Matius 22:1-46
22 Ngerana ka Jesus man kalak e alu perumpaman,* nina,
2 “Kerajan surga e banci ipeseri ras sekalak raja si erban pesta perjabun+ man anakna si dilaki.
3 Suruhna budak-budakna ngelebuh kalak si iundang ku pesta perjabun e, tapi kalak e la nggit reh.+
4 Suruhna ka mulihi budak-budak si deban, nina, ‘Kataken man kalak si iundang, “Enggo kusikapken pangan, lembu, ras asuh-asuhen si mbur enggo ipotong janah kerinana enggo sikap. Rehlah ku pesta perjabun e.”’
5 Tapi la diate kalak e janah lawes ia, deba ku jumana, si debanna ndahiken usahana.+
6 Lit ka si nangkap budak-budak e, pekpekina, janah bunuhna.
7 “Merawa kel raja, emaka suruhna pasukenna, bunuhna pembunuh e ras tutungna kota kalak e.+
8 Kenca si e katakenna man budak-budakna, ‘Pesta perjabun enggo sikap, tapi kalak si iundang e la cocok* reh.+
9 Perban si e, laweslah ku dalan-dalan si nuju ku darat kota, undang ise pe si jumpai kena ku pesta perjabun e.’+
10 Emaka, lawes budak-budak e ku dalan-dalan janah pepulungna kerina si ijumpaina, si jahat bage pe si mehuli. Emaka dem tamu bas ingan acara perjabun e.
11 “Sanga reh raja mereksa tamu-tamu, idahna sekalak dilaki si la make baju pesta.
12 Sungkunna ia, ‘O Teman, uga maka la erbaju pesta kam ku jenda?’ Sinik saja ia.
13 Emaka nina raja man pelayan-pelayanna, ‘Iket tanna ras nahena, ambekken ia ku darat, ku kegelapen. I je pagi ia tangis janah erderep ipenna.’
14 “Sebap enterem si iundang, tapi sitik si ipilih.”
15 Kenca si e lawes kalak Parisi, arih-arih kalak e gelah banci njebak Jesus alu rananna.+
16 Suruh kalak e murid-muridna radu ras pengikut partai Herodes+ ndahi Jesus, nina, “O Guru, teh kami maka kam ngataken kai si benar janah ngajarken dalan Dibata alu benar, la daramindu ngena ate manusia, perban la inenndu penampilen kalak arah kai si teridah.
17 Kataken min man kami, menurutndu, banci ntah lang nggalar pajak kepala man Kaisar?”
18 Tapi teh Jesus la mehuli ukur kalak e, emaka nina, “O kalak si munapik, engkai maka cubai kena aku?
19 Cidahken man bangku sen logam guna pajak e.” Bereken kalak e man bana sada dinar.*
20 Nina man kalak e, “Gambar ras gelar ise enda?”
21 Ijawap kalak e, “Kaisar.” Jenari nina man kalak e, “Adi bage, bereken man Kaisar si jadi bagin Kaisar, tapi bereken man Dibata si jadi bagin Dibata.”+
22 Megi si e, jengang kalak e jenari lawes ia nadingken Jesus.
23 Bas wari e ka pe, kalak Saduki si la tek maka lit kekeken,+ reh ndahi Jesus janah nungkun,+
24 “O Guru, nina Musa, ‘Adi lit sekalak dilaki mate tapi la lit anakna, senina si mate e arus ngempoi diberuna guna mereken keturunen man seninana ndai.’+
25 Lit pitu kalak si ersenina. Sintua erjabu, dungna mate, la lit keturunenna, emaka empoi senina si mate ndai diberuna e.
26 Bage ka si terjadi man si peduaken ras si peteluken seh ku si pepituken.
27 Dungna diberu e pe mate.
28 Adi bage, bas kekeken, diberu ise nge pagi ia arah si pitu e? Sebap kerinana enggo pernah ngempoi ia.”
29 Nina Jesus, “Enggo salah kena e, perban la angka kena Kitap si Badia ntah pe kuasa Dibata.+
30 Sebap sanga kekeken, dilaki ntah pe diberu la erjabu janah la ipejabu, tapi kalak e bagi malekat si i surga.+
31 Kerna kekeken kalak mate, lenga kin pernah baca kena kai si kataken Dibata man kena, nina,
32 ‘Aku kap Dibata Abraham, Dibata Isak, ras Dibata Jakup’?+ Ia labo Dibata kalak mate tapi Dibata kalak si nggeluh.”+
33 Jengang jelma si enterem e megi pengajarenna.+
34 Kenca begi kalak Parisi maka enggo sinik kalak Saduki ndai iban Jesus, ras-ras kalak e njumpai Jesus.
35 Sekalak arah kalak e si ahli bas Undang-Undang Musa ncubai ia, nina,
36 “O Guru, perentah si apai nge si mbelinna bas Undang-Undang Musa?”+
37 Ngaloi ia, “‘Arus kelengindu Jahwe* Dibatandu alu kerina pusuhndu, kegeluhenndu,* ras perukurenndu.’+
38 Enda me perentah si mbelinna ras si pentingna.
39 Si peduaken si bali ras si ndai eme, ‘Arus kelengindu kalak si deban bagi kam engkelengi dirindu.’+
40 Dua perentah enda me si jadi dasar kerina Undang-Undang Musa ras Ajaren Nabi-Nabi.”+
41 Sanga kalak Parisi pulung denga, sungkun Jesus kalak e,+
42 “Uga pendapat kena kerna Kristus? Anak ise ia?” Ngaloi kalak e, “Anak Daud.”+
43 Nungkun ia, “Adi bage, engkai maka alu pengaruh kesah si badia+ lebuh Daud ia Tuan sanga nina,
44 ‘Nina Jahwe* man Tuanku, “Kundullah i sebelah kananKu seh ngasa Kutamaken musuh-musuhndu i teruh nahendu”’?+
45 Adi lebuh Daud ia Tuan, uga maka ia anakna?”+
46 Ise pe la banci njawap ia. Mulai jenari ise pe lanai pang nungkun man bana.
