Matius 27:1-66
27 Sanga erpagi-pagi, kerina imam kepala ras peminpin bangsa e arih-arih guna ngelawan Jesus gelah banci munuh ia.+
2 Kenca Jesus iiket, baba kalak e ia janah iserahken man Gubernur Pilatus.+
3 Menyesal kel Judas eme si erhianat man Jesus sanga idahna Jesus enggo ihukum. Emaka ulihkenna 30 sen logam pirak e man imam-imam kepala ras peminpin-peminpin.+
4 Nina, “Enggo erdosa aku perban kuhianati dareh kalak si la ersalah.” Ngaloi kalak e, “Kai ka kin urusenna ras kami? Ena urusenndu!”
5 Emaka benterkenna kerina logam pirak e ku rumah pertoton, jenari lawes ia janah ndelis* ia.+
6 Tapi buat imam-imam kepala kerina logam pirak e, janah nina, “La banci itama enda bas ingan nimpan erta si badia, perban enda sen dareh.”
7 Kenca arih-arih, pake kalak e sen ndai guna nukur taneh tukang kudin, si iban jadi kuburen man kalak pertandang.
8 Emaka seh ngasa gundari taneh e igelari Taneh Dareh.+
9 Alu bage, terjadi kai si kataken arah Nabi Jeremia: “Buat kalak e 30 logam pirak e, eme erga si itetapken piga-piga kalak Israel man dilaki e,
10 janah pakena e guna nukur taneh tukang kudin, bagi si enggo perentahken Jahwe* man bangku.”+
11 Gundari tedis Jesus i lebe-lebe gubernur, sungkun gubernur e ia, “Kam kin Raja Kalak Jahudi?” Nina Jesus, “Payo bagi si katakenndu ena.”+
12 Tapi sanga tuduh imam-imam kepala ras peminpin-peminpin e ia, la sitik pe ijawapna.+
13 Kenca si e, sungkun Pilatus ia, “La kin begindu maka seh kel lalana tuduhen kalak e man bandu?”
14 Tapi la ijawapna ia, sengkebabah ranan pe lang, emaka mamang kel ate gubernur e.
15 Bas tiap Perayan Paskah, lit kebiasan gubernur mbebasken sekalak tahanen si apai pe si ipilih jelma si enterem.+
16 Paksa si e lit sekalak penjahat si terkenal si sangana ipenjaraken, gelarna Barabas.
17 Emaka sanga pulung kalak e, nungkun Pilatus, “Si apai ate kena kubebasken man kena, Barabas ntah Jesus si igelari Kristus e?”
18 Teh Pilatus perban cian ate kalak e maka serahkenna Jesus.
19 Selain si e, sanga Pilatus kundul i kursi penghakimen, kirim diberuna pesan man bana, “Ula campurindu urusen kalak si benar e, sebap wari enda tersiksa kel aku bas nipiku perban ia.”
20 Tapi iajuk-ajuk imam-imam kepala ras peminpin-peminpin e jelma si enterem gelah pindona Barabas+ si ibebasken, tapi Jesus ihukum mate.+
21 Emaka nungkun gubernur e, “Si apai ate kena si kubebasken arah si dua kalak enda?” Nina kalak e, “Barabas.”
22 Nina Pilatus, “Adi bage, kai si arus kulakoken man Jesus si igelari Kristus e?” Kerina kalak e ngataken, “Bunuh ia bas tiang!”*+
23 Sungkunna ka, “Engkai? Kejahaten kai kin si lakokenna?” Tapi lalap reh gangna sora kalak e, “Bunuh ia bas tiang!”*+
24 Kenca idahna la berhasil kai si lakokenna e, reh gejekna ka jelma si enterem e, buat Pilatus lau janah burihina tanna i lebe-lebe jelma si enterem, nina, “Aku la ertanggung jawap nandangi dareh dilaki enda. Kenalah si arus ertanggung jawap.”
25 Kerina kalak e ngaloi, “Kami ras anak-anak kami si nanggungsa darehna.”+
26 Kenca si e, bebaskenna Barabas man kalak e, tapi suruhna gelah Jesus icambuk+ janah iserahken guna ihukum mate i tiang.*+
27 Kenca si e, prajurit-prajurit gubernur maba Jesus ku ingan tading gubernur janah pepulung kalak e kerina pasuken engkelilingi ia.+
28 Kenca tangtangi kalak e uis Jesus, pakeken kalak e man bana jubah si megara,+
29 ban kalak e ka mahkota arah peren duri nari, janah tama kalak e ku takal Jesus. Tamaken kalak e ka buluh ku tan kananna. Kenca si e sujud kalak e i lebe-lebena janah hina kalak e ia, nina, “Mejuah-juah, o Raja Kalak Jahudi!”
30 Ciduri kalak e+ ia janah buat kalak e buluh e, pekpeki kalak e takal Jesus.
31 Dungna, kenca hina kalak e Jesus, tangtangi kalak e jubahna jenari pakeken kalak e uisna si arah darat man bana, kenca si e baba kalak e ia gelah ipakuken bas tiang.*+
32 Sanga ndarat kalak e, jumpa ia ras Simon kalak Kireni. Ipaksa kalak e ia maba tiang siksan* Jesus.+
33 Sanga seh kalak e bas ingan si igelari Golgota, si ertina Ingan Tengkorak,+
34 bereken kalak e man Jesus anggur si icampur ras pegu* gelah inemna,+ tapi kenca inanamina, la ia nggit nginemsa.
35 Kenca pakuken kalak e ia bas tiang,* bagi-bagiken kalak e uisna si arah darat alu undi,+
36 janah kundul kalak e i je njagai ia.
37 Tama kalak e ka papan i datas takalna, i je lit tulisen si nuduh ia, isina, “Enda me Jesus, Raja Kalak Jahudi.”+
38 Sanga si e, lit ka dua perampok si ipakuken i sampingna, sada arah kananna, sada nari arah kirina.+
39 Geleng-geleng kepala kalak si lewat,+ janah hina kalak e ia,+
40 nina, “O kam si atendu ngeruntuhken rumah pertoton janah bangunndu ka bas telu wari,+ selamatkenlah bandu! Adi anak Dibata kin kam, nusurlah arah tiang siksan* e nari!”+
41 Bage ka pe, imam-imam kepala, ahli Undang-Undang Musa, ras peminpin-peminpin, mulai hinana ia, nina,+
42 “Kalak selamatkenna, tapi la terselamatkenna bana! Ia me Raja Israel,+ arusna nusur ia gundari arah tiang siksan* nari, gelah tek kita man bana.
43 Tek ia man Dibata, pediatlah selamatken Dibata ia gundari adi jadi kin ate Dibata man bana,+ sebap nina, ‘Aku Anak Dibata.’”+
44 Perampok-perampok si ipakuken i sampingna pe hinana ka ia alu cara si bage.+
45 Mulai jam 12 ciger,* kerina daerah e jadi gelap seh ngasa jam 3 karaben.*+
46 Kira-kira jam telu karaben, erlebuh Jesus alu sora si megang, nina, “Eli, Eli, lama sabakhtani?” si ertina, “O Dibataku, o Dibataku, engkai maka tadingkenNdu aku?”+
47 Megi si e, piga-piga kalak si tedis i je ngataken, “Lebuh-lebuhna Elia.”+
48 Lit sekalak arah kalak e si mis kiam muat bunga karang, rendamna bas anggur si macem, tamana e ku bas buluh, kenca si e berekenna man Jesus gelah inemna.+
49 Tapi si debanna ngataken, “Pediat saja ia! Sinen ntah reh kin Elia nelamatken ia.”
50 Erlebuh ka Jesus alu sora si megang, kenca si e mate ia.+
51 Tirai bas ingan si badia+ merigat jadi dua,+ datas nari seh ku teruh,+ terjadi gempa, batu-batu pe pecahen.
52 Kuburen-kuburen pe terbuka, melala mayat kalak si badia si enggo medem bas kematen merapen ku darat,
53 janah enterem kalak ngidah si e. (Kenca Jesus ipekeke, kalak si lit i deher kuburen-kuburen e masuk ku kota si badia.*)
54 Tapi sanga perwira ras kalak si njagai Jesus ngidah gempa ras kerina si terjadi, mbiar kel kalak e janah nina, “Pasti ia Anak Dibata.”+
55 I je enterem diberu si ngenenca dauh-dauh nari. Kalak e enggo nemani Jesus i Galilea nari guna nampati ia,+
56 piga-piga eme Maria Magdalena, Maria mamak Jakup ras Joses, bage pe mamak anak-anak Sebedeus.+
57 Kenca enggo ben wari, reh sekalak dilaki si bayak arah Arimatea, gelarna Jusup, si enggo ka jadi murid Jesus.+
58 Jumpaina Pilatus janah pindona mayat Jesus.+ Jenari perentahken Pilatus gelah mayat e ibereken man bana.+
59 Buat Jusup mayat e, balutina alu uis linen halus si bersih,+
60 jenari amparkenna bas kuburenna si mbaru,+ si enggo kurakna i uruk batu. Kenca si e, gulingkenna sada batu si galang guna nutupi kuburen e, jenari lawes ia.
61 Tapi Maria Magdalena ras Maria si deban terus i je, kundul i lebe-lebe kuburen e.+
62 Pepagina, kenca wari Persikapen Sabat,+ imam-imam kepala ras kalak Parisi pulung i lebe-lebe Pilatus,
63 nina, “Pak, inget kami si kataken penipu e sanga ia nggeluh denga, nina, ‘Kenca telu wari, ipekeke pagi aku.’+
64 Emaka, perentahkenlah gelah kuburen e ijaga seh wari si peteluken, gelah ula reh murid-muridna janah tangkona mayat e,+ jenari nina man kalak, ‘Ia enggo ipekeke arah si mate nari!’ Adi bage, tipun si terakhir enda keleken kari asangken si pertama.”
65 Nina Pilatus, “Baba kenalah penjaga. Te kena, jagalah kuburen e asa ngasup kena.”
66 Emaka lawes kalak e, tutupna kuburen e alu batu janah tamana penjaga i je.
Cataten i teruh
^ Ntah “bunuh diri.”
^ Ntah “kayu.”
^ Ntah “kayu.”
^ Ntah “kayu.”
^ Ntah “kayu.”
^ Lau si pagit.
^ Ntah “kayu.”
^ Bas jaman Jesus, enda jam si peenemken. Perhitungen waktu e imulai sanga terbit matawari.
^ Bas jaman Jesus, enda jam si pesiwahken. Perhitungen waktu e imulai sanga terbit matawari.
^ Maksudna, Jerusalem.
