Nehemia 8:1-18
8 Kerina rakyat pulung i lapangen si lit i lebe-lebe Gerbang Lau.+ Kataken kalak e man Esra+ gelah babana buku Undang-Undang Musa,+ si bereken Jahwe man kalak Israel.+ Esra e sekalak penulis.*
2 Emaka bas wari si pertama bulan si pepituken,+ baba Imam Esra buku Undang-Undang e ku lebe-lebe jelma si enterem,+ lit dilaki, diberu, ras kerina kalak si banci ngangkaisa.
3 Bacakenna buku e alu jelas+ arah lebe-lebe lapangen si lit i lebe-lebe Gerbang Lau, mulai erpagi-pagi nari seh ngasa ciger. Bacakenna man dilaki, diberu, ras kerina kalak si banci ngangkaisa. Tutus kel ate kalak e megiken+ sanga Undang-Undang e ibacaken.
4 Esra penulis* e tedis i datas panggung kayu si iban guna acara e. I sebelah kananna tedis Mattitia, Sema, Anaya, Uria, Hilkia, ras Maaseya. I sebelah kirina tedis Pedaya, Misael, Malkia,+ Hasum, Hasbaddana, Sakaria, ras Mesullam.
5 Buka Esra buku e janah kerina rakyat ngidah ia sebap inganna tedis ganjangen asangken kerina rakyat. Sanga bukana buku e, tedis kerina rakyat.
6 Kenca si e, puji Esra me Jahwe Dibata si benar ras si mbelin, janah kerina bangsa e ngataken, “Amin!* Amin!”+ jenari angkat kalak e tanna. Dung e sujud kalak e man Jahwe.
7 Kalak Lewi eme Jesua, Bani, Serebia,+ Jamin, Akkub, Sabbetai, Hodia, Maaseya, Kelita, Asaria, Josabat,+ Hanan, ras Pelaya njelasken Undang-Undang e man rakyat.+ Sanga si e rakyat tetap denga tedis.
8 Lalap bacaken kalak e buku Undang-Undang Dibata si benar, iterangkenna alu jelas janah katakenna kai ertina. Bage me kalak e nampati rakyat gelah angkai rakyat kai si sangana ibacaken.+
9 Tangis kerina rakyat sanga megi kata-kata bas Undang-Undang e. Emaka Nehemia eme gubernur* sanga si e, ras Esra+ eme imam ras penulis,* bage pe kalak Lewi si ngajari rakyat, ngataken man rakyat, “Wari enda eme wari si badia man Jahwe Dibata kena.+ Ula kena erceda ate ntah pe tangis.”
10 Nina Nehemia man kalak e, “To, mulihlah ku rumah. Panlah pangan si mehulina,* inemlah inemen si ntebu, janah bereken pangan+ man kalak si la lit bas ia. Wari enda eme wari si badia man Tuhanta, emaka ula sedih, sebap keriahen Jahwe kap gegehta.”*
11 Ipetenang kalak Lewi kerina rakyat, nina, “Ula tangis ras ula sedih, sebap enda wari si badia.”
12 Emaka kerina rakyat lawes guna man ras minem janah bagi-bagiken kalak e pangan man kalak si deban. Meriah kel ukur kalak e+ sebap angkai kalak e kai si enggo ipeseh man kalak e.+
13 Bas wari si peduaken, peminpin-peminpin keluarga bapak arah bangsa e, imam-imam, bage pe kalak Lewi, pulung i sekeliling Esra penulis* e gelah angkai kalak e terbagesen kata-kata bas Undang-Undang e.
14 Bas Undang-Undang si bereken Jahwe arah Musa, lit itulis maka kalak Israel arus tading bas sapo-sapo* sanga perayan bas bulan si pepituken.+
15 Arus umumken kalak e+ ku kerina kota kalak e ras ku belang-belang Jerusalem, “Laweslah ku daerah pegunungen, babalah dahan-dahan si lit bulungna arah batang saitun, batang pinus, batang mirtel, batang kurma, bage pe dahan-dahan arah batang kayu si debanna si lit bulungna guna erban sapo-sapo, bali bagi si tertulis.”
16 Emaka lawes rakyat janah baba kalak e dahan-dahan ndai guna erban sapo-sapo, masing-masing i atap kalak e, i halamen kalak e, i halamen rumah Dibata si benar,+ i lapangen Gerbang Lau,+ ras i lapangen Gerbang Eperaim.+
17 Bage me kerina jelma si enterem si mulih arah inganna itaban nari erban sapo-sapo janah tading i sapo-sapo e. Meriah kel akap kalak e,+ sebap si e lenga pernah lakoken kalak e mulai jaman Josua+ anak Nun seh asa wari e.
18 Buku Undang-Undang Dibata si benar ibacaken tiap wari,+ mulai wari si pertama seh ngasa wari terakhir. Lit pitu wari dekahna perayan e irayaken. Bas wari si pewaluhken, iban me perpulungen si istimewa, bagi si iperentahken.+
Cataten i teruh
^ Ntah “penyalin.”
^ Ntah “penyalin.”
^ Ntah “Terjadilah bage!”
^ Ntah “penyalin.”
^ Ntah “Tirsata.” Bas bahasa Persia, enda gelar jabaten gubernur bas sada propinsi.
^ As. “erlemak.”
^ Ntah “kota si ertembok.”
^ Ntah “penyalin.”
^ Ntah “ingan tading sementara.”
