Matius 7:1-29
7 “Ula nai kena ngakimi+ gelah kena pe la ihakimi,
2 perban ihakimi pagi kena menurut cara kena ngakimi,+ janah uga perbahanen kena man kalak si deban, bage ka nge pagi perbahanenna man kena.*+
3 Emaka, engkai idahndu rintep* bas mata seninandu tapi la idahndu balok bas matandu?+
4 Ntah, uga maka banci katakenndu man seninandu, ‘Pediat kupedarat rintep arah matandu,’ padahal lit balok bas matandu?
5 O kalak munapik! Pedarat lebe balok arah matandu, kenca si e maka banci kam ngidah alu jelas guna mpedarat rintep arah mata seninandu.
6 “Ula bereken kai si badia man biang, ula benterken mutiara man babi,+ gelah la perjakina jenari mulihken ia nyerang kena.
7 “Teruslah pindo, aloken kena nge pagi;+ teruslah darami, dat kena nge pagi; teruslah tuktuk, ibukaken nge pagi man kena;+
8 sebap ise pe si mindo pasti ngalo,+ ise pe si ndarami pasti idatna, janah ise pe si nuktuk pasti ibukaken.
9 Ise arah kena si mere batu man anakna, adi roti si pindona?
10 Ntah mere nipe, adi ikan si pindona?
11 Adi kena si erdosa saja pe teh kena carana mere si mehuli man anak-anak kena, terlebih ka Bapak kena si i surga! Pasti berekenNa si mehuli+ man kalak si mindo baNa.+
12 “Kai pe si ate kena lakoken kalak man kena, lakoken ka si bage bana.+ E me situhuna maksud Undang-Undang Musa ras Ajaren Nabi-Nabi.+
13 “Masuklah arah gerbang si sempit,+ perban gerbang si mbelang ras dalan si mbelang e tujunna ku kematen,* janah enterem kalak masuk arah e.
14 Tapi gerbang si sempit ras dalan si mesera e tujunna ku kegeluhen, piga-piga kalak ngenca si banci ndatkenca.+
15 “Hati-hatilah man nabi-nabi palsu+ si reh ku kena, si arah darat nari teridah bagi biri-biri,+ tapi situhuna kalak e srigala si merangap.+
16 Banci tandai kena kalak e arah buahna* nari. Me labo pernah ipepulung kalak anggur bas peren duri nari ntah pe buah ara bas rambah nari?+
17 Bage ka nge, batang si mejile tentu mejile ka buahna, tapi batang si la mejile tentu la mejile buahna.+
18 Batang si mejile labo banci la mejile buahna, bage pe batang si la mejile labo banci mejile buahna.+
19 Tiap batang si la mejile buahna itabah pagi, jenari ibenterken ku bas api.+
20 Jadi situhuna, arah buahna* nge maka banci tandai kena kalak e.+
21 “Labo kerina kalak si erlebuh man bangku, ‘O Tuan, Tuan,’ masuk ku bas Kerajan surga, tapi kalak si ngelakoken peraten Bapakku si i surga ngenca pagi si masuk.+
22 Bas wari e pagi, enterem kalak ngataken man bangku, ‘O Tuan, Tuan,+ la kin bas gelarndu kami ernubuat, bas gelarndu kami mpelawes malekat-malekat jahat, janah bas gelarndu lakoken kami melala perbahanen si dem kuasa?’+
23 Tapi kukataken pagi man kalak e, ‘La pernah kena kutandai! Laweslah arah aku nari, o kalak jahat!’+
24 “Ise si megi kata-kataku enda ras ndalankenca, ia bagi kalak pentar si majekken rumahna i datas batu.+
25 Rumah e labo runtuh amin gia reh udan si meder ras banjir, bage pe ientam angin si meter, sebap rumah e ipajekken i datas batu.
26 Tapi, ise si megi kata-kataku enda tapi la dalankenna, ia bali ras kalak motu si majekken rumahna i datas kersik.+
27 Sanga reh udan si meder ras banjir, bage pe ientam angin si meter,+ minter runtuh janah sontar rumah e.”
28 Kenca dung kataken Jesus kerina enda, takjup kalak si enterem ngidah carana ngajar.+
29 Sebap ia ngajar selaku kalak si lit kuasana,+ labo bali ras guru-guru agama kalak e.
Cataten i teruh
^ Ntah “uga sukaten si pake kena nukati, alu e ka nge pagi isukatken man kena.”
^ Ntah “kai pe si kitik kel.”
^ As. “pengkernepen.”
^ Ntah “perbahanenna.”
^ Ntah “perbahanenna.”
