Nahum 3:1-19
3 Cilaka kota pembunuh e!
Dem ia alu tipun ras perampoken.
La ia erngadi-ngadi nangkapi mangsa!
2 Kubegi sora cambuk si erdepar bage pe sora roda si erderak-derik,Kuidah kuda si kiam alu semangat ras gereta si meter erdalan.
3 Lit kalak si erkuda, pedang si erndilap, bage pe tombak si kilap.
Enterem si terbunuh janah bangke ertumpuk-tumpuk.
I japa pe lit mayat.
Lalap kalak e tertuktuk perban mayat-mayat e.
4 Enda perban buena pelacuren si lakokenna,Mejile kel ia janah leket ukur kalak banna, ia tukang sihir si ahli,Jebakna bangsa-bangsa alu pelacurenna bage pe keluarga-keluarga alu sihirna.
5 Nina Jahwe penguasa malekat, “Kulawan kam,*+Kuangkat pagi ujung uisndu seh ku ayondu.
Kuban bangsa-bangsa ngidah kam tilanjang,Kerajan-kerajan ngidah keadanndu si man kemelanken.
6 Kubenteri pagi kam alu kotoren,Kuban mela akapndu.
Kuban pagi kam jadi tontonen.+
7 Kerina kalak si ngidah kam kiam pagi nadingken kam,+ nina,‘Niniwe enggo ihancurken!
Ise nge pagi si rate mekuah man bana?’
I ja nge pagi Kudarami si mereken pengapul man bandu?
8 Ulin kin kam asangken No-amon*+ si lit i tepi Lau Nil?+
Ia ikelilingi lau.
Laut eme ertana bage pe tembokna.
9 Etiopia bage pe Mesir eme sumber gegehna si la lit batasna.
Kalak Put+ ras kalak Libia kap si nampati ia.+
10 Amin gia bage, ia enggo jadi tabanen.
Ia enggo itaban.+
Anak-anakna pe ipekpeki ngasa mate bas tiap persimpangen dalan.
Kalak si terpandang ibagi-bagi jadi budak,Kerina kalak si penting enggo iiket alu rante.
11 Kam pe mabuk pagi.+
Cebuni kam pagi.
Kiam kam pagi arah musuhndu nari.
12 Kerina ingan-inganndu si erbenteng bagi batang ara si dem alu buah si pertama.
Adi iugur, ndabuhen ku babah kalak si rangap.
13 Tentera-tenterandu lemah bagi diberu.
Mbelang pagi talang gerbang-gerbang negrindu man musuh-musuhndu,Keri pagi ipan api palang-palang gerbangndu.
14 Pepulunglah lau guna masa pengepungen!+
Pegegehilah ingan-inganndu si erbenteng.
Laweslah ku ingan si erkubang, perjakilah taneh liat,Banlah batu bata.
15 Tapi tetap nge kam pagi keri ipan api.
Ibunuh pedang kam pagi.+
Ipangani kam pagi bagi si ban labang si nguda denga.+
Reh teremnalah ban dirindu bagi labang si nguda denga!
Ue, reh teremnalah ban dirindu bagi labang!
16 Tambahindu perbinagandu buen asangken bintang-bintang i langit.
Lepasken labang si nguda denga kulitna janah lawes kabang.
17 Penjaga-penjagandu bagi labang,Pejabat-pejabatndu bagi sada kelompok labang.
Bas pagi-pagi wari si mbergeh, cebuni kalak e i celah-celah tembok batu,Tapi sanga ersinar matawari, lawes kalak e kabang.
La lit ise pe si metehsa ku ja perlawesna.
18 O raja Assur, permakan-permakanndu munduk-unduk.
Bangsawan-bangsawanndu tading i rumahna.
Rakyatndu merap i gunung-gunung,La lit ise pe si mpepulung kalak e.+
19 Labo kam banci lepas arah bencanandu nari.
Lukandu la terpepalem.
Ertepuk kerina kalak si megi berita kerna kam.+
Sebap ise kin si la pernah nggejapken kekejamenndu si la erngadi-ngadi?”+
