Matius 12:1-50
-
Jesus, “Tuan man wari Sabat” (1-8)
-
Dilaki si sembelah tanna lumpuh ipepalem (9-14)
-
Pelayan Dibata si ikelengi (15-21)
-
Malekat jahat ipelawes alu kesah si badia (22-30)
-
Dosa si la banci iampuni (31, 32)
-
Arah buahna itandai batangna (33-37)
-
Tanda Nabi Juna (38-42)
-
Sanga mulih ka malekat jahat (43-45)
-
Mamak Jesus ras senina-seninana (46-50)
12 Paksa si e, erdalan Jesus ngelewati perjuman gandum bas wari Sabat. Putikken murid-muridna gandum e, janah pan kalak e sebap melihe kalak e.+
2 Ngidah si e, nina kalak Parisi man bana, “Nenlah! Murid-muridndu ngelakoken kai si ilarang bas wari Sabat.”+
3 Nina ngaloi, “Lenga kin pernah baca kena kerna kai si lakoken Daud sanga melihe ia ras anak buahna?+
4 Masuk ia ku rumah Dibata janah pan kalak e roti persembahen,+ si arusna la banci panna bage pe anak buahna, perban imam-imam ngenca banci manca.+
5 Ntah, lenga kin baca kena bas Undang-Undang Musa maka sanga wari Sabat, imam-imam bas rumah pertoton erdahin,* tapi la ia ersalah?+
6 Tapi kukataken man kena maka i jenda lit si pentingen asangken rumah pertoton.+
7 Bicara angka kena erti kata-kata enda, ‘Si Kuarapken perkuah ate+ labo korban,’+ labo hakimi kena kalak si la ersalah.
8 Sebap Anak manusia kap Tuan man wari Sabat.”+
9 Kenca bage, lawes Jesus ku ingan pulung* kalak e.
10 I je lit sekalak dilaki si sembelah tanna lumpuh.+ Emaka nungkun kalak e man Jesus guna ndarami kesalahenna, “Menurut undang-undang, banci kin kalak sakit ipepalem bas wari Sabat?”+
11 Ngaloi ia, nina, “Adi ndabuh sada biri-biri kena ku lubang si mbages bas wari Sabat, la kin tarik kena ku darat?+
12 Manusia ndauh ergan asangken biri-biri. Emaka banci silakoken kai si mehuli bas wari Sabat.”
13 Jenari nina man si lumpuh e, “Pepinter tanndu.” Pepinterna tanna, janah mis malem bagi tanna si sembelah nari.
14 Tapi ndarat kalak Parisi, arih-arih ia guna munuh Jesus.
15 Kenca teh Jesus kerna si e, lawes ia je nari. Enterem si ngikutken ia,+ pepalemna kerina kalak e,
16 tapi alu tegas persingetina kalak e gelah ula ceritakenna kerna ia.+
17 Alu bage terjadi me kai si enggo ikataken arah Nabi Jesaya, nina,
18 “Enda kap pelayanKu+ si enggo Kupilih, ia kap si Kukelengi, si jadi ateKu!+ Kubereken pagi kesahKu man bana,+ ia pagi si erban jelas erti keadilen man bangsa-bangsa.
19 Labo pagi ia rubat+ ntah pe serko, labo pagi terbegi sorana i pasar-pasar si mbelin.
20 Buluh si enggo meripuk la penggelkenna, sumbu lampu si milep-ilep labo matekenna,+ seh ngasa menang banna keadilen e.
21 Situhuna, erpengarapen pagi bangsa-bangsa bas gelarna.”+
22 Jenari taruhken kalak man Jesus sekalak dilaki si irasuki malekat jahat, ia pentang ras bisu. Pepalem Jesus ia, alu bage banci kalak si bisu e ngerana ras erpengidah.
23 Takjup kalak si enterem e, nina, “Banci saja ia kap Anak Daud e!”
24 Megi si e, nina kalak Parisi, “Labo banci pelawesna malekat-malekat jahat adi la kin sampati Balsebul,* penguasa malekat jahat.”+
25 Teh Jesus perukuren kalak e, emaka nina, “Kerina kerajan si lit perpecahen i je, ugapa pe hancur nge. Kota ntah rumah tangga si lit perpecahen i je, labo banci ertahan.
26 Bage ka pe, adi Setan mpelawes Setan, terpecah-pecah kap ia. Adi bage, uga kerajanna banci tetap ertahan?
27 Adi alu penampat Balsebul kin aku mpelawes malekat jahat, alu penampat ise dage pengikut kena mpelawessa? Enda me sebapna kataken pengikut kena pagi kena salah.
28 Tapi adi alu penampat kesah Dibata aku mpelawes malekat jahat, e tandana Kerajan Dibata enggo tuhu-tuhu reh janah la sadari kena.+
29 Ise pe labo banci masuk ku rumah kalak si megegeh guna ngerampasi erta-ertana, pala iketna lebe kalak si megegeh e. Emaka banci rampokna isi rumahna e.
30 Ise si la erpihak man bangku ngelawan aku kap, janah ise si la mpepulung ras aku, erban merap kap.+
31 “Perban si e, kukataken man kena, kerina dosa ras kata-kata penghinan manusia banci iampuni, tapi penghinan man kesah si badia la banci iampuni.+
32 Contohna, ise pe si ngerana nentang Anak manusia banci iampuni,+ tapi ise pe si ngerana nentang kesah si badia la banci iampuni, bas jaman* si gundari lang, bage pe bas wari si pepagi.+
33 “Adi batang kena mejile, buahna pe mejile janah adi batang kena macik, buahna pe macik. Sebap arah buahna itandai kap batangna.+
34 O keturunen nipe si erbisa,+ uga ning kena ngataken si mehuli adi kena pe jahat? Sebap kai si ibelasken rehna bas pusuh nari.+
35 Bas kalak bujur nari ndarat kai si mehuli si lit bas pusuhna, tapi bas kalak jahat nari ndarat kai si jahat si lit bas pusuhna.+
36 Emaka bas Wari Penghakimen pagi, arus pertanggung jawapken manusia+ kerina ranan si la erguna si belaskenna.
37 Sebap, arah rananndu me kam ikataken benar, arah rananndu ka kam ikataken ersalah.”
38 Kenca si e, nina piga-piga ahli Undang-Undang Musa ras kalak Parisi ngaloi, “O Guru, merhat kel kami ngidah tanda bas kam nari.”+
39 Nina Jesus, “O kena kalak si jahat ras la setia,* lalap pindo kena tanda, tapi la lit tanda ibereken selain tanda Nabi Juna.+
40 Telu wari telu berngi dekahna Juna bas beltek ikan si galang,+ bage ka pagi Anak manusia e telu wari telu berngi dekahna bas beltek taneh enda.+
41 Bas Wari Penghakimen pagi, keke me kalak Niniwe ras kalak* enda, katakenna me kalak* enda ersalah, perban kalak Niniwe ertobat sanga begina berita Juna.+ Situhuna, i jenda lit si belinen asangken Juna.+
42 Bas Wari Penghakimen pagi, keke me ratu i selatan nari ras kalak* enda, katakenna me kalak enda ersalah, perban ia reh arah ujung doni nari guna megiken kepentaren Salomo.+ Situhuna, i jenda lit si belinen asangken Salomo.+
43 “Sanga enggo ndarat malekat jahat arah sekalak jelma, lawes malekat jahat e, lewatina ingan-ingan si kerah guna ndarami ingan ngadi tapi la datna.+
44 Kenca si e, nina, ‘Mulihlah aku ku rumahku si enggo kutadingken sange.’ Seh kenca i je, dapetina rumah e la lit si ngianisa tapi enggo bersih isapui ras enggo ipejile.
45 Jenari lawes ia, babana pitu malekat si deban si jahaten asangken ia, masuk ia kerina ku bas, i je ia ringan. Emaka reh kelekna keadan kalak e asangken si sebelumna.+ Bagem pagi jadina kalak jahat si gundari enda.”
46 Sanga ngerana denga Jesus man jelma si enterem e, mamakna ras senina-seninana+ tedis i darat, sebap ngerana atena ras Jesus.+
47 Emaka lit si ngerana man Jesus, “Mamakndu ras senina-seninandu sangana tedis i darat, ngerana atena ras kam.”
48 Ngaloi ia, “Ise kin mamakku? Ise kin senina-seninaku?”
49 Jenari dudurken Jesus tanna ku murid-muridna janah nina, “Enda kap mamakku ras senina-seninaku!+
50 Ise pe si ndalanken peraten Bapakku si i surga, ia kap seninaku, turangku, ras mamakku.”+
Cataten i teruh
^ Ntah “ngelanggar aturen Sabat.”
^ Penggelaren man Setan.
^ As. “ras perlua-lua.”
^ Ntah “kalak si jahat ras la setia.”
^ Ntah “kalak si jahat ras la setia.”
^ Ntah “kalak si jahat ras la setia.”
