Matius 25:1-46
25 “Kerajan surga banci ipeseri ras sepuluh singuda-nguda si maba lampuna+ janah lawes ngalo-ngalo penganten si dilaki.+
2 Lima kalak si motu, lima kalak nari pentar.+
3 Si motu e maba lampuna tapi la babana minakna,
4 si pentar e maba lampuna ras minakna alu botol.
5 Sanga penganten si dilaki melawen reh, kerina kalak e munduk-unduk dungna terpedem.
6 Bas tengah berngi terbegi sora, ‘Enda penganten si dilaki ndai! Ndaratken, alo-alolah ia.’
7 Emaka medak kerina singuda-nguda ndai janah sikapkenna lampuna.+
8 Nina si motu e man si pentar, ‘Bereken sitik minak kena man kami, sebap enggo mate atena lampu kami.’
9 Ngaloi si pentar, ‘Banci saja lanai bias man kami ras man kena. Laweslah ku si ndayakenca, janah tukurlah jang kena.’
10 Sanga lawes kalak e nukursa, reh penganten si dilaki. Singuda-nguda si enggo ersikap ndai masuk ras ia ku pesta perjabun,+ kenca si e itutup pintu.
11 Kenca bage, reh ka singuda-nguda si motu ndai, nina, ‘Pak, Pak, buka min pintu e!’+
12 Ngaloi ia, ‘Situhuna kukataken man kena, la kena kutandai.’
13 “Emaka, tetaplah erjaga-jaga+ sebap la teh kena wari ntah pe jamna.+
14 “Sebap Kerajan e bagi sekalak dilaki si lawes atena ku luar negri, lebuhna budak-budakna janah percayakenna erta-ertana man kalak e.+
15 Sekalak berekenna lima talenta,* sekalak nari dua, janah sekalak nari ka sada, menurut kengasupenna sekalak-sekalak. Kenca si e lawes ia ku luar negri.
16 Si ngaloken lima talenta mis lawes janah pakena talenta e erban usaha, janah datna lima talenta untungna.
17 Bage ka pe, si ngaloken dua talenta, datna ka untung dua talenta.
18 Tapi budak si ngaloken sada talenta, lawes janah kurakna taneh, kenca si e bunikenna sen* tuanna e.
19 “Kenca enggo ndekah, reh tuan budak-budak e janah erkira ia ras kalak e.+
20 Emaka reh kalak si ngaloken lima talenta janah babana lima talenta nari, nina, ‘O Tuan, berekenndu bangku lima talenta. Enggo kudat lima talenta nari untungna.’+
21 Nina tuanna e man bana, ‘Merandal kel, kam budak si mehuli ras setia! Setia kam bas si kitik. Kulantik kam ngurus si terbuen.+ Ikutlah ermeriah ukur ras tuanndu.’+
22 Kenca si e, reh si ngaloken dua talenta janah nina, ‘O Tuan, berendu man bangku dua talenta. Enggo kudat dua talenta nari untungna.’+
23 Nina tuanna e man bana, ‘Merandal kel, kam budak si mehuli ras setia! Setia kam bas si kitik. Kulantik kam ngurus si terbuen. Ikutlah ermeriah ukur ras tuanndu.’
24 “Dungna reh budak si ngaloken sada talenta janah nina, ‘O Tuan, kuteh kam tukang nuntut. Peranindu kai si labo suanndu janah pepulungndu kai si labo piarindu.+
25 Emaka mbiar aku, jenari lawes aku muniken talentandu e bas taneh. Enda, kuulihken bandu.’
26 Ngaloi tuanna e, ‘Kam budak si jahat ras perkisat, tehndu nge adi aku mperani kai si labo kusuan janah mpepulung kai si labo kupiari.
27 Arusna simpanndu senku* e bas bank, gelah sanga aku mulih, banci ka kualoken mulihi ras bungana.
28 “‘Emaka, buatlah talenta e bas ia nari janah bereken man si sepuluh talentana.+
29 Sebap man kalak si lit bas ia ibereken terbuen, janah reh buena si lit bas ia. Tapi man kalak si la lit bas ia, si lit bas ia e pe ibuat bas ia nari.+
30 Ambekkenlah budak si la terpake e ku darat, ku bas kegelapen. I je pagi ia tangis janah erderep ipenna.’
31 “Sanga reh Anak manusia+ bas kemulianna, ras kerina malekat-malekat ikut ras ia,+ kundul pagi ia i tahtana si mulia.
32 Kerina pagi bangsa ipepulung i lebe-lebena, pisahkenna pagi kalak e, bagi permakan misahken biri-biri arah kambing nari.
33 Tamana pagi biri-biri+ arah kananna, tapi kambing-kambing arah kirina.+
34 “Kenca si e, nina Raja man si arah kananna, ‘Mari, kena si enggo ipasu-pasu Bapakku, alokenlah Kerajan si enggo isikapken man kena mulai kin doni enda ijadiken.
35 Sebap sanga aku melihe, bere kena aku man. Sanga aku muas, bere kena aku minem. Sanga aku jadi kalak pertandang, aloken kena aku alu mehuli.+
36 Sanga aku la ruis,* uisi kena aku.+ Sanga aku sakit, urus kena aku. Sanga aku bas penjara, dahi kena aku.’+
37 Kenca si e ngaloi kalak si benar e, nina, ‘O Tuan, ndigan kin idah kami kam melihe janah bere kami kam man, ntah muas janah bere kami kam minem?+
38 Ndigan kin idah kami kam jadi kalak pertandang janah aloken kami kam alu mehuli, janah ndigan kin la kam ruis janah iuisi kami kam?
39 Ndigan kin idah kami kam sakit ntah bas penjara janah dahi kami kam?’
40 Nina Raja ngaloi kalak e, ‘Situhuna kukataken man kena, kai pe si lakoken kena man sekalak arah seninaku si kitikna enda, enggo lakoken kena man bangku.’+
41 “Kenca si e nina pagi man si arah kirina, ‘O kena si enggo isumpahi, laweslah arah aku nari,+ ku bas api si la mate-mate*+ si enggo isikapken man Iblis ras malekat-malekatna.+
42 Sebap sanga aku melihe, la bere kena aku man, sanga aku muas, la bere kena aku minem.
43 Sanga aku jadi kalak pertandang, la aloken kena aku alu mehuli. Sanga aku la ruis, la uisi kena aku. Sanga aku sakit janah bas penjara, la urus kena aku.’
44 Kenca si e ngaloi ka kalak e, ‘O Tuan, ndigan kin idah kami kam melihe, muas, jadi kalak pertandang, la ruis, sakit, bas penjara, janah la layani kami kam?’
45 Emaka ijawapna, ‘Situhuna kukataken man kena, kai pe si la lakoken kena man sekalak arah si kitikna enda, la lakoken kena man bangku.’+
46 Mate pagi kalak e rasa lalap,+ tapi kalak si benar ngaloken kegeluhen si rasa lalap.”+
