Matius 19:1-30
19 Kenca dung kataken Jesus si e ndai kerina, lawes ia Galilea nari janah seh i perbatasen Judea i sebrang Lau Jordan.+
2 Enterem kel jelma si ngikuti ia, janah pepalemna kalak si sakit i je.
3 Kenca si e, reh kalak Parisi njumpai Jesus guna nguji ia, nungkun kalak e, “Menurut undang-undang, banci nge ceraiken sekalak dilaki diberuna alu alasen kai pe?”+
4 Nina ngaloi, “Lenga kin pernah baca kena maka tangtangna nari ciptaken Dibata manusia selaku dilaki ras diberu?+
5 Nina Dibata, ‘E me sebapna sekalak dilaki nadingken bapakna ras mamakna jenari tetap ia ersada ras diberuna, janah duana jadi sada.’*+
6 Emaka kalak e lanai dua, tapi sada. E me sebapna, kai si enggo persada Dibata, la banci sirangken manusia.”+
7 Nina kalak e man bana, “Adi bage, engkai maka suruh Musa dilaki mereken surat cerai guna nceraiken diberuna?”+
8 Nina Jesus, “Perban kena keras kepala, pediat Musa kena nceraiken diberu kena,+ tapi tangtangna nari labo bage.+
9 Kukataken man kena maka ise pe si nceraiken diberuna, adi labo perban perbahanen seks si salah,* janah erjabu ia ras kalak si deban, ia enggo erlua-lua.”+
10 Nina murid-murid man bana, “Adi bage kin keadanna man sekalak dilaki ras diberuna, ulin la erjabu.”
11 Ngaloi Jesus, “Labo kerina kalak banci ndalanken kata-kata ndai, selain kalak si ngaloken gegeh* bas Dibata nari.+
12 Lit kalak la banci erjabu perban bage kin lahirna nari, janah lit si la banci erjabu perban kalak si deban si erban ia bage, janah lit ka si ipilihna la erjabu guna Kerajan surga. Pediatlah kalak si banci ndalanken si e, ndalankenca.”+
13 Kenca si e, ibaba me anak-anak man bana gelah pasu-pasuna ras totokenna, tapi merawa murid-murid man kalak e.+
14 Tapi nina Jesus, “Pediatlah anak-anak e reh man bangku. Ula larang ia, sebap man kalak si bagenda me Kerajan surga.”+
15 Kenca si e, pasu-pasuna* anak-anak e dung e lawes ia i je nari.
16 Reh sekalak dilaki ndahi ia, nina, “O Guru, perbahanen si mehuli kai nge si arus kulakoken gelah kudat kegeluhen si rasa lalap?”+
17 Nina Jesus, “Engkai maka sungkunndu aku kerna kai si mehuli? Sada ngenca si mehuli.+ Tapi, adi atendu ndatken kegeluhen, teruslah dalanken perentah Dibata.”+
18 Nungkun ka ia, “Si apai?” Nina Jesus, “Ula munuh,+ ula erlua-lua,+ ula nangko,+ ula mereken kesaksin palsu,+
19 hamatilah bapakndu ras mamakndu,+ janah arus kelengindu kalak si deban bagi kam engkelengi dirindu.”+
20 Nina anak perana e, “Kerina enggo kudalanken. Kai nari kin si kurang?”
21 Nina Jesus, “Adi sempurna atendu, laweslah, dayaken ertandu janah bereken senna man kalak mesera, alu bage lit pagi ertandu i surga.+ Kenca si e, mari jadilah pengikutku.”+
22 Megi si e, lawes anak perana e, sedih kel akapna sebap melala ertana.+
23 Kenca si e, nina Jesus man murid-muridna, “Situhuna kukataken man bandu, kalak bayak mesera masuk ku Kerajan surga.+
24 Kukataken ka man kena, nukahen unta masuk ku lubang jarum asangken kalak bayak masuk ku Kerajan Dibata.”+
25 Megi si e, sengget kel murid-murid, nina, “Adi bage, ise si banci selamat?”+
26 Tatap Jesus kalak e janah nina, “Bas manusia enda la mungkin, tapi bas Dibata kai pe banci terjadi.”+
27 Kenca si e ngaloi Petrus, “Enggo tadingken kami kerinana janah ikutken kami kam. Kai nge si aloken kami pagi?”+
28 Nina Jesus, “Situhuna kukataken man bandu, ban Dibata pagi kerinana jadi mbaru, sanga Anak manusia kundul bas tahtana si mulia. Sanga si e, kena si enggo ngikutken aku, kundul pagi bas 12 tahta janah ngadili 12 suku Israel.+
29 Ise pe si enggo nadingken rumahna ntah seninana ntah turangna ntah bapakna ntah mamakna ntah anakna ntah tanehna guna gelarku, alokenna pagi 100 kali terbuen ras datna kegeluhen si rasa lalap.+
30 “Tapi enterem kalak si pertama jadi si terakhir pagi, janah si terakhir jadi si pertama.+
