Matius 20:1-34
20 “Kerajan surga e bagi tuan rumah si ndarat sanga erpagi-pagi guna ndarami sierdahin bas kebun anggurna.+
2 Kenca ersada arihna ras kalak si erdahin e maka upahna sada dinar* per wari, suruhna kalak e ku kebun anggurna.
3 Kira-kira jam siwah erpagi-pagi* ndarat ka ia, idahna kalak si la lit dahinna bas pajak.
4 Nina man kalak e, ‘Kena pe berkatlah ku kebun anggurku. Kubereken kari upah si cocok man kena.’
5 Emaka lawes kalak e. Kira-kira jam 12 ciger* ras jam 3 karaben,* ndarat ka ia, lakokenna ka bagi si ndai.
6 Dungna, kira-kira jam lima karaben* ndarat ia janah jumpa ras kalak si deban si tedis saja, nina man kalak e, ‘Engkai kena la erdahin janah tedis saja i jenda sada wari ben?’
7 Ijawap kalak e, ‘Perban la lit kalak si ndilo kami.’ Nina ngaloi, ‘Kena pe berkatlah ku kebun anggurku.’
8 “Sanga berngi, nina si mpuna kebun anggur e man mandorna, ‘To dilo kalak si erdahin e janah galari upahna,+ si pudin erdahin lebe bereken upahna janah si leben erdahin pudin bereken.’
9 Sanga reh si mulai erdahin jam lima karaben, tiap kalak ngaloken sada dinar.*
10 Emaka, sanga reh si leben erdahin, akapna alokenna terbuen, tapi kalak e pe igalari sada dinar.*
11 Kenca alokenna, mulai kalak e jungut-jungut man tuan rumah e,
12 nina, ‘Kalak si pudin enda sada jam ngenca erdahin. Tapi peserindu kami ras ia, kami erdahin pagi-pagi nari seh ben janah kena las!’
13 Ngaloi tuan e man sekalak arah kalak e nari, ‘O Teman, labo aku salah man bandu. La kin enggo sada arihta upahndu sada dinar?*+
14 Buat upahndu janah laweslah. Kubereken ateku upah man si pudin reh seri bagi upahndu.
15 Me ate-ateku nge adi jangku? Ntah cian kin atendu* perban aku bujur?’*+
16 Emaka, si perpudi pagi jadi si perlebe, janah si perlebe jadi si perpudi.”+
17 Bas perdalanen ku Jerusalem, baba Jesus 12 murid-muridna nerapken bana, nina man kalak e,+
18 “Begiken! Kita bas perdalanen ku Jerusalem, janah iserahken pagi Anak manusia man imam-imam kepala ras ahli Undang-Undang Musa guna ihukum mate.+
19 Iserahken pagi ia man kalak arah bangsa si deban nari guna ihina, icambuk, janah ibunuh i tiang.*+ Bas wari si peteluken ipekeke ia.”+
20 Kenca si e, reh mamak anak-anak Sebedeus+ radu ras dua anakna ndeheri Jesus, jenari sujud ras mindo ia man bana.+
21 Nina Jesus, “Kai atendu?” Nina ngaloi, “Ban min gelah duana anakku enda banci kundul i sampingndu bas Kerajanndu, sada arah kananndu ras sada nari arah kirindu.”+
22 Ngaloi Jesus, “La kap angka kena kai si pindo kena e. Ngasup kin kena minem alu calung* si nandangi kuinem?”+ Ijawap kalak e, “Ngasup.”
23 Ngaloi ia, “Payo, minem nge kena pagi alu calungku.+ Tapi, kerna ise si kundul arah kanan ras kiriku, labo aku si nentukenca. Bapakku si nikapkenca man kalak si tentukenNa.”+
24 Sanga begi murid-murid si sepuluh nari kerna si e, merawa ia man dua kalak si ersenina e.+
25 Tapi dilo Jesus kalak e, nina, “Teh kena maka penguasa bangsa-bangsa nguasai rakyatna, pejabat pe erkuasa nandangi kalak e.+
26 Tapi, kena la banci bage.+ Ise pe si merhat jadi si mbelin arah kena arus jadi pelayan kena,+
27 ise pe si merhat jadi si perlebe arah kena arus jadi budak kena.+
28 Bagi Anak manusia, reh ia labo guna ilayani, tapi guna ngelayani,+ ras mereken kegeluhenna jadi tebusen ras penukar man enterem jelma.”+
29 Sanga kalak e ndarat Jeriho nari, enterem kel jelma ngikutken ia.
30 Lit dua dilaki si pentang kundul i tepi dalan, begina maka Jesus sangana lewat. Emaka nina alu sora megang, “O Tuan, Anak Daud, mekuah min atendu kami!”+
31 Tapi sergang jelma si enterem kalak e, suruhna sinik. Amin gia bage, reh gangna kalak e ngerana, nina, “O Tuan, Anak Daud, mekuah min atendu kami!”
32 Emaka ngadi Jesus, lebuhna kalak e, nina, “Kai kin ate kena si kuban man kena?”
33 Nina kalak e, “O Tuan, buka min mata kami.”
34 Perban mekuah ate Jesus, dadapna mata kalak e.+ Mis kalak e erpengidah janah ikutkenna Jesus.
Cataten i teruh
^ Bas jaman Jesus, enda jam si peteluken. Perhitungen waktu e imulai sanga terbit matawari.
^ Bas jaman Jesus, enda jam si peenemken. Perhitungen waktu e imulai sanga terbit matawari.
^ Bas jaman Jesus, enda jam si pesiwahken. Perhitungen waktu e imulai sanga terbit matawari.
^ Bas jaman Jesus, enda jam si pe-11-ken. Perhitungen waktu e imulai sanga terbit matawari.
^ As. “Ntah jahat kin matandu.”
^ Ntah “nggit mere.”
^ Ntah “kayu.”
^ Ntah “cangkir.” Enda ngertiken peraten Dibata guna mpediat Jesus mate alu tuduhen hinana Dibata.
