Matius 10:1-42
10 Dilo Jesus murid-muridna si 12 kalak e, berekenna man kalak e kuasa guna mpelawes malekat-malekat jahat+ ras mpepalem kerina penakit bage pe kerina masalah kesehaten.
2 Gelar rasul si 12 kalak e eme:+ Si pertama, Simon si igelari ka Petrus,+ ras Andreas+ seninana; Jakup anak Sebedeus ras Johanes+ seninana;
3 Pilipus ras Bartolomeus;+ Tomas+ ras Matius+ si pemungut pajak; Jakup anak Alpeus; ras Tadius;
4 Simon kalak Kanani;* ras Judas Iskariot, si bas pudi wari hianatina Jesus.+
5 Suruh Jesus rasul si 12 kalak e, berekenna petunjuk enda,+ “Ula kena lawes ku daerah bangsa-bangsa si deban. Ula masuk ku kota kalak Samaria.+
6 Tapi laweslah kena ndahi kalak Israel saja si bagi biri-biri si enggo papak.+
7 Sanga kena erberita, kataken, ‘Kerajan surga enggo ndeher.’+
8 Pepalemlah kalak si sakit,+ pegeluh kalak si enggo mate, pepalem kalak si sakit kusta, pelawes malekat-malekat jahat. Aloken kena alu la nggalar, emaka bereken ka alu la ngaloken penggalaren.
9 Ula baba emas ntah pirak ntah tembaga bas kantong duit kena,+
10 ntah ingan pangan bas perdalanen, ntah dua baju,* ntah selop, ntah tongkat,+ sebap kalak si erdahin patut ngaloken upahna.*+
11 “Sanga kena masuk ku kota ntah ku kuta si apai pe, daramilah kalak si nggit ngalo-ngalo kena, tadinglah i je ngasa kena lawes.+
12 Adi masuk kena ku sada rumah, katakenlah, ‘Mejuah-juah!’
13 Adi alo-alona kena bas rumah e, reh me kedamen ku je,+ tapi adi la kena alo-alona, mulihken kedamen e man kena.
14 I japa pe, adi lit kalak si la ngaloken kena ntah pe la megiken kata-kata kena, agui abu si lit bas nahe kena+ sanga tadingken kena rumah ntah pe kota e.
15 Situhuna kukataken man kena, bas Wari Penghakimen pagi, beraten hukumen man kota e asangken man Sodom ras Gomora.+
16 “Perdiatekenlah! Kusuruh kena bagi nuruh biri-biri ku tengah-tengah srigala. Emaka hati-hatilah bagi nipe tapi polos bagi merpati.+
17 Hati-hatilah man manusia, sebap babana pagi kena ku pengadilen setempat,+ cambukna kena+ bas ingan-ingan pulung kalak Jahudi.*+
18 Babana pagi kena ku lebe-lebe gubernur-gubernur ras raja-raja+ perban aku, gelah ersaksi kena man kalak e bage pe man bangsa-bangsa.+
19 Tapi sanga kena iserahken kalak e, ula kena kuatir kerna uga ras kai si arus kataken kena. Ibereken nge pagi man kena kai si arus kataken kena bas paksa si e,+
20 sebap si ngerana labo kena saja, tapi kuasa* Bapak kena si ngerana arah kena.+
21 Selain si e, kalak si ersenina berekenna pagi seninana gelah ibunuh, bage pe bapak nandangi anakna. Anak-anak ngelawan orang tuana janah berekenna gelah ibunuh.+
22 Kerina kalak rate segat pagi man kena perban gelarku.+ Tapi kalak si megenggeng seh ku kedungenna iselamatken pagi.+
23 Adi siksa kalak kena bas sada kota, kiamlah ku kota si deban.+ Situhuna kukataken man kena, kerina kota Israel lenga pagi serser siari kena seh ngasa Anak manusia reh.
24 “Labo ganjangen sekalak murid asangken guruna, labo ganjangen sekalak budak asangken tuanna.+
25 Enggo bias adi murid bali ras guruna, janah budak bali ras tuanna.+ Adi tuan rumah saja igelari Balsebul,*+ apai denga ka kalak si lit bas rumahna!
26 Dage ula mbiar man kalak e, sebap kerina si tertutup, terbuka nge pagi, kerina rahasia tereteh nge pagi.+
27 Si kukataken man kena bas gelap, katakenlah e bas terang, si begi kena alu kusik-kusik, beritakenlah arah atap rumah nari.+
28 Ula mbiar man kalak si banci munuh daging tapi la banci meneken kesah,*+ mbiarlah man Dibata si banci engkernepken daging ras kesah i Gehena.*+
29 La kin dua perik cipcip adi dayaken ergana sada sen logam si kitik* ngenca? Tapi labo sada pe perik e ndabuh ku taneh la teh Bapak kena.+
30 Buk takal kena pe tehNa piga jumlahna.
31 Emaka ula mbiar, ergan nge kena asangken melala perik cipcip.+
32 “Ise pe si ngakui aku i lebe-lebe manusia,+ kuakui ka pagi ia i lebe-lebe Bapakku si i surga.+
33 Tapi ise pe si mersoken aku i lebe-lebe manusia, kupersoken ka pagi ia i lebe-lebe Bapakku si i surga.+
34 Ula akap kena aku reh ku doni enda maba dame. Aku reh labo maba dame, tapi maba pedang.+
35 Aku reh erban perpecahen: anak si dilaki ngelawan bapakna, anak si diberu ngelawan mamakna, permen ngelawan bibi simetuana.+
36 Situhuna, musuh sekalak jelma eme kalak si lit bas rumahna.
37 Ise pe si kelengen atena bapakna ntah mamakna asangken aku, la ia cocok* ras aku. Ise pe si kelengen atena anakna si dilaki ntah si diberu asangken aku, la ia cocok ras aku.+
38 Ise pe si la ngaloken tiang siksanna* janah la ngikutken aku, la ia cocok* ras aku.+
39 Ise pe si nelamatken kesahna,* kebenen kesah pagi, ise pe si kebenen kesahna perban aku, datna nge pagi mulihi.+
40 “Ise pe si ngaloken kena, ngaloken aku ka nge. Ise pe si ngaloken aku, alokenna ka nge Ia si nuruh aku.+
41 Ise pe si ngalo-ngalo nabi perban ia sekalak nabi, alokenna pagi upah nabi.+ Ise pe si ngalo-ngalo kalak benar perban ia kalak si benar, alokenna pagi upah kalak benar.
42 Ise pe si mereken sada cangkir lau mbergeh saja pe man salah sada kalak si kitik enda perban ia muridku, situhuna kukataken man kena, alokenna nge pagi upahna.”+
Cataten i teruh
^ Ntah “kalak si semangat.”
^ As. “pangan.”
^ Ntah “ntah baju ganti.”
^ Ntah “kesah si badia.”
^ Penggelaren man Setan, penguasa malekat jahat.
^ Ntah “kegeluhen,” maksudna arapen kegeluhen bas wari si pepagi.
^ Ntah “metunggung.”
^ Ntah “metunggung.”
^ Ntah “kegeluhenna.”
