Matius 2:1-23
2 Kenca Jesus lahir i Betlehem+ si lit i Judea paksa Herodes*+ jadi raja, ahli-ahli bintang* arah Timur nari reh ku Jerusalem.
2 Nina kalak e, “I ja kin raja kalak Jahudi si enggo lahir e?+ Idah kami bintangna paksa kami i Timur janah reh kami guna sujud man bana.”
3 Megi si e, la tenang Raja Herodes ras kerina kalak Jerusalem.
4 Emaka pepulungna kerina imam kepala ras kalak si ahli bas Undang-Undang Musa, sungkunna kalak e i ja pagi Kristus* lahir.
5 Ngaloi kalak e, nina, “I Betlehem+ si lit i Judea bagi si enggo itulisken nabi:
6 ‘O Betlehem i taneh Juda, kam labo kota si la merga bas kerina penguasa Juda, sebap arah kam nari reh pagi sekalak peminpin si mpermakani bangsaKu Israel.’”+
7 Kenca si e, alu erbuni-buni lebuh Herodes ahli-ahli bintang e guna mastiken ndigan kin bintang e mulai teridah.
8 Paksa suruhna kalak e lawes ku Betlehem, nina, “Berkatlah, darami anak e alu megermet. Adi enggo jumpa kena, kataken man bangku gelah aku pe ku jah guna sujud man bana.”
9 Kenca begi kalak e perentah raja, berkat kalak e janah kepeken bintang si idah kalak e sanga i Timur+ enggo ngelebei kalak e janah ngadi i datas ingan anak e.
10 Meriah kel ukur kalak e ngidah bintang e.
11 Paksa masuk kalak e ku rumah e, idahna anak si kitik e ras mamakna, Maria. Kenca si e, sujud kalak e man bana janah ibuat kalak e emas, kemenyan mbentar, ras mur guna ibereken jadi hadiah.
12 Tapi, perban ipersingeti Dibata kalak e arah nipi+ gelah ula mulihken ku Herodes, emaka mulih kalak e ku negrina arah dalan si deban.
13 Kenca kalak e berkat, reh malekat Jahwe* bas nipi Jusup+ janah nina, “Medakken, baba anak si kitik e ras mamakna janah kiamlah ku Mesir. Tadinglah kam i jah seh ngasa aku erkata man bandu, sebap darami Herodes atena anak e guna munuh ia.”
14 Emaka, medak Jusup janah bas berngi e babana anak si kitik e ras mamakna ku Mesir.
15 I je me ia tading seh ngasa mate Herodes. Alu bage, terjadi me kai si kataken Jahwe* arah nabiNa, “Kulebuh anakKu arah Mesir nari.”+
16 Kenca teh Herodes maka ia enggo itipu ahli-ahli bintang ndai, merawa kel ia. Suruhna gelah kerina anak dilaki si lit i Betlehem ras si lit i sekelilingna ibunuh, eme anak si umurna dua tahun ku teruh. Enda sue ras waktu si enggo ipastikenna arah ahli-ahli bintang e.+
17 Emaka, terjadi me kai si ikataken arah Nabi Jeremia,
18 “Lit terbegi sora nderkuh ras tangis i Rama. Tangisi Rahel+ anak-anakna janah la ia nggit iapuli sebap anak-anakna enggo lanai lit.”+
19 Kenca mate Herodes, reh malekat Jahwe* bas nipi+ Jusup sanga ia i Mesir.
20 Janah nina, “Medakken, baba anak si kitik e ras mamakna ku negri Israel, perban enggo mate kalak si ndarami anak e si atena munuh ia.”
21 Emaka medak ia janah babana anak si kitik e ras mamakna ku negri Israel.
22 Tapi, paksa begina maka si nggantiken Herodes merentah Judea eme anakna Arkelaus, mbiar ia lawes ku je. Selain si e, perban datna persinget Dibata arah nipi,+ emaka lawes ia ku daerah Galilea.+
23 Seh me ia bas kota si igelari Nasaret+ janah tading ia i je, emaka terjadi me kai si enggo ikataken arah nabi-nabi, “Igelari pagi ia kalak Nasaret.”*+
Cataten i teruh
^ Ntah “kalak si meteh wari alu ngenen bintang.”
^ Ntah “Mesias; Kalak si Ipilih.”
^ Kata si iterjemahken jadi “kalak Nasaret” mungkin ibuat arah kata “tunas” bas bahasa Heber.
