Matius 9:1-38
9 Nangkihi Jesus perahu, nyebrang ia ku kutana.+
2 I je, taruhken kalak bana sekalak dilaki si lumpuh tare ingan medem. Ngidah kiniteken kalak e, nina Jesus man si lumpuh e, “Ula kam mbiar, Nakku. Dosandu enggo iampuni.”+
3 Kenca si e piga-piga ahli Undang-Undang Musa ngerana bas ukurna, nina, “Hinana kap Dibata.”
4 Teh Jesus kai si lit bas ukur kalak e, emaka nina, “Engkai maka jahat perukuren kena?+
5 Contohna, apai kin nukahen ngatakenca, ‘Dosandu enggo iampuni,’ asangken, ‘Tedisken, erdalanlah’?+
6 Tapi, gelah teh kena maka Anak manusia erkuasa i doni guna ngampuni dosa . . .” Jenari nina man kalak si lumpuh e, “Tedisken, angkat ingan medemndu, mulihlah ku rumahndu.”+
7 Emaka tedis ia, mulih ia ku rumahna.
8 Jengang jelma si enterem ngidah kejadin e. Muliaken kalak e Dibata si enggo mereken kuasa si bage man manusia.
9 Kenca si e, sanga erdalan Jesus idahna sekalak dilaki kundul bas kantor pajak. Gelarna Matius. Nina Jesus man bana, “Mari, jadilah pengikutku.” Tedis ia, ikutkenna Jesus.+
10 Bas pudi wari, sanga Jesus man i rumah Matius, enterem pemungut pajak ras kalak perdosa reh ku je, man kalak e ras Jesus bage pe ras murid-muridna.+
11 Tapi ngidah si enda, nina kalak Parisi man murid-murid Jesus, “Engkai maka guru kena man ras pemungut pajak bage pe kalak perdosa?”+
12 Sanga begi Jesus kerna si e, nina, “Kalak si sehat labo perlu dokter, kalak si sakit nge perlu.+
13 Laweslah kam, pelajari kai ertina enda: ‘Si kuarapken perkuah ate, labo korban.’+ Aku reh labo ndilo kalak si benar, tapi ndilo kalak perdosa.”
14 Kenca bage reh murid-murid Johanes ndahi ia janah nungkun, “Engkai maka kami ras kalak Parisi erpuasa tapi murid-muridndu lang?”+
15 Ngaloi Jesus, “Me labo lit alasen teman-teman penganten si dilaki erceda ate adi kalak e sangana ras penganten e?+ Tapi reh pagi waktuna penganten e ibuat arah kalak e nari,+ i je pagi kalak e erpuasa.
16 Labo ise pe nambal uis si enggo male alu uis si mbaru. Sebap adi bage, reh belangna rigatna iban penambalna e.+
17 Bage ka pe, labo tamaken kalak lau anggur si mbaru ku bas kantong kulit si male. Sebap adi bage, pecah kantong e, anggur e pe mambur, kantong e pe ceda. Tapi lau anggur si mbaru itamaken kalak ku bas kantong kulit si mbaru, alu bage duana tetap mejile.”
18 Sanga Jesus ngerana denga ras kalak e, reh sekalak penguasa ndahi ia, sujud ia, nina, “Gundari anakku si diberu pasti enggo mate. Reh min kam, tamaken tanndu ku datasna gelah nggeluh ia mulihi.”+
19 Kenca si e tedis Jesus, ikutkenna penguasa e, murid-muridna pe ikut ras ia.
20 Reh sekalak diberu ndeheri Jesus pudi nari, diberu e enggo 12 tahun pendarahen,+ dadapna ujung uis Jesus si arah darat,+
21 sebap lalap nina bas ukurna, “Adi kudadap saja pe uisna si arah darat e, pasti aku malem.”
22 Tulihken Jesus ku pudi, idahna diberu e, nina, “Ula kam mbiar, Nakku! Kinitekenndu enggo erban kam malem.”+ Paksa si e malem diberu ndai.+
23 Sanga Jesus reh ku rumah penguasa e, idahna piga-piga pemain suling ras enterem kalak si pulung nderkuhen.+
24 Nina Jesus, “Ndaratlah kena, anak* enda labo mate, medem saja nge ia.”+ Emaka tawai kalak e Jesus.
25 Kenca ndarat kalak e kerina, masuk Jesus, jemakna tan anak si diberu e,+ keke me anak e.+
26 Pasti me berita kerna si enda terbegi ku belang-belang daerah e.
27 Sanga Jesus lawes je nari, lit dua kalak si pentang+ ngikut-ngikut ia. Alu sora megang, nina, “Mekuah min atendu kami, o Anak Daud.”
28 Kenca masuk Jesus ku sada rumah, reh duana kalak si pentang e ndahi ia. Nungkun Jesus, “Erkiniteken kin kena banci kena kupepalem?”+ Nina kalak e, “Ue, Tuan.”
29 Emaka dadap Jesus mata kalak e,+ nina, “Perban kena erkiniteken, terjadi me bage.”
30 Mis erpengidah mata kalak e. Persingeti Jesus kalak e alu tegas, nina, “Ula kataken man ise pe kerna si enda.”+
31 Tapi kenca ndarat je nari, ceritaken kalak e kerna Jesus ku belang-belang daerah e.
32 Sanga kalak e lawes, taruhken kalak man bana sekalak dilaki si bisu si irasuki malekat jahat.+
33 Kenca malekat jahat e ipelawes, dilaki si bisu e banci ngerana.+ Mamang ate jelma si enterem, nina, “Lenga pernah terjadi si bagenda bas Israel.”+
34 Tapi nina kalak Parisi, “Pelawesna malekat-malekat jahat alu penampat penguasa malekat jahat.”+
35 Siari Jesus kota-kota ras kuta-kuta. Ngajar ia bas ingan-ingan pulung kalak Jahudi,* beritakenna berita si meriah kerna Kerajan. Pepalemna kerina penakit ras kerina masalah kesehaten.+
36 Paksa idahna jelma si enterem mekuah atena,+ sebap kalak e itindas* janah la iperdiateken bali bagi biri-biri si la lit permakanna.+
37 Emaka nina man murid-muridna, “Mbelang man peranin, tapi kurang sierdahin.+
38 Emaka pindolah man Si Mada peranin, gelah suruhNa sierdahin guna peraninNa e.”+
