Matius 11:1-30
11 Kenca dung Jesus mere petunjuk man 12 murid-muridna, lawes ia ngajar ras erberita bas kota-kota kalak e.+
2 Sanga begi Johanes penjara nari+ berita kerna pendahin Kristus, suruhna murid-muridna+
3 nungkun man Jesus, “Kam kin kalak si nandangi reh e? Ntah timai kami denga kalak si deban?”+
4 Nina Jesus man kalak e, “Dahilah Johanes, kataken man bana kai si begi kena ras si idah kena:+
5 Kalak pentang gundari erpengidah,+ si lumpuh erdalan, si sakit kusta+ ipepalem, si pasek erpemegi, si mate ipekeke, janah berita si meriah iberitaken man kalak mesera.+
6 Ermeriah ukur kap kalak si tek kel man bangku.”*+
7 Sanga lawes kalak e, mulai ceritaken Jesus kerna Johanes man jelma si enterem, nina, “Adi lawes kena ku taneh mesawang,* kai kin si man nehenen kena?+ Peren si embus angin nge?+
8 Kai dage si man nehenen kena ku je? Kalak si mehaga uisna? Kalak si mehaga uisna, inganna bas istana raja.
9 Jadi, engkai maka kena ndarat? Ngenen nabi? Payo, kukataken man kena maka ia lebihen asangken sekalak nabi.+
10 Ia kap si ikataken bas tulisen enda: ‘Kusuruh pagi utusenKu leben asangken kam, ia pagi si nikapken dalan man bandu!’+
11 Situhuna kukataken man kena, Johanes Peridiken kap si mbelinna bas kerina si lahir arah diberu nari, tapi si kitikna bas Kerajan surga belinen asangken ia.+
12 Mulai kin jaman Johanes Peridiken nari seh ngasa gundari, usahaken kalak kel masuk ku bas Kerajan surga, kalak si la nyerah berhasil nge pagi.+
13 Sebap kerina Ajaren Nabi-Nabi ras Undang-Undang Musa ernubuat seh ngasa jaman Johanes.+
14 La soal kena tek ntah lang, ia kap ‘Elia si nandangi reh’ e.+
15 Ise pe si ercuping, begikenlah.
16 “Bagi ise nge ndia kuandingken kalak enda?+ Kalak enda bagi anak-anak si kundul bas pajak si ngelebuh temanna main-main,
17 nina, ‘Enggo embus kami suling tapi la kena landek, endeken kami lagu ceda ate tapi la kena sedih.’*
18 Bage ka me, reh Johanes, la ia man ntah pe minem, tapi nina kalak, ‘Lit bas ia malekat jahat.’
19 Reh Anak manusia, man ras minem ia,+ tapi nina kalak, ‘Nenlah! Ia kalak rangap ras peminem anggur, temanna pe pemungut pajak ras kalak perdosa.’+ Amin gia bage, kepentaren teridah* arah perbahanen.”*+
20 Kenca bage, mulai pandangi Jesus kota-kota si enggo melala lakokenna perbahanen si dem kuasa i je, sebap la kalak e nggit ertobat,
21 nina, “Cilaka kam, o Korasin! Cilaka kam, o Betsaida! Adi i Tirus ras i Sidon min ndai iban perbahanen si dem kuasa si enggo iban i tengah-tengah kena, enggo nai nari kalak e ertobat alu kain guni ras abu.+
22 Tapi kukataken man kena, bas Wari Penghakimen pagi, beraten hukumen kena asangken hukumen man Tirus ras Sidon.+
23 Kam pe, o Kapernaum,+ ipeganjang kin pagi kam seh ku langit? Nusur nge kam pagi ku Kuburen,*+ perban bicara i Sodom min ndai iban perbahanen si dem kuasa si enggo iban i tengah-tengahndu, lit denga min ndai kota e seh ngasa gundari.
24 Tapi kukataken man kena, bas Wari Penghakimen pagi, beraten hukumen kena asangken hukumen man Sodom.”+
25 Paksa si e nina Jesus, “O Bapak, Tuhan si erkuasa i langit ras doni, kupuji Kam i lebe-lebe jelma si enterem, sebap enggo pebetehkenNdu man anak-anak kai si bunikenNdu arah kalak pentar ras erpemeteh.+
26 O Bapak, enda kap si ngena ateNdu.”
27 Nina Jesus ka, “Enggo bereken Bapakku kerinana man bangku.+ Ise pe labo tuhu-tuhu nandai Anak selain Bapak,+ ise pe labo tuhu-tuhu nandai Bapak selain Anak. Bapak banci tuhu-tuhu itandai kalak adi nggit Anak mpebetehkenca kerna Bapak.+
28 Marilah, kena kerina si latih janah beraten, gelah kupegegehi kena.
29 Marilah, erdahinlah ras aku,* erlajarlah arah aku nari, sebap aku mehuli janah meteruk ukur,+ alu bage terpegegehi kena mulihi.
30 Sebap erdahin ras aku* labo mberat, janah babanku menahang kap.”
Cataten i teruh
^ As. “si la tertuktuk perban aku.”
^ Taneh si mbelang si jarang iingani.
^ Ntah “la pekpekindu bandu alu ceda ate.”
^ Ntah “terbukti.”
^ Ntah “hasilna.”
^ As. “Alokenlah pasangenku.” Pasangen eme alat si biasa itama ku kuduk manusia ntah pe binatang guna maba baban.
