Matius 21:1-46
21 Sanga enggo ndeher kalak e ku Jerusalem janah seh i Betpage i Gunung Saitun, suruh Jesus dua muridna,+
2 nina, “Laweslah ku kuta si arah lebe ah, dapeti kena kari i je sada kelede si itambat ras anakna. Pulahi janah baba man bangku.
3 Adi lit kari si nungkun, kataken bagenda, ‘Perlu Tuan.’ Mis kari pediatna baba kena.”
4 Enda tuhu-tuhu terjadi gelah terjadi kai si enggo ikataken arah nabi, nina,
5 “Kataken man Sion, ‘Nenlah! Reh rajandu man bandu,+ ia lembut,+ nangkihina kelede si nguda denga, nangkihina anak kelede.’”+
6 Emaka lawes murid-murid e, lakoken kalak e bagi si kataken Jesus.+
7 Baba kalak e kelede e ras anakna, tama kalak e uisna si arah darat ku datas kelede e, kenca si e nangkihi Jesus.+
8 Teremen arah kalak e ngkimbangken uisna i dalan,+ si debanna tektekna bulung batang kurma janah amparkenna i dalan.
9 Selain si e, jelma si enterem si erdalan arah lebe bage pe arah pudi Jesus terus ersurak, “Selamatken min Anak Daud!+ Ipasu-pasu me ia si reh bas gelar Jahwe!*+ O Dibata si lit bas ingan si meganjangna, selamatken min ia!”+
10 Sanga masuk ia ku Jerusalem, guntar belang-belang kota e, nina, “Ise kin enda?”
11 Jelma si enterem e lalap ngataken, “Enda kap nabi e, Jesus+ arah Nasaret daerah Galilea nari!”
12 Masuk Jesus ku rumah pertoton, pelawesna kerina kalak si erbinaga ras si nukur i je. Tunggalingkenna meja-meja kalak si nukari sen bage pe kursi-kursi kalak si erbinaga merpati.+
13 Nina man kalak e, “Lit tertulis, ‘RumahKu igelari pagi rumah pertoton,’+ tapi ban kena jadi gua perampok.”+
14 Kalak si pentang ras si lumpuh pe reh ndahi ia i rumah pertoton, janah pepalemna kalak e.
15 Idah imam-imam kepala ras ahli Undang-Undang Musa melala mukjizat si lakoken Jesus, idah kalak e ka anak-anak dilaki si ersurak bas rumah pertoton, si ngataken, “Selamatken min Anak Daud!”+ Emaka merawa kalak e,+
16 nina man Jesus, “Begindu nge kai nina kalak enda?” Nina, “Kubegi. La kin pernah baca kena kata-kata enda: ‘BanNdu ndarat pujin arah babah anak-anak nari bage pe arah bayi nari’?”+
17 Kenca tadingkenna kalak e, ndarat ia arah kota e nari. Lawes ia ku Betani, erberngi ia i je.+
18 Sanga mulih ia ku kota bas pagi-pagi si lampas, melihe ia.+
19 Idahna sada batang ara i tepi dalan janah lawes ia ku je, tapi kai pe la lit datna i je, bulungna ngenca,+ emaka nina man batang ara e, “Asa ndigan pe lanai kam erbuah.”+ Mis kerah batang ara e.
20 Sanga idah murid-murid si e, mamang kel atena janah nina, “Uga maka banci mis kerah batang ara e?”+
21 Ngaloi Jesus, “Situhuna kukataken man kena, adi lit kiniteken kena janah la kena ragu-ragu, labo si kuban man batang ara e saja si banci ban kena, tapi adi kataken kena pe man deleng enda, ‘Angkatlah bandu jenari benterken bandu ku laut,’ si e banci terjadi.+
22 Adi erkiniteken kena, kerina si pindo kena bas toto pasti aloken kena.”+
23 Kenca masuk Jesus ku rumah pertoton, imam-imam kepala ras peminpin-peminpin bangsa e reh ndahi ia sanga ia ngajar janah nina, “Ja nari datndu kuasa ngelakoken kerina enda? Ise si mereken kuasa e man bandu?”+
24 Ngaloi Jesus, “Aku pe lit sada penungkunenku man kena. Adi jawap kena, kujawap ka kari ja nari kudat kuasa ngelakoken enda kerina.
25 Ja nari rehna kuasa Johanes guna mperidiken? Surga nari nge ntah manusia nari?” Kalak e pe mulai arih-arih, nina, “Adi sikataken, ‘Surga nari,’ katakenna ka kari, ‘Engkai maka la kena tek man bana?’+
26 Tapi adi sikataken, ‘Bas manusia nari,’ mbiar kita man jelma si enterem, perban kerina kalak e nganggap Johanes sekalak nabi.”
27 Emaka nina kalak e man Jesus, “La teh kami.” Nina Jesus ka, “Aku pe la kukataken man kena ja nari kudat kuasa ngelakoken enda kerina.
28 “Uga menurut kena? Sekalak dilaki lit dua anakna. Dahina sintua nina, ‘O Nakku, to erdahin kam wari enda bas kebun anggur.’
29 Ngaloi ia, ‘La aku nggit,’ tapi dungna nyesal ia janah lawes ku kebun anggur.
30 Jenari deherina anak si peduaken, katakenna ka bagi si ndai. Jawapna, ‘Ue, Pak,’ tapi la ia lawes.
31 Si apai arah dua anak enda ndai si ngelakoken sura-sura bapakna?” Ngaloi kalak e, “Sintua.” Nina Jesus, “Situhuna kukataken man kena, leben pagi pemungut pajak ras pelacur masuk ku bas Kerajan Dibata asangken kena.
32 Sebap Johanes reh ndahi kena guna nuduhken dalan si benar, amin pe bage la kena tek man bana. Tapi, pemungut pajak ras pelacur tek man bana.+ Enggo pe idah kena si e, la kena nyesal janah la kena tek man bana.
33 “Begiken perumpaman* si deban: Lit sekalak dilaki, ia tuan taneh, banna kebun anggur,+ pagarina i sekelilingna, kurakna ingan meras anggur i je janah pajekkenna sada menara.+ Kenca si e, sewakenna man perjuma-perjuma si deban janah lawes ia ku luar negri.+
34 Kenca seh waktuna rani, suruhna budak-budakna ndahi perjuma e guna muat baginna.
35 Tapi, tangkap perjuma e budak-budakna ndai. Sada pekpekina, sada nari bunuhna, janah si debanna benterina alu batu.+
36 Suruhna ka mulihi budak-budak si deban, teremen asangken si pertama, tapi bagi si ndai ka banna man kalak e.+
37 Dungna, suruhna anakna ndahi kalak e, sebap nina bas ukurna, ‘Iergai kalak e nge kari anakku e.’
38 Ngidah anakna e, arih-arih perjuma e, nina, ‘Enda kap ahli warisna.+ Eta sibunuh ia, gelah man banta warisenna!’
39 Emaka tangkap kalak e ia, benterkenna ku darat kebun anggur janah bunuhna.+
40 Perban si e, sanga reh si mpuna kebun anggur e, uga nge kari banna kerina perjuma e?”
41 Jawap kalak e, “Perban jahat kalak e, kernepkenna pagi kalak e janah sewakenna kebun anggur e man perjuma si deban, si nggit mere baginna paksa peranin.”
42 Nina Jesus man kalak e, “La kin pernah baca kena bas Kitap si Badia, ‘Batu si tulak tukang bangunen, enggo jadi batu si utama.+ Batu e rehna arah Jahwe* nari, luar biasa kel e man banta’?+
43 E me sebapna kukataken man kena, pasu-pasu arah Kerajan Dibata ibuat pagi arah kena janah ibereken man sada bangsa si ngelakoken peraten Dibata.
44 Selain si e, kalak si ndabuh ku batu enda pasti pagi getem,+ janah ise pe si dabuhi batu e, hancur pagi.”+
45 Sanga imam-imam kepala ras kalak Parisi megi perumpaman-perumpaman e, teh kalak e maka kalak e nge si sangana cakapken Jesus.+
46 Amin pe tangkap kalak e atena Jesus, mbiar kalak e man jelma si enterem, perban anggap kalak ia sekalak nabi.+
