Matius 17:1-27
17 Enem wari kenca si e, baba Jesus me Petrus ras Jakup bage pe Johanes seninana ku datas gunung si meganjang, kalak e saja ngenca.+
2 Kenca si e, berubah rupa Jesus i lebe-lebe kalak e. Ayona ersinar bagi matawari, janah uisna si arah darat jadi terang* kel.+
3 Rempet idah kalak e Musa bage pe Elia ercakap-cakap ras Jesus.
4 Emaka nina Petrus man Jesus, “O Tuan, meriah ukur kami i jenda. Adi nggit kam, banci kuban telu kemah i jenda: sada man bandu, sada man Musa, sada nari man Elia.”
5 Sanga ia ngerana, rempet lit embun si terang nutupi kalak e, ras terbegi sora arah embun e, “Enda me AnakKu si Kukelengi, ia me si ngena ateKu.+ Begikenlah ia.”+
6 Megi si e, sujud murid-murid perban seh kel biarna.
7 Emaka deheri Jesus kalak e janah dadapna, jenari nina, “Tediskenlah, ula mbiar.”
8 Paksa inen kalak e, ise pe la idahna, Jesus ngenca.
9 Sanga nusur arah gunung e nari, perentahken Jesus kalak e, “Ula kataken man ise pe kerna kai si enggo idah kena e seh ngasa Anak manusia ipekeke arah si mate nari.”+
10 Tapi nungkun murid-murid bana, “Engkai maka nina ahli Undang-Undang Musa, Elia arus reh leben?”+
11 Nina Jesus ngaloi, “Payo, reh pagi Elia janah pesikapna kerinana.+
12 Elia enggo reh, tapi la tandai kalak e ia janah ate-ate kalak e perbahanenna man bana.+ Alu bage ka me Anak manusia pagi ngenanami kiniseran bas tan kalak e.”+
13 Dungna angkai murid-murid maka Johanes Peridiken nge si cakapkenna.
14 Paksa dahi kalak e jelma si enterem,+ reh sekalak dilaki ndeheri Jesus janah sujud i lebe-lebena, nina,
15 “O Tuan, mekuah min atendu anakku si dilaki, perban ia sawanen janah mekelek kel keadanna. Rusur ia ndabuh ku api ras ku lau.+
16 Enggo kubaba ia man murid-muridndu, tapi la banci pepalemna.”
17 Ngaloi Jesus, “O kena kalak si la erkiniteken ras jahat bas jaman enda,+ asa kai nari dekahna aku arus ras kena? Asa kai nari dekahna aku arus sabar man kena? Baba ia ku jenda.”
18 Emaka sergang Jesus malekat jahat e, dungna ndarat ia arah anak e nari. Mis ia malem.+
19 Kenca si e, sanga la lit kalak si deban i je, reh murid-murid ndeheri Jesus, nina, “Engkai maka la banci pelawes kami?”
20 Nina ngaloi, “Perban kitik kiniteken kena. Situhuna kukataken man kena, adi lit kiniteken kena ngasa biji sawi lah gia, banci kataken kena man gunung enda, ‘Miser jenda nari ku jah,’ emaka miser ia, janah kai pe banci lakoken kena.”+
21 * ——
22 Sanga kalak e pulung i Galilea, kataken Jesus man kalak e, “Anak manusia ihianati pagi bas tan musuhna,+
23 janah bunuh kalak e pagi ia. Bas wari si peteluken, ipekeke pagi ia.”+ Emaka sedih kel kalak e.
24 Kenca seh kalak e i Kapernaum, kalak si mpepulung pajak dua drakhma* ndeheri Petrus janah nina, “Galari guru kena nge pajak dua drakhma?”+
25 Nina Petrus, “Galarina.” Tapi, sanga masuk ia ku rumah, leben Jesus ngerana man bana nina, “Uga menurutndu, Simon? Bas ise nari nge raja-raja doni ngaloken iuren ntah pe pajak kepala? Bas anak-anakna nari ntah kalak si deban?”
26 Sanga nina, “Bas kalak si deban nari,” nina Jesus bana, “Adi bage, situhuna anak-anak kalak e bebas pajak.
27 Tapi, perban la ateta erban kalak e merawa,*+ laweslah ngkawil ku laut ras buat ikan si pertama si datndu. Paksa bukandu babahna, datndu kari i je sada logam pirak.* Buatlah e ras bereken man kalak e guna pajakta duana.”
