Matius 5:1-48
5 Sanga idahna jelma si enterem e, nangkih ia ku gunung. Kenca ia kundul, reh murid-muridna ndahi ia.
2 Mulai ia ngerana janah ajarina kalak e, nina,
3 “Ermeriah ukur me kalak si perlu akapna tandaina Dibata,*+ perban man bana pagi Kerajan surga.
4 “Ermeriah ukur me kalak si erceda ate, perban iapuli pagi ia.+
5 “Ermeriah ukur me kalak si meteruk ukur,+ perban warisina pagi doni enda.+
6 “Ermeriah ukur me kalak si muas ras melihe+ nandangi kai si benar, perban ipuasken pagi ia.+
7 “Ermeriah ukur me kalak si perkuah,+ perban datna pagi perkuah ate.
8 “Ermeriah ukur me kalak si bersih pusuhna,+ perban idahna pagi Dibata.
9 “Ermeriah ukur me kalak si erban dame,+ perban igelari ia pagi anak-anak Dibata.
10 “Ermeriah ukur me kalak si isiksa perban kai si benar,+ perban man bana pagi Kerajan surga.
11 “Ermeriah ukur me kena adi ihina+ ras isiksa kalak kena,+ janah katakenna kerina bual si jahat kerna kena perban aku.+
12 Sebap nabi-nabi si mbarenda pe isiksa alu cara si bage.+ Ermeriah ukur janah senanglah kena+ perban mbelin upah kena+ i surga.
13 “Kena kap sira+ doni, tapi adi sira e lanai masin, uga erbanca masin mulihi? Si e lanai lit gunana, selain iambekken ku darat+ janah iperjaki kalak.
14 “Kena kap terang doni.+ Sada kota la banci ibuniken adi inganna i datas gunung.
15 Kalak si mpegara lampu, labo tamana lampu e i teruh keranjang,* tapi bas ingan lampu, janah e banci nerangi kerina si lit bas rumah e.+
16 Emaka, ersinarlah ban terang kena i lebe-lebe jelma si enterem,+ gelah banci idahna perbahanen kena si mehuli+ ras muliakenna Bapak kena si i surga.+
17 “Ula akap kena aku reh guna nasapken Undang-Undang Musa ntah pe Ajaren Nabi-Nabi. Aku reh labo guna nasapkenca, tapi guna erbanca terjadi.+
18 Kukataken situhuna man kena, adi lit denga langit ras doni, sada hurup ntah sada bagin si kitikna pe bas Undang-Undang Musa nari la banci masap seh ngasa kerina isina terjadi.+
19 Emaka, ise pe si ngelanggar salah sada perentah si kitikna, janah ajarina kalak si deban ngelakoken si bage, la cocok* masuk ku* Kerajan surga. Tapi ise pe si ndalankenca ras ngajarkenca, cocok masuk ku* Kerajan surga.
20 Kukataken man kena, adi perbahanen kena la ulin asangken perbahanen ahli Undang-Undang Musa ras kalak Parisi,+ kena la banci masuk ku Kerajan surga.+
21 “Enggo pernah begi kena kata-kata si ibereken man nini bulang kena, ‘Ula kena munuh.+ Ise pe si munuh ibaba pagi ku pengadilen.’+
22 Tapi kukataken man kena, ise pe si terus merawa+ man seninana, ibaba pagi ku pengadilen. Ise pe si ngisakken seninana, ibaba pagi ku Pengadilen Agama.* Ise pe si ngataken, ‘O kalak motu!’ alokenna pagi hukumen Gehena* si gurlah.+
23 “Emaka adi babandu persembahenndu ku ingan nutung* persembahen,+ janah i je ingetndu lit si la senang man bandu,
24 tadingkenlah persembahenndu e i lebe-lebe ingan nutung persembahen. Kenca si e, laweslah kam. Erdame kam lebe ras ia, jenari mulihken kam janah bereken persembahenndu e.+
25 “Adi lit kalak ngaduken kam ku pengadilen, mislah dungi masalah e sanga kam ras ia bas perdalanen denga nuju ku je, alu bage la babana kam ku hakim, hakim nari ku petugas pengadilen, kenca si e ipenjaraken kam.+
26 Pasti la kam banci ndarat i je nari adi lenga galarindu kerina utangndu seh ku si kitikna.*
27 “Enggo pernah begi kena ikataken, ‘Ula erlua-lua.’+
28 Tapi kukataken man kena, ise pe si terus ngenen sekalak diberu+ seh ngasa turah napsuna man diberu e, ia enggo erlua-lua ras diberu e bas pusuhna.+
29 Emaka gundari, adi mata kananndu erban kam erdosa,* cungkil janah ambekkenlah e.+ Padin sada matandu bene asangken kerina dagingndu iambekken ku Gehena.*+
30 Adi tan kananndu erban kam erdosa,* potonglah e janah ambekken.+ Padin sada anggota dagingndu bene asangken kerina dagingndu masuk ku Gehena.*+
31 “Selain si e lit ikataken, ‘Ise pe si ceraikenna diberuna arus berena ia surat cerai.’+
32 Tapi, kukataken man kena, ise pe si ceraikenna diberuna padahal diberuna e la ngelakoken perbahanen seks si salah,* perbahanenna e banci erban diberuna e erlua-lua, janah ise pe si ngempoi diberu si iceraiken e erlua-lua ka.+
33 “Pernah ka begi kena maka enggo ikataken man nini bulang kena nai, ‘Ula ersumpah adi la tepatindu.+ Arus tepatindu janjindu man Jahwe.’*+
34 Tapi kukataken man kena: Ula ersumpah nandangi kai pe,+ ntah nandangi surga, perban e tahta Dibata;
35 ntah nandangi doni, perban e ingan naheNa;+ ntah nandangi Jerusalem, perban e kota Raja si mbelin.+
36 Ula ersumpah nandangi takalndu, perban la banci ubahndu sada buk pe jadi mbentar ntah pe mbiring.
37 Adi kataken kena ‘Ue,’ arus ertina ue, janah adi ‘Lang,’ ertina lang,+ sebap kai pe selain si e rehna arah si jahat* nari.+
38 “Pernah begi kena ikataken, ‘Mata ganti mata ras ipen ganti ipen.’+
39 Tapi kukataken man kena: Ula lawan kalak jahat. Adi parap kalak ayondu si sebelah kanan, bere ka ayondu si sebelah kiri.+
40 Adi lit si atena maba kam ku pengadilen guna ndatken bajundu, bereken ka cabinndu man bana.+
41 Adi lit kalak si erkuasa maksa kam maba barang sada kilometer* dauhna, babalah barang e dua kilometer dauhna.
42 Adi lit si mindo man bandu, berekenlah. Adi lit si atena minjam* man bandu, pinjamkenlah.+
43 “Pernah begi kena ikataken, ‘Arus kelengindu kalak si deban,+ janah segatlah atendu musuhndu.’
44 Tapi, kukataken man kena: Teruslah kelengi musuh-musuh kena+ janah totokenlah kalak si nyiksa kena,+
45 alu bage terbukti maka kena anak-anak Bapak kena si i surga,+ perban enggo banNa terbit matawariNa man kalak si jahat bage pe man kalak si mehuli, janah penusurNa udan man kalak si benar bage pe si la benar.+
46 Sebap adi kalak si engkelengi kena ngenca kelengi kena, kai upah kena?+ La kin pemungut pajak pe bage ka nge perbahanenna?
47 Adi turang senina kena ngenca perkuanken kena, kai kelebihen kena? La kin kalak arah bangsa-bangsa si deban pe bage ka nge perbahanenna?
48 Arus kena sempurna,* bagi Bapak kena si i surga pe sempurna.+
Cataten i teruh
^ Ntah “si mindo keperlun rohani alu meseksek.”
^ Ntah “tumba.”
^ Ntah “metunggung.”
^ As. “igelari pagi ia si kitikna bas.”
^ As. “igelari pagi ia si mbelinna bas.”
^ Ntah “Sanhedrin.”
^ As. “tertuktuk.”
^ As. “tertuktuk.”
^ Ntah “Setan.”
^ Maksudna, minjam alu la erbunga.
^ Ntah “lengkap.”
