Matius 18:1-35
18 Sanga si e, reh murid-murid ndeheri Jesus janah nungkun, “Ise situhuna si mbelinna bas Kerajan surga?”+
2 Emaka lebuhna sekalak anak-anak, petedisna ia i tengah-tengah kalak e,
3 jenari nina, “Situhuna kukataken man kena, adi la kena robah janah la kena bagi anak-anak e,+ la kena banci masuk ku bas Kerajan surga.+
4 Emaka, ise pe si peterukna bana bagi anak-anak enda, ia me si mbelinna bas Kerajan surga.+
5 Ise pe si ngaloken anak-anak si bagenda bas gelarku, alokenna ka nge aku.
6 Tapi ise pe si erban bene kiniteken salah sada arah kalak si kitik enda si enggo erkiniteken man bangku, ulin igantungken sada batu penggilingen si galang* ku kerahungna, kenca si e igedapken ia ku bas laut si mbages.+
7 “Cilaka me doni enda perban erban kalak erdosa!* Tuhu la terelakken kai si erban erdosa,* tapi cilaka me kalak si erban kalak si deban erdosa!*
8 Emaka adi tanndu ntah nahendu erban kam erdosa,* potonglah e janah ambekken.+ Ulin sada ngenca tanndu ntah nahendu tapi ndatken kegeluhen* asangken lit dua tanndu ntah pe dua nahendu tapi iambekken ku api si la mate-mate.*+
9 Bage ka pe, adi matandu erban kam erdosa,* cungkillah e janah ambekken. Ulin sada ngenca matandu tapi datndu kegeluhen, asangken lit dua matandu tapi iambekken ku Gehena* si gurlah.+
10 Arah kalak si kitik enda ula sada pe akap kena la merga, sebap kukataken man kena maka malekat-malekatna si i surga lalap lit i lebe-lebe Bapakku si i surga.+
11 * ——
12 “Uga menurut kena? Adi sekalak jelma lit 100 biri-birina janah papak sada,+ la kin tadingkenna si 99 e i gunung jenari lawes ia ndarami si papak e?+
13 Kukataken man kena, pasti riahen ukurna adi datna si sada e asangken si 99 si la papak e.
14 Bage ka pe, Bapakku* si i surga la ateNa papak sada pe arah kalak si kitik enda.+
15 “Adi erban dosa seninandu, laweslah, turiken kesalahenna* sanga kam ngenca ras ia.+ Adi begikenna kam, enggo datndu seninandu e.+
16 Tapi adi la begikenna, babalah sekalak ntah dua kalak nari, sebap sada keterangen ianggap benar adi lit kesaksin arah dua ntah telu kalak saksi.+
17 Adi la begikenna kalak e, katakenlah man runggun. Adi runggun pe la begikenna, pediatlah ia bagi kalak arah bangsa-bangsa si deban+ ras bagi pemungut pajak.+
18 “Situhuna kukataken man kena, kai pe si iket kena i doni enggo iiket i surga, kai pe si lepasken kena i doni enggo ilepasken i surga.
19 Mulihi kukataken man kena, adi dua kalak arah kena nari i doni sada arihna guna mindo kai si penting, pasti bereken Bapakku si i surga.+
20 Sebap i ja lit dua ntah telu kalak si pulung bas gelarku,+ aku lit i tengah-tengah kalak e.”
21 Kenca si e reh Petrus, nina bana, “O Tuan, adi seninaku erdosa man bangku, piga kali nge arus kuampuni? Ngasa pitu kali nge?”
22 Ngaloi Jesus, “Kukataken man bandu, labo ngasa 7 kali, tapi ngasa 77 kali.+
23 “E me sebapna Kerajan surga banci iumpamaken bagi sekalak raja si atena erkira ras budak-budakna.
24 Sanga mulai erkira, sekalak dilaki si utangna 10.000 talenta* ibaba ku ia.
25 Tapi perban la ia ngasup nggalarisa, perentahken tuanna e gelah ia, ndeharana, ras anak-anakna bage pe kerina si lit bas ia idayaken gelah lit penggalarna.+
26 Emaka sujud budak e man bana, nina, ‘Sabar min kam man bangku, kugalari nge pagi kerina.’
27 Perban mekuah ate tuanna e, bebaskenna budak e, sasapkenna utangna.+
28 Tapi sanga ndarat budak e, jumpa ia ras sekalak budak si deban si utangna 100 dinar* man bana. Tangkapna ia jenari cekakna, nina, ‘Galari utangndu.’
29 Emaka sujud temanna e, mindo kel ia man bana, nina, ‘Sabar min kam man bangku, kugalari nge pagi.’
30 Tapi, la ia nggit. Lawes ia janah tamakenna temanna e ku penjara seh ngasa banci galarina utangna e.
31 Sanga idah budak-budak si deban kai si terjadi, sedih kel kalak e, emaka lawes kalak e janah ceritakenna man tuanna kerina si terjadi e.
32 Kenca si e, lebuh tuanna e ia janah nina, ‘Kam budak si jahat, kusasapken kerina utangndu perban mindo kel kam man bangku.
33 La kin arusna kam pe rate mekuah man temanndu si jadi budak bagi aku enggo rate mekuah man bandu?’+
34 Perban merawa kel tuanna e, penjarakenna ia seh ngasa galarina kerina utangna.
35 Bage ka pagi iban Bapakku si i surga man kena sekalak-sekalak,+ adi la kin ampuni kena turang senina kena arah pusuh kena nari.”+
Cataten i teruh
^ Ntah “batu penggilingen si itarik kelede.”
^ As. “tertuktuk.”
^ As. “la tersilahi batu si erban tertuktuk.”
^ As. “tertuktuk.”
^ Maksudna, kegeluhen si rasa lalap.
^ As. “tertuktuk.”
^ As. “tertuktuk.”
^ Ntah banci saja “Bapakndu.”
^ As. “persingeti ia.”
