Matius 8:1-34
8 Kenca nusur ia gunung e nari, enterem kel jelma ngikutken ia.
2 Reh sekalak si sakit kusta ndahi Jesus, sujud ia i lebe-lebena, nina, “O Tuan, adi nggit kam, banci pepalemndu aku.”+
3 Emaka, dudurkenna tanna, jemakna kalak si sakit kusta e, nina, “Nggit aku! Malemlah kam.”+ Mis malem sakit kustana e.+
4 Jenari nina Jesus man bana, “Ula kataken man ise pe,+ laweslah kam, cidahken bandu man imam.+ Kenca bage, bere persembahenndu bagi si isuruh Musa,+ guna mbuktiken man imam maka kam enggo malem.”
5 Sanga ia masuk ku Kapernaum, sekalak perwira ndahi ia, mindo kel ia man bana,+
6 nina, “O Pak, lit pelayanku sangana ampar i rumah perban lumpuh, susah kel akapna.”
7 Ngaloi Jesus, “Seh kenca kari aku i jah, banci kupepalem ia.”
8 Nina perwira e, “O Pak, la aku metunggung* ngalo-ngalo kam i rumahku. Sitik saja gia kam ngerana, pasti malem pelayanku e.
9 Sebap aku pe lit nge si ganjangen asangken aku, janah lit ka nge prajurit-prajurit teruhenku. Adi ningku man bana, ‘Laweslah!’ lawes ia. Adi ningku man si deban, ‘Rehlah!’ reh ia. Adi ningku man pelayanku, ‘Ban enda!’ banna bage.”
10 Jengang Jesus megi rananna e. Emaka nina man kalak si ngikutken ia, “Situhuna kukataken man kena, lenga pernah aku jumpa bas Israel kalak si bage kel belinna kinitekenna.+
11 Tapi enterem pagi reh arah timur ras barat nari janah kundul ras Abraham, Isak, bage pe Jakup bas Kerajan surga.+
12 Tapi, kalak si arusna masuk ku bas Kerajan* e iambekken pagi ku darat, ku kegelapen. I je pagi ia tangis janah erderep ipenna ban suina.”+
13 Nina Jesus man perwira e, “Laweslah kam. Perban kam enggo erkiniteken, terjadilah si e man bandu.”+ Malem me pelayan perwira ndai bas paksa si e.+
14 Lawes Jesus ku rumah Petrus, i je idahna mami Petrus+ ampar perban demam.+
15 Emaka jemak Jesus tanna,+ jenari lanai ia demam. Tedis mami Petrus e, sikapkenna pangan man bana.
16 Berngina, rehen jelma maba kalak si kerasuken man bana, janah alu sengkebabah ranan saja, pelawesna malekat-malekat jahat e. Pepalemna ka kerina kalak si sakit.
17 Alu bage terjadi me kai si enggo ikataken arah Nabi Jesaya, “Ia kap si muat penakit kami ras si meneken si mesui kami.”+
18 Sanga idah Jesus kalak si enterem engkelilingi ia, iahkenna murid-muridna gelah lawes ku sebrang ras ia.+
19 Reh sekalak ahli Undang-Undang Musa ndahi ia, nina, “O Guru, ikut ateku ras kam ku japa pe kam lawes.”+
20 Tapi nina Jesus man bana, “Biang kerangen lit lubangna, perik-perik lit asarna, tapi Anak manusia la lit inganna ngamparken takalna.”+
21 Sekalak murid si deban ngerana man ia, nina, “O Tuan, lawes aku lebe nguburken bapakku.”+
22 Tapi ngaloi Jesus, “Teruslah ikutken aku. Pediatlah kalak mate nguburken kalak mate.”+
23 Jenari naik perahu ia, murid-muridna pe ikut.+
24 Rempet rembus angin si seh kel meterna bas laut, entam gelombang perahu e, emaka lau enggo masuk ku bas. Tapi Jesus sangana medem.+
25 Emaka medaki murid-muridna ia, nina, “O Tuan, sampati min! Enggo mate tena kita!”
26 Tapi nina man kalak e, “Engkai maka mbiar kel kena, o kena si kitik kinitekenna?”+ Medak ia, sergangna angin ras laut e. Emaka enggo tenang kel.+
27 Mamang kel ate kalak e, nina, “Ise kin ia situhuna? Angin ras laut pe patuh man bana.”
28 Seh kenca ia i sebrang, i daerah kalak Gadara, reh dua kalak dilaki si irasuki malekat jahat njumpai Jesus. Kalak e reh arah kuburen nari.+ Ise pe la pang lewat arah dalan e sebap seh kel ia rawana.
29 Minter serko kalak e, nina, “O Anak Dibata, kai kin atendu?+ Siksandu kin atendu kami+ lenga pe seh waktuna?”+
30 Ndauh arah kalak e nari, melala babi sangana man.+
31 Mindo malekat-malekat jahat e man bana, nina, “Adi pelawesndu kami, suruhlah kami masuk ku babi-babi ah.”+
32 Nina Jesus, “Laweslah!” Dungna ndarat malekat-malekat jahat e, jenari masuk ku babi-babi e. Emaka kiamen babi-babi e ku tebing jenari ndabuhen kerina ku laut dungna mate gedap kerina.
33 Permakan-permakan babi e kiam ku kota. Ceritaken kalak e kerina si terjadi, termasuk kerna kalak si kerasuken ndai.
34 Emaka reh kerina kalak si bas kota e ndahi Jesus. Kenca jumpa, pindoken kalak e kel gelah lawes ia arah daerah kalak e nari.+
