkenNdu aku amin pe aku enggo metua ras ubanen.+
Pediatlah kuceritaken kerna kuasaNdu man keturunen si nandangi reh,Bage pe kerna gegehNdu man kerina keturunen si nandangi reh.+
19 O Dibata, luar biasa kerina perbahanenNdu si benar,+Luar biasa kel si enggo lakokenNdu,O Dibata, ise kin si bagi Kam?+
20 Amin pe pediatNdu aku ngenanami melala masalah ras kesusahen,+Tapi banNdu aku megegeh mulihi,PedaratNdu aku arah ingan* si mbages si lit i doni.+
21 Mbera-mbera banNdu aku reh muliana,Mbera-mbera lindungiNdu aku janah apuliNdu.
22 O Dibataku, kumainken pagi alat musik si ersenar,Guna muji Kam perban kesetianNdu.+
Kuendeken pagi pujin alu harpa,*O Dibata Si Badia Israel.
23 Meriah pagi ukurku muji Kam,+Perban enggo selamatkenNdu geluhku.+
24 Gedang-gedang wari kucakapken* pagi kerna kebenarenNdu,+Sebap kalak si atena munuh aku ipermelaken pagi ras ihina.+
Cataten i teruh
^ Ntah “lau.”
^ Harpa eme alat musik si ersenar bagi gitar, tapi bentukna beda.
^ Ntah “kuukuri.”
