Pengerana 11:1-10
11 Benterkenlah rotindu ku bas lau,+ sebap datndu ka nge pagi mulihi.+
2 Berekenlah deba baginndu man pitu kalak ntah pe waluh kalak,+ sebap la tehndu kai pagi cilaka* si reh man bandu i doni enda.
3 Adi embun-embun dem lau, penusurna udan ku doni. Adi batang kayu ndabuh ku selatan ntah pe ku utara, ampar ia bas inganna ndabuh e.
4 Kalak si lalap mperdiateken angin labo pagi nuan benih, janah kalak si lalap mperdiateken embun labo pagi rani.+
5 Labo tehndu uga tulan bayi terbentuk* bas rahim mamakna.+ Bage ka pe labo tehndu kai si ilakoken Dibata si benar, si enggo ngelakoken kerina.+
6 Suanlah benihndu sanga erpagi-pagi, janah ula kam ngadi seh ngasa berngi+ sebap la tehndu si apai pagi si turah, benih si sadenda ntah si sadah, ntah banci saja duana turah.
7 Terang e erban meriah ukur. Janah mejile adi mata ngidah sinar matawari.
8 Adi gedang umur sekalak jelma, dalaninalah geluhna alu ermeriah ukur.+ Tapi arus ingetna maka banci saja melala wari kesusahen. Kerina si nandangi reh e sia-sia kap.+
9 O anak muda, ermeriah ukurlah sanga kam nguda denga. Mbera-mbera meriah ukurndu sanga kam nguda denga. Ikutkenlah sura-sura pusuhndu janah laweslah kam ku japa pe kam babai matandu. Tapi arus tehndu, hakimi Dibata si benar pagi kerina perbahanenndu e.+
10 Emaka ambekkenlah kai si erban susah arah pusuhndu janah pedauhlah kai si ncedai dagingndu. Masa muda ras masa si mehulina bas kegeluhen e pe, sia-sia kap.+