Nehemia 13:1-31
13 Bas wari e, ibacaken me buku Musa+ janah lit tertulis i je maka kalak Ammon ras kalak Moap+ la banci masuk ku perpulungen umat Dibata si benar,+
2 perban mbarenda la bere kalak e roti ras lau man kalak Israel, tapi upahina Bilham guna numpahi kalak e.+ Tapi ubah Dibata kami sumpah e jadi pasu-pasu.+
3 Kenca begi kalak e Undang-Undang e, mis pisahken kalak e kerina keturunen bangsa asing* arah Israel.+
4 Sebelumna, imam si ngurus gudang-gudang* bas rumah* Dibata kami+ eme Eliasip+ kade-kade Tobia.+
5 Sikapkenna man Tobia gudang* si galang si mbarenda ipake guna ingan persembahen pangan,* kemenyan mbentar, bage pe peralaten ras sepersepuluh arah biji-bijin,* anggur si mbaru, ras minak.+ Enda kerina jatah kalak Lewi,+ penyanyi-penyanyi, ras penjaga-penjaga gerbang, bage pe sumbangen man imam-imam.+
6 Sanga terjadi si e, aku la i Jerusalem, perban bas tahun si pe-32-ken+ pemerentahen Artasasta+ raja Babilon, aku sangana njumpai raja. Janah bas pudi wari kupindo man raja gelah banci aku mulih.
7 Kenca si e, reh aku ku Jerusalem janah kuidah perbahanen Eliasip+ si la mehuli. Ibanna sada gudang man Tobia+ bas halamen rumah Dibata si benar.
8 Sitik pe la aku senang kerna si e, emaka kubenterken kerina peraboten rumah Tobia arah gudang* e.
9 Kenca si e kuperentahken ka gelah gudang-gudang* e ipebadia, jenari kutama mulihi peralaten rumah Dibata si benar+ i je bage pe persembahen pangan ras kemenyan mbentar.+
10 Kuteh ka maka kalak Lewi+ la dat jatah,+ emaka kalak Lewi ras penyanyi-penyanyi si itugasken enggo lawes ku jumana masing-masing.+
11 Emaka kurawai pejabat-pejabat+ janah ningku, “Engkai maka rumah Dibata si benar lanai iperdiateken?”+ Kenca si e kupepulung kalak Lewi janah kusuruh kalak e mulihken ertugas bas inganna masing-masing.
12 Kerina kalak Juda maba sepersepuluh+ arah biji-bijin,* anggur si mbaru, ras minak ku gudang-gudang e.+
13 Kenca si e kutugasken Imam Selemia, Sadok eme sekalak penulis,* Pedaya eme kalak Lewi guna ngawasi gudang-gudang. Kutugasken ka Hanan anak Sakur kempu Mattania si nampati kalak e, sebap kalak e terteki. Tugas kalak e eme mbagiken jatah man senina-senina kalak e.
14 O Dibataku, inget min aku+ ras perbahanenku enda. Ula lupaken kekelengen si setia si enggo kucidahken man rumah Dibataku bage pe pelayanen si lit i je.+
15 Sanga si e, kuidah kalak si lit i Juda merjaki anggur bas ingan ngerik* bas wari Sabat.+ Baba kalak e biji-bijin si ergun-gun janah tamana i datas kelede janah baba kalak e inemen anggur, buah anggur, ara, ras baban si debanna ku Jerusalem bas wari Sabat.+ Emaka kupersingeti kalak e gelah ula ndayaken kai pe bas wari e.*
16 Kalak Tirus si tading i kota e maba ikan ras kerina barang dayanna, janah dayakenna man kalak Juda i Jerusalem bas wari Sabat.+
17 Emaka kurawai bangsawan-bangsawan Juda janah ningku man kalak e, “Engkai maka jahat kel perbahanen kena? La ergai kena wari Sabat!
18 La kin bage kang si lakoken nini bulang kena maka hukum Dibata kita ras kota enda? Gundari enggo ban kena reh rawana Dibata man Israel alu la ngergai wari Sabat.”+
19 Emaka kuperentahken gelah gerbang-gerbang Jerusalem itutup sanga nandangi gelap, eme ope lenga wari Sabat imulai. Kukataken ka gelah gerbang-gerbang e la banci ibuka ngasa dung wari Sabat. Kutugasken piga-piga anak buahku bas gerbang-gerbang gelah la lit baban si ibaba masuk bas wari Sabat.
20 Lit sekali ntah dua kali pedagang-pedagang ras perbinaga-perbinaga si ndayaken barang dayanna erberngi i darat Jerusalem.
21 Emaka kupersingeti kalak e janah ningku, “Engkai maka kena erberngi i lebe-lebe tembok? Adi ulihi kena bage, kupaksa kena lawes.” Mulai je nari lanai kalak e reh bas wari Sabat.
22 Kukataken man kalak Lewi gelah ratur kalak e mpebadia dirina janah reh guna njaga gerbang-gerbang, gelah wari Sabat tetap badia.+ O Dibataku, inget ka min enda guna aku, janah mekuah min ateNdu aku sebap kekelengenNdu si setia seh kel belinna.+
23 Sanga si e pe kuidah ka kalak Jahudi ngempoi* kalak Asdot,+ kalak Ammon, bage pe kalak Moap.+
24 Setengah arah anak-anak kalak e ngerana bas bahasa Asdot janah setengah nari ngerana bas bahasa bangsa-bangsa si deban, tapi la lit sada pe si banci ngerana bas bahasa kalak Jahudi.
25 Emaka kurawai kalak e janah kusumpahi, jenari kupekpeki piga-piga arah kalak e,+ kucabut bukna, janah kusuruh kalak e ersumpah bas gelar Dibata, “Ula bere anak-anak kena empoi anak-anak kalak ah, janah ula bere anak-anak kena ngempoi anak-anak kalak ah, janah kena pe ula ngempoi anak-anak kalak ah.+
26 La kin Salomo raja Israel erdosa perban si e kang? La lit raja si bagi ia bas kerina bangsa,+ janah keleng ate Dibatana ia,+ emaka iban Dibata ia jadi raja bas kerina Israel. Tapi diberu-diberuna si kalak asing e erban ia erdosa.+
27 Engkai maka lakoken kena dosa si mbelin enda? La kena setia man Dibatata alu ngempoi diberu-diberu arah bangsa asing!”+
28 Lit sada anak Joyada+ jadi kela Sanballat+ kalak Horon. Emaka kupelawes ia arah lebe-lebeku nari. Joyada e anak Imam si Mbelin Eliasip.+
29 O Dibataku, inget min kalak e, janah hukum min kalak e si enggo erban lanai badia pelayanen imam-imam bage pe perjanjin kerna imam-imam+ ras kalak Lewi.+
30 Selain si e, kupebadia kalak e arah kerina pengaruh si la mehuli si reh arah bangsa-bangsa asing janah kutugasken imam-imam ras kalak Lewi bas tugasna masing-masing.+
31 Selain si e, kuaturken gelah lit persedian kayu+ bas waktu-waktu si enggo itetapken bage pe guna hasil rani si pertama.
O Dibataku, inget min aku janah pasu-pasulah aku.+
Cataten i teruh
^ Ntah “keturunen campuren.”
^ Ntah “ruangen-ruangen ingan man.”
^ Ntah “rumah pertoton.”
^ Ntah “ruangen ingan man.”
^ Ntah “ruangen ingan man.”
^ Ntah “ruangen-ruangen ingan man.”
^ Ntah “penyalin.”
^ Ntah banci saja “kupersingeti kalak e bas wari e gelah ula ndayaken kai pe.”
^ Ntah “maba ku rumah kalak e.”
