Matius 15:1-39
15 Kenca si e, reh piga-piga kalak Parisi ras ahli Undang-Undang Musa arah Jerusalem nari ndahi Jesus,+ nina,
2 “Engkai maka langgar murid-muridndu adat nini bulangta nai? Contohna, la cucina tanna* ope man.”+
3 Ngaloi Jesus, “Engkai maka langgar kena perentah Dibata perban adat kena?+
4 Contohna, nina Dibata, ‘Hamatilah bapakndu ras mamakndu,’+ janah, ‘Ise pe si isakkenna* bapakna ntah pe mamakna arus ibunuh.’+
5 Tapi ning kena, ‘Ise pe si ngataken man bapakna ntah pe mamakna, “Kerina si lit bas aku si banci kugunaken nampati kena eme pemere si ipersembahken man Dibata,”+
6 ia lanai perlu mehamat man bapakna.’ Emaka enggo ban kena kata Dibata la erguna perban adat kena.+
7 O kalak munapik, tuhu kel si nubuatken Jesaya kerna kena,+
8 ‘Hamati bangsa enda Aku alu biberna, tapi pusuhna ndauh arah Aku nari.
9 Sia-sia ia terus nembah Aku, perban si ajarkenna perentah manusia.’”+
10 Kenca si e, lebuhna jelma si enterem e gelah reh deherna janah nina, “Begiken ras angkailah enda:+
11 Labo si masuk ku babah sekalak jelma si erban ia najis, tapi si ndarat arah babahna nari nge si erban ia najis.”+
12 Kenca si e, reh murid-murid janah nungkun man Jesus, “La kin tehndu merawa kalak Parisi megi katandu ena?”+
13 Nina ngaloisa, “Kerina sinuan-sinuan si la isuan Bapakku si i surga icabut nge pagi.
14 Pediat saja kalak e. Kalak e penegu-negu si pentang. Adi kalak pentang negu kalak pentang, ndabuh me ia duana ku lubang.”+
15 Ngaloi Petrus, “Jelasken min erti perumpaman* e man kami.”
16 Kenca si e, nina Jesus, “Kena pe, lalap lenga angka kena?+
17 La kin teh kena maka kai pe si masuk ku babah nusur ku beltek, kenca si e ipedarat ka?
18 Tapi kai pe si ndarat arah babah nari rehna arah pusuh nari, janah e me si erban kalak najis.+
19 Contohna, bas pusuh nari ndarat perukuren si jahat,+ pembunuhen, erlua-lua, perbahanen seks si salah,* nangko, kesaksin si palsu, penghinan.
20 Enda ndai me si erban kalak najis, tapi man ope lenga nuci tan* labo erban kalak jadi najis.”
21 Je nari lawes Jesus ku daerah Tirus ras Sidon.+
22 Kenca si e, sekalak diberu arah Punike nari reh janah nina alu sora megang, “Mekuah min atendu aku Tuan, Anak Daud. Anakku si diberu irasuki malekat jahat, mekelek kel keadanna.”+
23 Tapi la katakenna kai pe man diberu e. Emaka reh murid-muridna janah pindona man Jesus, “Suruhlah ia lawes, perban lalap ia nderkuh man banta.”
24 Nina ngaloi, “Aku isuruh Dibata ndahi kalak Israel ngenca, si bagi biri-biri si enggo papak.”+
25 Tapi reh diberu e janah sujud man bana, nina, “O Tuan, sampati min aku!”
26 Ngaloi ia, “La cocok ibuat roti arah anak-anak nari janah iambekken man anak-anak biang.”
27 Nina diberu e, “Payo Tuan, tapi situhuna anak-anak biang pe man rimah-rimah si ndabuh arah meja tuanna nari nge.”+
28 Kenca si e nina Jesus, “Mbelin kel kinitekenndu. Terjadilah bagi si arapkenndu.” Paksa si e, mis malem anakna ndai.
29 Dung e, lawes Jesus ku deher Laut Galilea.+ Kenca nangkih ku gunung, kundul ia i je.
30 Kenca si e, reh jelma si enterem ndahi ia, baba kalak e kalak si lumpuh, cacat, pentang, bisu, ras enterem si debanna. Amparkenna kalak e i deher nahe Jesus, janah pepalemna kerina.+
31 Emaka jengang jelma si enterem e ngidah kalak si bisu ngerana, si cacat malem, si lumpuh erdalan, janah si pentang erpengidah. Jenari muliaken kalak e Dibata Israel.+
32 Kenca bage, lebuh Jesus murid-muridna janah nina, “Mekuah ateku jelma si enterem e,+ perban enggo telu wari kalak e ras aku, kai pe la lit si man panganenna. La ateku nuruh kalak e mulih adi lenga kin kalak e man, perban banci saja pingsan kari kalak e bas perdalanen.”+
33 Tapi, nina murid-murid e, “Bas ingan si melungen enda, i ja sibuat roti guna mbesuri jelma si bagenda teremna?”+
34 Nina Jesus, “Piga lit roti bas kena?” Nina kalak e, “Pitu, ras piga-piga ikan si kitik.”
35 Emaka kenca suruhna jelma si enterem e kundul i taneh,
36 buat Jesus pitu roti ras ikan ndai, kenca ngataken bujur man Dibata, cepik-cepikkenna. Dung e mulai berekenna man murid-muridna, murid-muridna merekenca man jelma si enterem.+
37 Kerina man ngasa besur janah pepulung kalak e sisana, dem pitu keranjang si galang buena.+
38 Si man lit 4.000 dilaki, lenga termasuk diberu ras anak-anak.
39 Dungna kenca suruhna jelma si enterem e mulih, nangkih ia ku perahu janah lawes ku daerah Magdala.+
Cataten i teruh
^ Maksudna, nuci tan menurut kebiasan kalak Jahudi.
^ Ntah “hinana.”
^ Ntah “anding-andingen.”
^ Maksudna, nuci tan menurut kebiasan kalak Jahudi.
