Matius 4:1-25
4 Kenca si e, babai kesah Dibata me Jesus ku taneh mesawang,* i je me ia icubai+ Iblis.+
2 Kenca 40 wari 40 berngi ia erpuasa, melihe ia.
3 Reh Iblis* ncubai ia+ nina, “Adi anak Dibata kin kam, suruh dage batu-batu enda jadi roti.”
4 Tapi ngaloi ia, “Lit tertulis, ‘Manusia arus nggeluh labo arah roti saja, tapi arah tiap kata si kataken Jahwe.’”*+
5 Kenca si e baba Iblis ia ku kota si badia,+ ku ingan si meganjangna bas tembok rumah pertoton,+
6 jenari nina man bana, “Adi anak Dibata kin kam, dabuhken dage bandu ku teruh, sebap lit tertulis, ‘SuruhNa pagi malekat-malekatNa,’ janah, ‘Tatangna pagi kam bas tanna, alu bage nahendu la banci terantuk ku batu.’”+
7 Nina Jesus man bana, “Lit ka nge tertulis, ‘Ula cubaindu Jahwe* Dibatandu.’”+
8 Babai Iblis ka ia ku gunung si seh kel ganjangna janah cidahkenna man bana kerina kerajan doni enda ras kemulianna.+
9 Nina, “Kerina enda kubereken kari man bandu adi sujud kam janah nembah sekali saja man bangku.”
10 Kenca si e ngaloi Jesus, “Laweslah, Setan! Sebap lit tertulis, ‘Jahwe* Dibatandu si arus isembahndu,+ man baNa saja ngenca kam arus mereken pelayanen si badia.’”+
11 Dungna tadingken Iblis ia,+ jenari reh malekat-malekat janah layanina Jesus.+
12 Sanga begina Johanes enggo itangkap,+ lawes ia ku Galilea.+
13 Jenari, kenca tadingkenna Nasaret, lawes ia ku Kapernaum+ i tepi laut i daerah Sebulon ras Naptali, janah tading ia i je.
14 Alu bage terjadi me kai si ikataken arah Nabi Jesaya,
15 “O taneh Sebulon ras taneh Naptali si lit i segedang dalan si nuju ku laut, i sebrang Lau Jordan, Galilea si ingani bangsa-bangsa si deban!
16 Kalak si kundul bas kegelapen, enggo ngidah terang si luar biasa, janah kalak si kundul bas ingan si itutupi bayangen kematen, enggo isinari+ terang e.”+
17 Jenari, mulai erberita Jesus janah nina, “Ertobatlah, sebap Kerajan surga enggo ndeher.”+
18 Sanga erdalan ia i tepi Laut Galilea, idahna dua kalak si ersenina eme Simon si igelari Petrus+ ras adekna Andreas. Kalak e sangana ngamburken jala ku laut perban kalak e nelayan.+
19 Nina man kalak e, “Mari ikutken aku, kuban pagi kena jadi si njala manusia.”+
20 Mis tadingken kalak e jalana janah ikutkenna ia.+
21 Jenari, idahna dua kalak si deban si ersenina eme Jakup anak Sebedeus ras seninana Johanes.+ Kalak e ras Sebedeus bapakna sangana mpesikap jalana bas perahu, janah ilebuhna kalak e.+
22 Mis tadingken kalak e perahu e bage pe bapakna, janah ikutken kalak e Jesus.
23 Kenca si e siarina kerina daerah Galilea,+ ngajar ia bas ingan-ingan pulung kalak Jahudi.*+ Beritakenna berita si meriah kerna Kerajan ras pepalemna kerina penakit bage pe kerina masalah kesehaten jelma si enterem.+
24 Berita kerna ia seh ku belang-belang Siria. Taruhken kalak man bana kerina kalak si penakiten,+ si kerasuken,+ si sawanen,+ bage pe si lumpuh. Pepalemna kerina kalak e.
25 Emaka enterem jelma ngikutken ia. Lit arah Galilea, Dekapolis,* Jerusalem, Judea, bage pe sebrang Lau Jordan nari.
Cataten i teruh
^ Taneh si mbelang si jarang iingani.
^ Ntah “Penggoda.”
^ Ntah “Wilayah Sepuluh Kota.”