Nehemia 2:1-20
2 Bas bulan Nisan* tahun si pe-20-ken+ pemerentahen Raja Artasasta,+ ihidangken me inemen anggur i lebe-lebe raja. Bagi biasana, kubuat anggur e janah kubereken man raja.+ Tapi lenga pernah aku sedih i lebe-lebena.
2 Emaka sungkun raja aku, “Engkai maka sedih kel kam? Labo kam kuidah sakit. Pasti lit si sangana ukurindu.” Mbiar kel aku megi si e.
3 Emaka ningku man raja, “Mbera-mbera ipasu-pasu kam, Raja! Banci kin kapndu la kuakap sedih, adi kota ingan nini bulangku ikuburken enggo runtuh, janah gerbang-gerbangna enggo keri ipan api?”+
4 Kenca si e nina raja man bangku, “Kai dage pemindonndu?” Sanga si e, minter aku ertoto man Dibata si erkuasa i surga.+
5 Emaka ningku man raja, “Adi meriah ukurndu Raja janah jadi atendu budakndu enda, utuslah aku ku Juda, ku kota ingan nini bulangku ikuburken gelah banci kubangun mulihi kota e.”+
6 Kenca si e nina raja si sangana kundul i samping ratu, “Uga dekahna kam lawes? Ndigan kam mulih?” Kepeken meriah ukur raja ngutus aku,+ emaka kukataken uga dekahna aku lawes.+
7 Kenca si e ningku man raja, “Adi meriah ukurndu Raja, bere min surat-surat man bangku gelah kubereken pagi man gubernur-gubernur si lit i daerah sebelah barat Lau Eprat,*+ gelah banci aku lewat arah daerah kalak e janah selamat seh i Juda.
8 Bere ka min surat si kubereken pagi man Asap eme penjaga Taman Kerajan,* alu bage banci berena man bangku kayu guna gerbang-gerbang Benteng Rumah Pertoton,+ guna tembok-tembok kota,+ bage pe guna rumah inganku tading.” Emaka bereken raja man bangku,+ perban Dibataku si mehuli nampati aku.+
9 Dungna kujumpai gubernur-gubernur daerah sebelah barat Lau Eprat janah kubereken surat-surat raja man kalak e. Utus raja ka peminpin-peminpin pasuken ras prajurit si erkuda nemani aku.
10 Tapi sanga Sanballat+ kalak Bet Horon bage pe Tobia+ pegawai* Ammon+ megi kerna si e, sitik pe la kalak e senang perban lit kalak si reh guna ngelakoken kai si mehuli man kalak Israel.
11 Dungna seh aku i Jerusalem, janah telu wari dekahna aku tading i jah.
12 Sanga berngi, medak aku ras piga-piga kalak si lit ras aku, janah la kukataken man ise pe sura-sura si enggo ban Dibata bas pusuhku guna Jerusalem. La lit binatang si kubaba selain kelede si kunangkihi.
13 Bas berngi e ndarat aku arah Gerbang Lembah,+ lewat aku arah lebe-lebe Mata Lau Nipe si Galang ku Gerbang Abu si Ergun-gun.*+ Jenari kupereksa tembok Jerusalem si enggo runtuh bage pe gerbang-gerbangna si enggo ipan api.+
14 Kenca si e, lawes aku ku Gerbang Mata Lau+ bage pe ku Kolam Raja. Tapi la siat binatang si kunangkihi lewat arah e.
15 Amin gia bage, bas berngi e kuterusken perdalanenku ku lembah,*+ janah lalap kupereksa tembok. Jenari mulihken aku janah masuk aku arah Gerbang Lembah, kenca si e mulih aku.
16 La teh pejabat-pejabat ku+ ja aku lawes ras kai si kulakoken, sebap kai pe la kukataken man kalak Jahudi, imam-imam, bangsawan-bangsawan, pejabat-pejabat, ras kalak si erdahin si debanna.
17 Dungna ningku man kalak e, “Enggo idah kena uga ngerina keadanta, Jerusalem enggo hancur, janah gerbang-gerbangna enggo itutung. Sibangunlah mulihi tembok Jerusalem, gelah ula nai kita ipermelaken.”
18 Kenca si e, kuceritaken uga Dibataku si mehuli ndukung aku+ bage pe kai nina raja man bangku.+ Megi si e, ning kalak e, “Ota sibangun mulihi.” Kalak e mpegegehi sada ras si debanna* guna ngelakoken dahin si mehuli e.+
19 Sanga Sanballat kalak Horon, Tobia+ pegawai* Ammon,+ ras Gesem kalak Arab+ megi kerna si e, tokoh-tokohi kalak e kami,+ hinana kami, janah nina, “Erkai kena e? Mberontak ate kena man raja?”+
20 Tapi ningku njawapsa, “Dibata si erkuasa i surga pasti erban kami berhasil,+ emaka kami budak-budakNa mulai mbangun. Tapi la lit urusen kena, la lit hak kena ras bagin kena bas sejarah Jerusalem.”+
Cataten i teruh
^ Ntah “daerah Trans-Eprat (Sebrang Lau).”
^ Ntah “kerangen raja.”
^ As. “pelayan.”
^ Ntah “Gerbang Sampah.”
^ As. “mpegegehi tan kalak e.”
^ As. “pelayan.”
