Matius 16:1-28
16 Reh piga-piga kalak Parisi ras Saduki njumpai Jesus guna nguji ia, pindo kalak e cidahkenna sada tanda arah surga nari.+
2 Ngaloi ia, “Sanga karaben, ning kena, ‘Adi megara langit, mejile nge kari wari,’
3 sanga erpagi-pagi, ning kena, ‘Sendah ugapa pe udan ras mbergeh, perban langit megara tapi embun mekapal.’ Teh kena ngertiken rupa langit, tapi tanda-tanda jaman la banci ertiken kena.
4 Kalak si jahat ras la setia* enda terus mindo tanda, tapi la lit tanda si ibereken+ selain tanda Juna.”+ Kenca si e lawes ia nadingken kalak e.
5 Paksa si e, lawes murid-murid nyebrang janah lupa maba roti.+
6 Nina Jesus man kalak e, “Teruslah buka mata kena, erjaga-jagalah nandangi ragi kalak Parisi ras kalak Saduki.”+
7 Emaka ngerana kalak e sada ras si debanna, “Mungkin bage nina perban la lit sibaba roti.”
8 Meteh si e nina Jesus, “O kena si kitik kinitekenna, engkai maka cakapken kena kerna roti si la baba kena?
9 Lenga kin angka kena, ntah la kin inget kena kerna lima roti si ipan 5.000 kalak ras piga keranjang sisana si pepulung kena?+
10 Bage pe kerna pitu roti si ipan 4.000 kalak ras piga keranjang si galang sisana si ipepulung kena?+
11 Uga maka lenga angka kena adi si kukataken enda labo kerna roti? Tapi erjaga-jagalah nandangi ragi kalak Parisi ras kalak Saduki.”+
12 Dungna angka kalak e maka si cakapken Jesus eme kerna erjaga-jaga nandangi ajaren kalak Parisi ras kalak Saduki, labo nandangi ragi roti.
13 Kenca enggo seh ia i daerah Kesarea Pilipi, nungkun Jesus man murid-muridna, “Nina kalak, ise kin Anak manusia e?”+
14 Ngaloi kalak e, “Piga-piga ngatakenca Johanes Peridiken,+ si debanna Elia,+ ras lit ka si ngatakenca Jeremia ntah salah sada nabi.”
15 Nina Jesus man kalak e, “Adi menurut kena, ise aku?”
16 Jawap Simon Petrus, “Kam kap Kristus,+ Anak Dibata si nggeluh.”+
17 Ngaloi Jesus man bana, “Ermeriah ukur me kam Simon, anak Juna, perban labo manusia* si mpebetehkenca man bandu, tapi Bapakku si i surga nge.+
18 Kukataken ka man bandu, kam kap Petrus,+ i datas batu enda+ pagi kubangun runggunku,* janah gerbang-gerbang Kuburen* pe la banci nalukenca.
19 Kubereken pagi man bandu kunci-kunci Kerajan surga. Kai pe si iketndu i doni enggo iiket i surga, janah kai pe si lepaskenndu i doni enggo ilepasken i surga.”
20 Jenari alu tegas larangna murid-muridna mpebetehken man ise pe maka ia kap Kristus.+
21 Kenca si e, mulai jelasken Jesus man murid-muridna maka arus ia lawes ku Jerusalem janah ngadapi melala kiniseran arah peminpin-peminpin nari, imam-imam kepala, bage pe ahli Undang-Undang Musa jenari ibunuh, janah ipekeke bas wari si peteluken.+
22 Megi si e, tarik Petrus ia ku samping janah persingetina ia, “Mekuahlah atendu bandu, Tuan. Labo terjadi si e man bandu.”+
23 Tapi pudiken Jesus me Petrus janah nina, “Laweslah ku pudiku, Setan! Kam kap si ngambati aku,* perban kai si ukurindu labo perukuren Dibata tapi perukuren manusia.”+
24 Jenari nina Jesus man murid-muridna, “Ise si atena ngikutken aku, lanai banci nggeluh man dirina sendiri, arus angkatna tiang siksanna* janah terus ikutkenna aku.+
25 Sebap ise pe si atena nelamatken kesahna,* kebenen kesahna nge pagi, tapi ise pe si kebenen kesahna* perban aku, datna nge pagi mulihi.+
26 Situhuna, kai kin gunana adi sekalak jelma ndatken kerina si lit i doni enda tapi kebenen kesahna?*+ Kai kin si banci bereken sekalak jelma ganti kesahna?*+
27 Sebap reh pagi Anak manusia ras malekat-malekatna bas kemulian Bapakna, kenca si e balasna tiap kalak menurut perbahanenna.+
28 Situhuna kukataken man kena, lit piga-piga kalak si tedis i jenda si la pagi ngenanami kematen sope idahna Anak manusia reh bas Kerajanna.”+
Cataten i teruh
^ As. “ras perlua-lua.”
^ As. “daging ras dareh.”
^ As. “Kam kap batu si erban aku tertuktuk.”
^ Ntah “kegeluhenna.”
^ Ntah “kegeluhenna.”
^ Ntah “kegeluhenna.”
^ Ntah “kegeluhenna.”
