Nehemia 9:1-38
9 Bas wari si pe-24-ken bulan e, pulung kalak Israel. Puasa kalak e make kain guni janah tama kalak e abu ku takalna.+
2 Pisahken kalak Israel dirina arah kerina kalak asing,+ jenari tedis kalak e janah akui kalak e dosa-dosana bage pe dosa-dosa nini bulangna.+
3 Tedis kalak e bas ingan kalak e masing-masing janah telu jam dekahna buku Undang-Undang+ Jahwe Dibata kalak e ibacaken. Kenca si e, telu jam ka akui kalak e dosa-dosa kalak e janah sujud kalak e man Jahwe Dibata kalak e.
4 Jesua, Bani, Kadmiel, Sebanya, Bunni, Serebia,+ Bani, ras Kenani tedis i datas panggung+ kalak Lewi, janah ertoto kalak e alu sora si megang man Jahwe Dibata kalak e.
5 Jenari ngerana kalak Lewi eme Jesua, Kadmiel, Bani, Hasabneya, Serebia, Hodia, Sebanya, ras Petahia, nina, “Tediskenlah, pujilah Jahwe Dibata kena seh rasa lalap.+ O Dibata, mbera-mbera puji kalak e gelarNdu si mulia, si lebih mulia asangken kerina pasu-pasu ras pujin.
6 “Kam kap ngenca Jahwe.+ Kam si erban langit, langit si meganjangna kel pe ras kerina isina,* doni ras kerina isina, bage pe laut ras kerina isina. JagaNdu kerina gelah tetap nggeluh, janah kerina si lit bas* langit sujud man baNdu.
7 Kam kap Jahwe Dibata si benar, si milih Abram+ janah maba ia ndarat arah Ur+ kota kalak Kaldea, jenari gantiNdu gelarna jadi Abraham.+
8 Enggo idahNdu maka setia ia* man baNdu,+ emaka banNdu perjanjin ras ia guna mereken man bana ras man keturunenna+ negri kalak Kanaan, kalak Het, kalak Amori, kalak Peris, kalak Jebusi, ras kalak Girgasi. TepatiNdu janjiNdu perban benar kap Kam.
9 “IdahNdu uga suina akap nini bulang kami i Mesir,+ janah begiNdu sora kalak e nderkuh i Laut Merah.
10 CidahkenNdu erbage tanda ras mukjizat guna ngukum raja Mesir* bage pe kerina pelayanna ras kerina rakyatna,+ sebap tehNdu mesui kel+ akap nini bulang kami iban kalak e. IbanNdu gelarNdu ipuji seh ngasa gundari.+
11 IbelahNdu laut i lebe-lebe kalak e, emaka banci kalak e erdalan bas laut i datas taneh si kerah.+ IbenterkenNdu kalak si ngayaki kalak e ku laut bagi batu si ibenterken ku laut si merawa.+
12 Bas ciger wari, babaiNdu kalak e alu tiang embun janah bas berngi wari terangiNdu dalan kalak e alu tiang api.+
13 Nusur Kam ku Gunung Sinai+ janah ngerana Kam man kalak e arah surga nari,+ jenari berekenNdu keputusen si adil, undang-undang si benar,* bage pe peraturen ras perentah si mehuli.+
14 AjariNdu kalak e ndalanken SabatNdu si badia,+ janah berekenNdu man kalak e perentah, peraturen, ras undang-undang arah Musa pelayanNdu.
15 Sanga melihe kalak e berekenNdu roti arah surga nari,+ sanga muas kalak e pedaratNdu lau arah tebing batu nari,+ janah katakenNdu man kalak e gelah masuk ku negri e ras ngerebutsa, eme negri si enggo janjikenNdu man kalak e alu sumpah.
16 “Tapi nini bulang kami sombong+ ras keras kepala.+ La kalak e nggit matuhi perentah-perentahNdu.
17 La kalak e nggit megiken,+ janah la inget kalak e perbahanenNdu si luar biasa si cidahkenNdu man kalak e. Tapi kalak e keras kepala janah pilih kalak e sekalak peminpin guna maba kalak e mulih ku Mesir jadi budak.+ Tapi Kam Dibata si nggit ngampuni, mehuli, janah perkuah, la mis merawa, janah kekelengenNdu si setia seh kel belinna,+ e me sebapna la tadingkenNdu kalak e.+
18 Sanga ban kalak e patung anak lembu arah logam nari janah nina, ‘Enda Dibata kena si maba kena ndarat arah Mesir,’+ janah lakoken kalak e perbahanen si la ngergai Kam,
19 amin gia bage, perban belinna perkuah ateNdu, la tadingkenNdu kalak e i taneh mesawang.*+ Tiang embun tetap mabai dalan kalak e bas ciger wari, janah tiang api nerangi dalan kalak e bas berngi wari.+
20 BerekenNdu kesahNdu si badia gelah erpengangka kalak e,+ lalap bereNdu manna man kalak e,+ bage pe lau sanga kalak e muas.+
21 Lit 40 tahun dekahna bereNdu kalak e pangan i taneh mesawang.*+ La kalak e kurang kai pe. Uis kalak e la ceda,+ janah nahe kalak e pe la bengkak.
22 “SerahkenNdu kerajan-kerajan ras bangsa-bangsa man kalak e, jenari bagikenNdu sada per sada man kalak e,+ alu bage banci rebut kalak e negri Sihon+ eme negri raja Hesbon,+ ras negri Og+ eme negri raja Basan.
23 Janah banNdu keturunen kalak e bagi bintang i langit buena.+ Kenca si e, babaNdu kalak e ku negri si janjikenNdu man nini bulang kalak e gelah kuasai kalak e.+
24 Emaka masuk keturunen kalak e janah rebutna negri e.+ I lebe-lebe kalak e talukenNdu kalak Kanaan+ eme penduduk negri e, janah berekenNdu raja-rajana ras rakyatna ku tan kalak e. Kai pe banci lakoken kalak e man kalak si italuken e.
25 Rebut kalak e kota-kota si erbenteng+ bage pe taneh si subur,+ ras rumah-rumah si dem alu barang-barang si mejile, sumur* si enggo igali, kebun anggur, kebun saitun,+ ras melala kel batang kayu si erbuah. Kalak e man ngasa puas janah makmur kegeluhen kalak e. Gejapken kalak e kel kiniulinNdu si mbelin.
26 “Tapi dungna la kalak e patuh janah mberontak man baNdu.+ Tadingken kalak e Undang-UndangNdu.* Nabi-nabi si mpersingeti kalak e gelah mulih man baNdu pe bunuh kalak e. Lakoken kalak e perbahanen si sitik pe la ngergai Kam.+
27 E me sebapna serahkanNdu kalak e ku tan musuh-musuhna+ si erban mesui kel akap kalak e.+ Tapi sanga mesui kel akap kalak e, nderkuh kalak e man baNdu janah begikenNdu arah surga nari. Perban belinna perkuah ateNdu, utusNdu penyelamat guna mbebasken kalak e arah musuh-musuhna nari.+
28 “Tapi kenca bebas kalak e, lakoken kalak e mulihi kai si jahat i lebe-lebeNdu,+ janah serahkenNdu kalak e ku tan musuh-musuhna si nguasai* kalak e.+ Kenca si e mulihken ka kalak e erlebuh mindo penampat man baNdu,+ janah begikenNdu arah surga nari. Jenari mulih-ulih bebaskenNdu kalak e, perban belinna perkuah ateNdu.+
29 Amin gia persingetiNdu kalak e gelah patuh mulihi man Undang-UndangNdu, sombong perbahanen kalak e janah la kalak e nggit megiken perentah-perentahNdu.+ Langgar kalak e peraturen-peraturenNdu, padahal alu matuhi si e banci erban kalak tetap nggeluh.+ Tapi la diate kalak e,* mekeng ia, janah la ia nggit megikenca.
30 Ertahun-tahun dekahna sabar Kam man kalak e.+ Lalap persingetiNdu kalak e alu kesahNdu si badia eme arah nabi-nabiNdu, tapi la kalak e nggit megiken. Dungna, serahkenNdu kalak e gelah ikuasai rakyat negri e.+
31 Tapi perban belinna perkuah ateNdu, la kernepkenNdu+ ntah pe la tadingkenNdu kalak e, sebap Kam Dibata si mehuli ras perkuah ate.+
32 “Gundari, o Dibata kami, Dibata si mbelin, si megegeh, ras si luar biasa, si nepati janjiNa ras si ncidahken kekelengen si setia,+ inget min kerina kesusahen kami, raja-raja kami, peminpin-peminpin kami,+ imam-imam kami,+ nabi-nabi kami,+ nini bulang kami, ras kerina umatNdu mulai jaman raja-raja Assur+ seh ngasa gundari.
33 Kam tetap adil amin gia enggo nanami kami kerina enda, sebap Kam setia. Tapi perbahanen kami kap si jahat.+
34 Raja-raja kami, peminpin-peminpin kami, imam-imam kami, ras nini bulang kami, la patuh man Undang-UndangNdu janah la mperdiateken perentahNdu ntah pe persingetNdu guna mpersingeti kalak e.
35 Janah sedekah pemerentahen raja-raja kami, gejapken kalak e kiniulinNdu si seh kel belinNa janah tading kalak e i taneh si mbelang ras subur si bereNdu man kalak e, tapi la ilayani kalak e Kam+ janah lalap lakoken kalak e perbahanen si jahat.
36 Gundari, kami budak,+ budak bas negri si berekenNdu man nini bulang kami gelah pan kalak e kerina hasil si mehuli arah negri e.
37 Hasil si seh kel lalana e enggo jadi jang raja-raja si berekenNdu nguasai kami perban dosa-dosa kami.+ Kuasai kalak e kami ras asuh-asuhen kami. Ate-ate kalak e perbahanenna man kami, emaka mesui kel akap kami.
38 “Perban si e kerina, ban kami perjanjin si paguh+ si tertulis, janah sahken kami alu stempel peminpin-peminpin kami, kalak Lewi si lit ras kami, ras imam-imam kami.”+
Cataten i teruh
^ As. “kerina tenterana.”
^ As. “kerina tentera.”
^ Ntah “ukurna.”
^ As. “Paro; Firaun.” Penggelaren man raja Mesir.
^ Ntah “undang-undang si terteki.”
^ Taneh si mbelang si jarang iingani.
^ Taneh si mbelang si jarang iingani.
^ Maksudna, lubang guna nimpan lau.
^ As. “Ambekken kalak e Undang-UndangNdu ku pudi kalak e.”
^ Ntah “si engkernepken.”
^ Ntah “Tapi pudiken kalak e Kam.”
