Miha 6:1-16
6 Begikenlah kai nina Jahwe.
Ersikaplah ngaduken perkara kena,Pediatlah bukit-bukit megiken sora kena.+
2 O gunung-gunung, o pondasi doni si paguh,+Begikenlah perkara Jahwe,Sebap lit perkara Jahwe ras umatNa.
TuntutNa pagi Israel,+
3 “O umatKu, kai kin si enggo Kulakoken man kena?
Bas kai kin enggo latih akap kena Kuban?+
Kataken man bangKu.
4 Kubaba kena ndarat negri Mesir nari,+Kutukur kena mulihi arah ingan kena iperbudak,+Kuutus Musa, Harun, ras Miriam ku lebe-lebe kena.+
5 O umatKu, ingetlah kai rencana Balak raja Moap,+Kai jawapen Bilham anak Beor man bana.+
Ingetlah kai si terjadi mulai Sitim+ nari seh ku Gilgal,+Gelah teh kena maka perbahanen Jahwe lalap benar.”
6 Kai nge ndia kubaba sanga aku ngadap man Jahwe?
Kai nge ndia kubaba sanga aku sujud man Dibata si lit i datas?
Arus nge kubaba persembahen tutungen?
Arus nge kubaba anak lembu si umurna sada tahun?+
7 Meriah nge kap Jahwe ngaloken ribun biri-biri jantan?
Ntah pe minak si seh kel buena?+
Arus nge kupersembahken anakku sintua perban kejahatenku?
Ntah pe anakku sendiri perban dosaku?+
8 O manusia, enggo katakenNa man bandu kai si mehuli.
Kai kin si pindo Jahwe arah kam nari?
AteNa adil min perbahanenndu,+ cidahkenndu kekelengen si setia,+Janah erdalan ras Dibatandu+ alu meteruk ukur!+
9 Erlebuh Jahwe ku kota e,Hamati kalak bijak pagi gelarNdu.
Begikenlah sora tongkat penghukumen bage pe Ia si netapken hukumen e.+
10 Lit denga kin erta hasil perbahanen si jahat bas rumah kalak jahat?
Bage pe timbangen palsu* si erban ciga ate?
11 Adi kupake timbangen si la benar ntah pe batu timbangen si nipu,Banci kin aku ikataken la ersalah?+
12 Kalak bayak si lit i je dem alu kekerasen,Pendudukna meriah akapna erbual,+Dilah kalak e dilah penipu.+
13 “Emaka, Kupekpek pagi kena ngasa luka-luka,+Perban dosa-dosa kena, lanai pagi kena iurus.
14 Man pagi kena tapi la kena besur,Melihe pagi kena lalap.+
Angkut kena barang-barang guna iamanken, tapi labo pagi berhasil.
Kai pe si enggo berhasil iselamatken kena, Kubereken man musuh-musuh kena.
15 Amburken kena pagi benih, tapi labo pagi perani kena.
Perjaki kena pagi saitun, tapi labo pagi pake kena minakna.
Ban kena pagi anggur si mbaru, tapi labo pagi inem kena.+
16 Sebap ikutken kena perentah Omri bage pe kerina perbahanen keluarga Ahap,+Ikutken kena nasehat kalak e.
Emaka Kuhukum pagi kena, sengget kel pagi kalak perban kai si Kulakoken man kena.
Penduduk kena tokohi kalak pagi,+Janah hina bangsa-bangsa pagi kena.”+
Cataten i teruh
^ Ntah “si curang.”
