Matius 28:1-20
28 Kenca wari Sabat, sanga nandangi terang bas wari pertama minggu e, Maria Magdalena ras Maria si deban reh guna ngenen kuburen e.+
2 Ope si e, enggo terjadi gempa si megegeh, sebap malekat Jahwe* nusur surga nari, reh ia janah gulingkenna batu si nutupi kuburen e, kenca si e kundul ia i datasna.+
3 Teridah ia bagi kilap, janah uisna mbentar bagi salju.+
4 Kalak si erjaga pe seh kel biarna, nggirgir ia jenari enggo bagi kalak mate.
5 Tapi nina malekat man diberu-diberu e, “Ula mbiar, kuteh maka darami kena Jesus si enggo ibunuh bas tiang.*+
6 La ia i jenda, bagi si enggo katakenna, ia enggo ipekeke.+ Mari, nen inganna iamparken.
7 Kenca si e mislah lawes janah kataken man murid-muridna maka ia enggo ipekeke arah si mate nari. Gundari sangana ia bas perdalanen ku Galilea ngelebei kena.+ Jumpa jah kari kena. Enda me pesanku man kena.”+
8 Emaka meter kalak e lawes arah kuburen nari, alu mbiar janah meriah kel ukurna, kiam kalak e guna mpesehsa man murid-murid Jesus.+
9 Rempet reh Jesus njumpai kalak e, nina, “Mejuah-juah!” Deheri kalak e Jesus, jemakna nahena janah sujud man bana.
10 Kenca si e nina Jesus man kalak e, “Ula mbiar! Laweslah, kataken man senina-seninaku gelah lawes kalak e ku Galilea, i je kari idahna aku.”
11 Sanga kalak e bas dalan, piga-piga penjaga+ lawes ku kota ngelaporken man imam-imam kepala kerna kerina si enggo terjadi.
12 Kenca arih-arih imam-imam e ras peminpin-peminpin, bereken kalak e melala sen pirak man prajurit-prajurit,
13 nina, “Bagenda kari ningen, ‘Reh murid-muridna sanga berngi, tangkona mayat Jesus sanga kami medem.’+
14 Adi begi gubernur kari kerna si enda, kami kari si njelaskenca man bana,* emaka ula kena mbiar.”
15 Emaka buat kalak e sen pirak ndai janah lakokenna bagi si iperentahken. Berita enda terbegi i tengah-tengah kalak Jahudi seh ngasa gundari.
16 Tapi, 11 murid lawes ku gunung i Galilea,+ ingan si enggo tentuken Jesus guna jumpa.+
17 Sanga idah murid-murid e Jesus, sujud kalak e, tapi piga-piga ragu denga.
18 Deheri Jesus kalak e janah nina, “Kerina kuasa i surga ras i doni enggo ibereken man bangku.+
19 Emaka, laweslah, banlah kalak arah kerina bangsa jadi murid-muridku,+ peridikenlah kalak e+ bas gelar Bapak ras Anak ras kesah si badia,
20 ajarilah kalak e ngelakoken kerina si enggo kuperentahken man kena.+ Ingetlah! Lalap pagi aku ras kena seh ku kedungen jaman* enda.”+
